GENESIS 6 - Navajo Bible

Nihokáá' dine'é bibąąhági át'éii

¹ Nahasdzáán bikáa'gi diné t'óó ahayóí silį́į'go bitsi'ké nidahaazhchį́,

² áko Diyin God bits'ą́ą́dę́ę́' aye'ké danilíinii nihokáá' dine'é bitsi'ké dayiiłtsą́ągo bił danizhóní, áko t'áá bí deinízinígíí be'asdzą́ą́ ádayiilaa.

³ Áko Bóhólníihii ádííniid, ShiNíłch'i Diyinii doo t'áá áłahjį' nihokáá' dine'é náyookąąh da doo, háálá ats'íís k'ehgo nitsáhákees t'éí daznízin; azhą́ ákót'ée nidi kodóó neeznádiindóó ba'aan naadiin nihwéédahaháah doo.

⁴ Éí yoołkááł yę́ędą́ą́' nahasdzáán bikáa'gi yé'iitsoh dahólǫ́ǫ́ nít'éé', áádóó bik'ijį' Diyin God bits'ą́ą́dę́ę́' aye'ké danilíinii nihokáá' dine'é bitsi'ké yił ahaa dahaaskaigo ba'áłchíní dahazlį́į́'; éí ałk'idą́ą́' diné ayóó ádaat'éii índa ch'ídabi'dit'áahii danilį́į́ nít'éé'.

⁵ Áko Bóhólníihii éí doo yá'ádaashóonii ayóó át'éego bee nihokáa'gi tsi'adeesdee'go áádóó bił ádaat'íinii t'áá ałtso bijéí yee t'ááłáhígi át'éego bąąhági át'éii yaa nitsídaakeesgo yoo'į́.

⁶ Áko Bóhólníihii éí nihokáa'gi diné ájiilaaígíí bąąh háni', índa hajéí biyi'di t'áá íiyisí háni' yiyiił'a'.

⁷ Áko Bóhólníihii ádííniid, Diné áshłaaígíí shíni' neis'ą́; éí bąą diné áádóó naaldlooshii áádóó nidaa'na'ii índa nidaat'a'ii t'áá bił nahasdzáán bikáá' áhodeeshdįįł.

⁸ Nidi Bóhólníihii bibee ajooba' yee Nóah yich'ooné.

Nóah éí tsinaa'eeł áyiilaa

⁹ Díí Nóah ba'áłchíní náás da'ahílchíihii ádaat'é: Nóah éí diné t'áá ákogi át'éii nilį́, índa bíyoołkááłdą́ą́' t'áadoo bee bik'íhót'ahígóó Nóah éí Diyin God yił yi'ash.

¹⁰ Nóah haye'ké táá' há niheezhchį́: Shem áádóó Ham índa Jéífeth daolyé.

¹¹ Diyin God binááł éí nahasdzáán yíchxǫ'go bikáá'góó t'áá át'éé nít'éé' ádílááh nihinéést'e'.

¹² Diyin God éí nahasdzáán yiníł'į́įgo t'áá íiyisí yíchǫ' lá, háálá ats'íís k'ehgo yildahii nináneel'ą́ąjį' t'áá íiyisí nida'iisíihgo ádadoolchxǫ'.

¹³ Áko Diyin God éí Nóah áyidííniid, Ats'íís k'ehgo yildahii nináneel'ą́ąjį' bá nihonít'i' dooleeł, háálá nahasdzáán bikáá'góó hó hwee t'áá át'éé nít'éé' ádílááh nihinéést'e', áko k'ad nahasdzáán bikáa'gi áhodeeshdįįł.

¹⁴ Áko sáípres tsin bee tsinaa'eeł ádíílííł. Biyi' nidahwiisdzą́ągo ádíílííł, índa biyi'dę́ę́' áádóó bikáá'dę́ę́' łeejin dijé'ígíí bee dííjah.

¹⁵ Díí bik'ehgo ádíílííł: náásee dį́įdi neeznádiindóó ba'aan ashdladiindi ké siláago naaniigo tsosts'idiindóó ba'aan ashdladi ké siláago, índa dego éí dízdiindóó ba'aan ashdladi ké siláago ádíílííł.

¹⁶ Índa dego nineel'ą́ąjį' éí tsésǫ' t'ááłáhídi ké siláádóó ná'áłníi'go ahéédíítsih; tsinaa'eeł booshk'iizhjígo dáádílkałgo ádíílííł; ayaaígíí áádóó ata'giígíí áádóó adeígíí biyi' nidahwiisdzą́ągo ádíílííł.

¹⁷ Áko shí, t'áá shí shik'ehgo tó nahódoołkah; nahasdzáán bikáa'gi nídídzihii nináneel'ą́ąjį' t'áá bił yá biyaagi ádahodeeshdįįł, áko nahasdzáán bikáa'gi ts'ídá ałtso dadínóonééł.

¹⁸ Nidi ni t'éiyá bohoníłdzilgo nił ałhadi'deesht'ááł, áko tsinaa'eeł biih díínááł, ni áádóó niye'ké áádóó ne'asdzą́ą́ índa niye'ké bida'asdzą́ą́ ałdó', éí bił yah adííkah.

¹⁹ Áádóó bits'íís dahináanii nináneel'ą́ąjį' biką'ii índa bi'áadii naaki níláago tsinaa'eeł biih hidíí'ish, áko t'áá níighahgóó dahináago baa áhólyą́ą doo.

²⁰ Nidaat'a'ii ał'ąą ádaat'éii áádóó naaldlooshii ał'ąą ádaat'éii índa nihokáá' nidaa'na'ii t'áá ałtso ał'ąą ádaat'éii éí naaki níláago naa dahakáahgo dahináago íínísin dooleeł.

²¹ Ch'iyáán ał'ąą ádaat'éii t'áá ałtso áłah ádíílíiłgo yah ahidííyééł; éí nihich'iyą' áádóó dabich'iyą' doo.

²² Nóah díí bi'jiilaa; Diyin God áhodííniidígíí t'áá ałtso bi'jiilaa.