II SAMUEL 18 - Navajo Bible

Ábsalam daaztsą́

¹ Nít'éé' David éí diné hoł naakaígíí jííłta' nít'éé', áádóó míilgo daníjaa'ii binanit'a'í bik'eh danízį́įgo índa neeznádiingo daníjaa'ii binanit'a'í bik'eh danízį́įgo ájiilaa.

² Áádóó David éí diné táidi'éshígíí táa'go dah yinéełgo áyiilaa; éí ła' Jó'ab táidi'éeshgo ájiilaa, áádóó Zerowáíyah biyáázh Jó'ab bik'is Abísheiyai éí ałdó' ła' táidi'éeshgo áyiilaa, índa Gath kin haal'áádóó dine'é Ítayai ałdó' ła' táidi'éeshgo áyiilaa, áko aláahgo naat'áanii éí diné áyidííniid, T'áá aaníí shí ałdó' ákǫ́ǫ́ nihił yishkah dooleeł.

³ Nidi diné áńdahodoo'niid, Doo ákǫ́ǫ́ nihił dííkah da, háálá yóó'iijée'go nihí éí doo íiyisí nihíniiká ádaat'į́į da doo, doodaii' ałníí'dóó nidanihistseedgo nihí doo íiyisí nihiniyé ádaat'į́į da doo. Nidi nihí neeznáadi mííl niilt'éhígíí biláahgo anílį́; éí bąą k'ad kin haal'áádóó nihíká adíílwołjí éí yá'át'ééh.

⁴ Áádóó aláahgo naat'áanii ádííniid, T'áá aláahgo nihił yá'ádaat'éhígíí ádeeshłííł, áádóó aláahgo naat'áanii éí yah a'atiin bíighahgi sizį́, áko diné neeznádiin daníjaa'go áádóó míilgo daníjaa'go t'áá ałtso ch'éheezná.

⁵ Nít'éé' aláahgo naat'áanii éí Jó'ab áádóó Abísheiyai índa Ítayai yich'į' haadzíi'go kóní, Shí shąą Ábsalam diné ániid naagháii t'áá baa dajiinohba'. Áko diné t'áá ałtso binááł aláahgo naat'áanii éí siláo binanit'a'í t'áá ałtso Ábsalam doo haada dazhdoolííłgóó yee áhodííniid.

⁶ Áko siláo dah dadiináago Ízrel dine'é yich'į' anaa' dahasłį́į́'; Íífreiyim kéyah hodíłch'il tahgi bił da'ahijoogą́ą́'.

⁷ Áadi Ízrel dine'é éí David bá nidaal'a'í dabíłtséedgo áadi íídą́ą́' ayóó ánéelą́ą'go dabi'doogą́'ígíí éí naadiindi mííl siláo ábi'disdįįd lá.

⁸ Áko anaa' hazlį́į'go kéyahgóó t'áá át'é da'ahijigą́; íídą́ą́' diltłish bee nahózdįįdígíí bilááh ázhnéelą́ą'go hodíłch'il bii'góó yóó'adahizdineeskaigo áhásdįįd.

⁹ Áádóó Ábsalam éí David yá nidaal'a'í yił ałk'ą́ą́h yikai, áko Ábsalam éí dzaanééz bił yilwołgo chéch'iltsoh bits'áoz'a' ałtaanáneez'áá léi' hoł bik'ą́ą́h yilwodgo biishdinoolne'go yádiłhił índa nahasdzáán bita'gi t'áá ákǫ́ǫ́ dah nijilch'ąął; dzaanééz éí hayaa haalwodgo eelwod.

¹⁰ Nít'éé' diné léi' biiłtsą́ągo kóníigo Jó'ab yił hoolne', Shoo, Ábsalam ga' chéch'il yiih dinoolne' léi' dah naalch'ąąłgo yiiłtsą́.

¹¹ Áádóó Jó'ab éí diné bił hoolne'ígíí áyidííniid, Áko, jó, yinił tsą́ą́ léi' doo haniih ni'jį' abídzíłxaał da, áko béésh łigaii neeznáá bíighahgo áádóó sis bił naadeeshnił nít'éé'.

¹² Áko diné éí Jó'ab ííłní, Azhą́ míilgo béésh łigaii shílák'ee'nil nidi, aláahgo naat'áanii biye' doo t'áá k'ad bił nizníłxaal da, háálá aláahgo naat'áanii deísíilts'ą́ą'go yee ánihidííniid, Jó, ni áádóó Abísheiyai índa Ítayai ánihidi'ní, Diné ániid naagháii Ábsalam haada daohłe' lágo.

¹³ Éí doodago ákwíishłaago she'iina' bik'ijį' náníshdlį́į doo nít'éé'; jó, aláahgo naat'áanii t'áadoo bits'ąą nanil'iní da, áko ni nidi shíká yí'áał dooleeł nít'éé'.

¹⁴ Nít'éé' Jó'ab ádííniid, T'áadoo biniyéhígóó yee' t'óó shiníníłtł'ahgo ádíní, áko tsiidétáán táa'go dah yidiijaa'go Ábsalam bijéí góne' yaa ayiisgeed; chéch'il yiih dinoolne'go t'ahdii t'áá hináago dah naalch'ąął nít'éé' lá.

¹⁵ Áko tsíłkéí neeznált'éego éí Jó'ab yee naabaahii yá nideijaahígíí Ábsalam yinázt'i'go yighá da'ashxiishgo dayiisxį́.

¹⁶ Áko Jó'ab éí deenásts'aa' bidee' bee í'dílzoołí yee ádííniid, áádóó Ízrel dine'é yikéé' deíjeehígíí t'ą́ą́' hahaazhjéé'; jó, Jó'ab éí diné yéé'níłnii'.

¹⁷ Áádóó Ábsalam dah deidiiłtį́įgo tsintahgi t'áá íiyisí hótsaago ahoodzą́ą́ léi' góyaa adayiisxango t'áá íiyisí tsé yik'i yáádayiitsih, áko Ízrel dine'é t'ááłá'í nítínígo dabiníbaalgóó anáhineezhchą́ą́'.

¹⁸ Ábsalam t'ah hiná yę́ędą́ą́' tsé níyizii ła' néidii'ą́ągo t'áá bí ádá ayíítsih; éí aláahgo naat'áanii biyíldzis góyaa yaa'á, háálá íídą́ą́' ání, Shiye' bee shééhániih dooígíí doo ła' naagháa da, áko tsé bízhi' yee yiyíízhi'ígíí díí jį́į́góó Ábsalam bígo haz'ą́ hoolyé.

¹⁹ Nít'éé' Zéídak biye' Ahímeiyaz ádííniid, Haa'íyee' k'ad yaashtaałgo aláahgo naat'áanii ábidideeshniił, Bóhólníihii éí ni'ana'í danilínígíí ná k'éidiidlaa.

²⁰ Áádóó Jó'ab áhodííniid, Díí jį́ doo ákǫ́ǫ́ hane' díí'áał da, nidi t'áá haa'ída índa hane' díí'ááł, nidi díí jį́ t'ááká ákǫ́ǫ́ hane' dóó'a' lágo, háálá aláahgo naat'áanii biye' daaztsą́.

²¹ Nít'éé' Jó'ab éí Kúshai dine'é nilínígíí áyidííniid, Nílááh, aláahgo naat'áanii bich'į' hane' dí'aahgo yiniłtsánígíí bee bił hodíílnih. Áádóó Kúshai dine'é éí Jó'ab yich'į' yaa ádzaa áádóó dah diilwod.

²² Áko Zéídak biye' Ahímeiyaz éí Jó'ab ánéidoo'niid, Azhą́ ákót'ée nidi shíni'dii, nánooshkąąh, Kúshai dine'é nilíinii bikéé' nídiishyeed bee shadi'ní'aah. Áádóó Jó'ab ádííniid, Ha'át'íí biniyé nídidíílwoł, shiye'. Jó, bik'é hane' díí'áłígíí ádin.

²³ Nidi Ahímeiyaz ání, Azhą́ ákót'ée nidi shíni'dii ákǫ́ǫ́ nídiishyeed, áko Jó'ab, Nílááh yílwoł, hałní. Áko Ahímeiyaz t'áá dzígaijí ahénálwodgo Kúshai dine'é nilínígíí yaa diilwod.

²⁴ Nít'éé' naakigo yah a'atiinígíí bita'gi David dah dzizdá, áádóó diné ha'asídígíí éí kin haal'á binaa ahéé'ítł'inígíí t'áá ałch'ishdę́ę́' yah a'atiinígíí bikáa'di tsé ha'naa niní'áhígíí bikáa'di dah náhást'áníjį' haayá, áádóó jidéé'į́į́', nít'éé' diné léi' t'áá sáhí yilwołgo jiiłtsą́.

²⁵ Áádóó ha'asídí hahoyííníi'go aláahgo naat'áanii yíká hadoolghaazh. Áko aláahgo naat'áanii ání, T'áá sáhí yilwołgo éí baa hane' hólǫ́ǫ doo. Áko t'áá ahánídę́ę́' yilwoł áádóó hat'áahjį' eelwod.

²⁶ Nít'éé' ha'asídí diné ła' náánáálwołgo yiyiiłtsą́ągo ch'é'étiin yaa áhályánígíí yił hoolne'go ííłní, Shoo, diné ła' náánáálwoł. Áádóó aláahgo naat'áanii ání, Éí ałdó' baa hane' hólǫ́ sha'shin.

²⁷ Áko ha'asídí ání, Baa nitsískeesgo alą́ąjį' yilwołígíí éí Zéídak biye' Ahímeiyaz nidzit'i'ígi át'éego yilwoł. Áádóó aláahgo naat'áanii ání, Éí lá éí diné yá'át'éehii át'į́ ni. Áko hane' yá'át'éehii yoo'áałgo át'į́.

²⁸ Nít'éé' Ahímeiyaz hahoyííníi'go aláahgo naat'áanii ííłní, T'áá ałtso yá'át'ééh. Áádóó ni'jį' aláahgo naat'áanii biyaajį' tsé'yaa jineeshjoolgo ábijiní, Bóhólníihii nihiDiyin God baa ha'niih le'; éí diné danilíinii bóhonishníihii aláahgo naat'áanii yich'į' anaa' danízin yę́ę ałtso doo ła' yidziihgóó áyiilaa.

²⁹ Áko aláahgo naat'áanii ádííniid, Da' diné ániid naagháii Ábsalam t'áadoósh ádzaaí da? Nít'éé' Ahímeiyaz bich'į' haadzíi'go Jó'ab éí aláahgo naat'áanii yá naal'a'í nilíinii dah yidiił'a' áádóó shí ałdó' ná naal'a'í nishłíinii dah shidiił'a' yę́ędą́ą́' t'óó báhádzidígi át'éego hahóó'áago łeezh dah oojołgo yiiłtsą́, nidi haa dahóót'įįd sha'shin éí doo shił bééhózin da.

³⁰ Áádóó aláahgo naat'áanii ábíłní, Nahjigo hidínáahgo nahjí yiizįįh. Áko nahjį' hizhdeeyáago áájí jiizį'.

³¹ Nít'éé' shoo, Kúshai dine'é nilíinii níyá áádóó Kúshai dine'é ání, Bóhonishníihii aláahgo naat'áanii hane' hólǫ́; jó, Bóhólníihii éí diné nik'ijį' nidaabaah nít'éé' yę́ę t'áá ałtso díí jį́ ná k'éidiidlaa.

³² Áádóó aláahgo naat'áanii éí Kúshai dine'é nilíinii áyidííniid, Da' diné ániid naagháii Ábsalam t'áadoósh ádzaaí da? Áko Kúshai dine'é hanáánáádzíi'go ádííniid, Bóhonishníihii aláahgo naat'áanii bi'ana'í danilíinii áádóó diné t'áá ałtso adadidoonih biniyé bik'ijį' danilínígíí éí diné ániid naagháii ábi'diilyaa yę́ęgi ádabi'dólne'.

³³ Nít'éé' aláahgo naat'áanii t'áá íiyisí bidiisnáa'go yah a'atiin bighą́ą'di haz'ą́ą́ góne' yah ííyáago yicha, áko ákóde yigáałgo ání, Aháláane', shiye' Ábsalam nílíinii, shiye', shiye' Ábsalam nílíinii, shígoyee' ná dadeestsaał nít'éé'; aháláane', Ábsalam shiye' nílíinii, shiye' nílíinii.