GENESIS 4 - Navajo Bible

Kéin áádóó Éíbel

¹ Áádóó Ádam hwe'asdzą́ą́ Íiv bił ałt'ajíí'áazhgo i'niiltsąądgo Kéin yishchį́, áko ázhdííniid, Bóhólníihii bits'ą́ą́dę́ę́' shiyáázh shee hazlį́į́'.

² Áádóó náábík'ijį' bitsilí Éíbel jishchį́. Éíbel éí dibé yaa áhályáanii silį́į́', nidi Kéin éí dá'ák'ehgi naalnishii silį́į́'.

³ Áádóó baa hoolzhiizhgo Kéin éí dá'ák'ehgi neest'áanii yiníjaa'ígíí Bóhólníihii yich'į' nááyiisnii'.

⁴ Áádóó Éíbel ałdó' hadibé áłtsé deishchíinii aláahgo łik'aii ła' jiníłtį́. Áko Éíbel áádóó náájiisnii'ígíí éí Bóhólníihii bił yílįįd,

⁵ nidi Kéin índa nááyiisnii'ígíí doo bił yílįįd da. Áko Kéin t'áá íiyisí báhóóchįįdgo hashké niidzį́į́' noos'níí'.

⁶ Áko Bóhólníihii éí Kéin áyidííniid, Ha'át'éegoshą' náhóóchįįdgo hashké nínídzin yínílnii'?

⁷ Yá'át'ééh íinidzaago nidí'nóodzįįł. Jó, doo yá'át'ééh íinidzaagóó éí bąąhági'át'éii nídin nilį́įgo ch'é'étiindę́ę́' naa héestį́, nidi bik'eh dídleeh.

⁸ Nít'éé' Kéin hatsilí Éíbel bił ałch'į' yájíłti', ákohgo dá'ák'ehgi Kéin bitsilí Éíbel yich'į' nídiidzáago yiyiisxį́.

⁹ Áko Bóhólníihii éí Kéin áyidííniid, Háájíshą' nitsilí Éíbel? Áko ázhdííniid, Doo shił bééhózin da. Shí hanii bitsilí yaa áhályáanii nishłį́?

¹⁰ Áko ání, Haashą' yínít'įįd? Nitsilí bidił biinéé' łeeshtahdę́ę́' shich'į' yicha.

¹¹ Nitsilí síníłhį́įgo bidił éí łeeh sinootseedígíí biniinaa nahasdzáán bits'ą́ąjį' hóyée'go ná ha'oodzíí'.

¹² Áko k'ad kodóó dá'ák'ehgi nanilnishgo doo lą'ígo na'níłt'ą' da doo; ni' bikáá'góó naníchée doo, índa t'áá áłahjį' naanáá'néeł doo.

¹³ Áko Kéin éí Bóhólníihii áyidííniid, Bee atíshiinilaaígíí ts'ídá doo bíínísh'hah da.

¹⁴ K'ad kéyah bits'ą́ąjį' hashinííníyood; ninii' bits'ąą nashidi'nil'in doo; nanishchée doo; ni' bikáá'góó t'áá áłahjį' naanáásh'néeł doo; t'áá shik'íníyáhígíí shidiyoołhééł, jó'akon.

¹⁵ Áko Bóhólníihii áhodííniid, Éí bąą t'áá Kéin jiisxínígíí tsosts'idi k'ééhodi'doolnííł. Áko Bóhólníihii éí Kéin bee hwééhózin dooleełii há áyiilaa, áko ła'da hak'íníyáago doo hodiyoołhéeł da.

¹⁶ Áádóó Kéin éí Bóhólníihii bits'ą́ąjigo dashdiiyáago Ííden kéyahdóó ha'a'aahjigo kéyah Náad hoolyéhígi kééhojit'į́.

Kéin bits'ą́ą́dóó adideezhchíinii

¹⁷ Nít'éé' Kéin hwe'asdzą́ą́ bił ałt'ajíí'áazhgo i'niiltsąądgo Íínak yishchį́, áádóó Kéin éí kin haal'áago ájiilaa, áko éí kin haal'áhígíí haye' Íínak bízhi' bee hojíízhi'.

¹⁸ Áádóó Íínak biye' éí Áírad wolyé, áádóó Áírad biye' éí Miihójeiyel, áádóó Miihójeiyel biye' éí Miithóseiyel índa Miithóseiyel biye' éí Léímek.

¹⁹ Áádóó Léímek ba'ákéí naaki: ła' Éídah wolyé, náánáła'ígíí Zílah wolyé.

²⁰ Áko Éídah biyáázh éí Jéíbal wolyé; éí níbaal yii' kéédahat'ínígíí índa bilį́į́' dahólóonii bizhé'é dzizlį́į́'.

²¹ Áádóó hatsilí éí Júbal wolyé; éí tsin tł'óół bąąh daneelzhee'go bee nida'a'néii índa tsin bee í'dílzoołí yee nidaanéhígíí bizhé'é dzizlį́į́'.

²² Zílah biyáázh éí Túbal-kéin wolyé; éí béésh łitsoii índa béésh nitł'izii bee t'áá ha'át'íhída ádaal'į́į doogo bínazh'niłtin, áádóó Túbal-kéin bideezhí éí Néíyamah wolyé.

²³ Léímek ha'ákéí ábijiní: Éídah áádóó Zílah, shizaad yínółts'ą́ą́'; Léímek ba'ákéí nohłínígíí, ádísh'nínígíí yínółts'ą́ą́', Háálá diné shijizhgishígíí biniinaa hoséłhį́, Índa diné ániid naagháii atíshijiilaaígíí biniinaa hoséłhį́.

²⁴ Ííshją́ą́ ła'da Kéin jiisxínígíí biniinaa tsosts'idi k'éébidi'doolníiłgo, T'áá aaníí ła'da Léímek jiisxínígíí biniinaa tsosts'idiindóó ba'aan tsosts'idi k'ééhodi'doolnííł.

Seth bits'ą́ą́dóó adideezhchíinii

²⁵ Áádóó Ádam hwe'asdzą́ą́ bił ałt'anáájoot'áazhgo biyáázh yishchį́įgo éí Seth yee yiyíízhi', háálá ájíní, Éíbel éí Kéin hwiisxį́įgo bąą hatsásk'ehgi Diyin God éí shiyáázh ła' shaa náánéíltį́.

²⁶ Áádóó Seth ałdó' haye' há yizhchį́; éí Íínas bee jíízhi'. Áádóó índa nihokáá' dine'é éí Bóhólníihii dayózhíigo yich'į' sodadilzingo hodideeshzhiizh.