II SAMUEL 2 - Navajo Bible

David éí Júdah dine'é aláahgo binanit'a'í ályaa

¹ Kódzaadóó bik'ijį' David éí Bóhólníihii áyidííniidgo ání, Júdah kéyahdi kin hadaas'áhígíísh ła' bich'į' dishááh? Nít'éé' Bóhólníihii áhodííniid, Nílááh, ákóde dínááh. David ázhdííniid, Háájíígíí lá bich'į' dishááh? Áko áháłní, Hííbrangóó dínááh.

² Ákohgo David ákóde dashdiiyá, áádóó hwe'asdzą́ą́ t'áá áłah bił; ła' éí Jézriyel kin shijaa'dóó asdzání Ahínowam wolyé, náánáła'ígíí Ábigeil éí Néíbal be'asdzą́ą́ nít'é'ígíí Kármel kin shijaa'dóó asdzání nilį́.

³ Áádóó David éí diné hoł naakaígíí índa bada'áłchíní bił Hííbran nahós'a'góó jiní'eezh, áko áadi kin hadaas'áagi kéédahat'į́.

⁴ Áko Júdah dine'é yíkaigo David éí Júdah dine'é yinanit'a'í dooleeł biniyé ak'ah bik'i yadayiiziidgo yiyíísį́į́'. Áádóó David yił dahalne'go ádaaní, Jéíbesh-gíliyadóó dine'é éí Saul yę́ę yóó'ádayiilaa.

⁵ Áádóó David éí naal'a'í dashdiił'a'go Jéíbesh-gíliyadóó dine'é ííłní, Bóhólníihii nihik'izhdoodliił, háálá nihinanit'a'í nilíinii Saul yę́ę baa dajiinohba'go yóó'ádaohłaa.

⁶ Áádóó k'ad Bóhólníihii nihaa jooba'go áádóó t'áá aaníinii yee nihił halne'; shí ałdó' nihaa jiinishba' doo, háálá díí yá'át'éhígi ádaahdzaa.

⁷ Éí bąą k'ad haa'íyee' nihidziilgo índa doo ninádahinołyéésgóó áda'dołnééh, háálá nihinanit'a'í Saul daaztsą́, áádóó ałdó' Júdah dine'é binanit'a'í nishłį́į doo biniyé ak'ah shik'i yayiiziidgo shíísį́į́'.

David éí Saul ba'áłchíní yił da'ahigą́

⁸ Nidi Ner biye' Ábner éí Saul bisiláo yił dah yinéłígíí yinanit'a'í nilíinii éí Saul yę́ę biye' Ish-bósheth éí Meihanéíyim kin shijaa'góó yił ní'áázh.

⁹ Áadi Gíliyad kéyah áádóó Ásher dine'é índa Jézriyel kin haal'áii áádóó Íífreiyim dine'é índa Bénjamin dine'é áádóó Ízrel dine'é t'áá ałtso aláahgo yinanit'a'í nilį́įgo áyiilaa.

¹⁰ Saul yę́ę biye' Ish-bósheth dízdiin binááhaigo Ízrel dine'é aláahgo yinanit'a'í silį́į́', áádóó yinant'áago naaki nááhai. Nidi Júdah dine'é éí David yikéé' adahidíízį́.

¹¹ Íídą́ą́' David éí Hííbran kin haal'áagi Júdah dine'é yinanit'a'í nilį́įgo tsosts'id nááhaidóó hastą́ą́h nídeezid.

¹² Áko Ner biye' Ábner éí Saul yę́ę biye' Ish-bósheth yá nidaal'a'í Meihanéíyim kin shijaa'dóó bił ch'íjíkaigo Gíbiyan kin haal'áadi jíkai.

¹³ Áádóó Zerowáíyah biyáázh Jó'ab éí David bá nidaal'a'í yił dah diikaigo Gíbiyan kin haal'áagi tó siyínígíí bibąąhgi dineezbin; ła' éí łahjí, ła'ígíí éí náánáłahjí ał'ąą dineezbin.

¹⁴ Áádóó Ábner éí Jó'ab áyidííniid, Haa'íyee' k'ad tsíłkéí ałch'į' nidookahgo nihidáahgi da'ahidoogą́ą́ł. Jó'ab ádííniid, Hágo lą́ą bíni'dii da'ahigą́.

¹⁵ Áko ał'ąą hasht'e'ádadiilyaago Bénjamin dine'é naakits'áadahgo Saul yę́ę biye' Ish-bósheth yich'ijí danilį́įgo éí David bá nidaal'a'í naakits'áadahgo yił ałch'į' niikai.

¹⁶ Áádóó t'ááłá'í nítínígo ahidiníłnáago bitsiits'iin deisiłgo booshk'iizh góne' diltłish ahidiníłnáago ałghá deisgeedgo t'áá łahjį' naa'aníídee'; éí bąą Gíbiyan kin haal'áadi Hélkath-házurim hoosye'.

¹⁷ Áko íídą́ą́' t'óó báhádzidgo da'ahijoogą́ą'go Ábner índa Ízrel dine'é hasiláo éí David bá nidaal'a'í hak'eh dadeesdlį́į́'.

¹⁸ Zerowáíyah biyáázhké tált'éego atah naakai éí Jó'ab áádóó Abísheiyai índa Éísahel daolyé; Éísahel éí jádí nahalingo jidilwo'.

¹⁹ Áádóó Éísahel éí Ábner yikéé' nídiilwodgo nishtł'ajigo índa nish'náajigo t'áadoo haalyeedí Ábner yikéé' yilwoł.

²⁰ Áko Ábner t'ą́ą́' nídéét'į́į'go hoołtsą́ągo áhodííniid, Niísh Éísahel ánít'į́? Áko ázhdííniid, Aoo', shí ásht'į́.

²¹ Áádóó Ábner áhodííniid, Ninish'náajigo, doodaii' ninishtł'ajigo hanilyeed, áko tsíłkéí ła' yiisiłgo yee naabaahii bighaní'nííł. Nidi Éísahel t'áá hakéé' yilwoł.

²² Nít'éé' Ábner éí Éísahel ánéidoo'niid, T'áadoo shikéé' ahidíínízį́įgo yílwołí. Ha'át'íísh biniyé naa'aníjíshxaał dooleeł? Haash yit'éego nínaaí Jó'ab bidááhdóó nideeshááł?

²³ Nidi doo t'áá k'ad hak'ee'ąą haalwodgóó hakéé' yilwołgo Ábner bitsiidétáán bikée'jigo hatsą́ą́' biyaa góne' hagháinísxi', áko t'áá ákwe'é naa'ajíígo'go dadziztsą́, índa t'áá ałtso hakéé' deíjeehígíí naa'ajíígo'go dadziztsáníjį' niníjéé'.

²⁴ Jó'ab áádóó Abísheiyai ałdó' Ábner yikéé' ná'ahidíníilchxą́ą́', éí k'adę́ę e'e'aahgo Gíbiyan honoojí bíighahdi Gáíyah bich'į'góó Éímah yílk'idjį' bikéé' ahizhneelchxą́ą́'.

²⁵ Áádóó Bénjamin dine'é ahí'ahiiltį́įgo Ábner yikéé' dah diijée'go wók'ą́ągi yíl'á.

²⁶ Áko Ábner éí Jó'ab yich'į' ádííniidgo ání, Da' diltłishísh bee hool'áágóó í'ooldįįł doo? Da' díísh doo nił bééhózin da? Ahigą́ bik'i deekaijį' ts'ídá t'áá íiyisí yínííł bik'ená'ígée' dooleeł. Haa nízahdishą' índa diné bik'isóó yikéé' nahaakaígíí, K'adí, bididííniił?

²⁷ Jó'ab ádííniid, Ts'ídá t'áá aaníí Diyin God hiná; ákót'éego t'áadoo háínídzíí'góó ts'ídá t'áá aaníí hoos'įįdjį' diné nílááhgóó anídahaaskaigo bik'isóó danilíinii doo yikéé' nahaakai da doo nít'éé'.

²⁸ Áádóó Jó'ab deenásts'aa' bidee' bee í'dílzoołí yee ádííniidgo diné t'áá ałtso t'óó ádahodiilzee'; Ízrel dine'é yikéé' t'áadoo nááhideeskai da índa t'áadoo yił nááda'ahoogą́ą' da.

²⁹ Ábner áádóó diné yił naakaígíí t'áá bił tł'éé' bíighah Árabah dzígaigóó bił jookahgo Jórdan tooh ha'naa nijíkaigo Bíthran nahós'a'góó ch'íjíkaigo Méíhanéíyim kin shijaa'jį' nijíkai.

³⁰ Áádóó Jó'ab éí Ábner bikéé' jiyoodááł yę́ę t'óó t'ą́ą́' nídzídzá áádóó diné t'áá ałtso áłah ájiilaago David bá nidaal'a'ígíí náhást'éíts'áadahgo Éísahel t'áá bił nidabi'diztseed lá.

³¹ Nidi David bá nidaal'a'í éí Bénjamin dine'é Ábner yikéé' tádíkáahii táadi neeznádiindóó ba'aan hastą́diingo nideistseed.

³² Áádóó Éísahel éí Béthlehem kin shijaa'di bizhé'é yóó'ályaa yę́ędi yóó'ábi'diilyaa. Áádóó Jó'ab índa diné yił naakaígíí tł'éé' bíighah yikahgo ha'íí'ą́ągo Hííbran kin haal'áajį' nákai.