Mintiro Ya Vapostola 26 - Testamente Ledrimpswha ni Mapsalma

Pawulosi abeka mhaka yake ku Agripa

¹ Kolahu Agripa ahangaku, ku Pawulosi: Wapfumeleliwa a kutiyangulela. Kutani Pawulosi analavuta voko, atiyangulela aku:

² Atimhakeni hinkwatu leti nirambeliwaka ha tone hi va-Yuda, we hosi Agripa, nili nikatekile namuhla, leswi nifanelaka kutiyangulela amahlweni kwaku;

³ hikusa uswitivisisa ngopfu a swihila swa va-Yuda, ni makanetanela hinkwawu lawa manga makari kwavu; hi leswo-ke nakukombela leswaku uniyingiseta hi kulehisa mbilu.

⁴ Hi tlhelo dra vutomi byanga, leswi nihanyisiki xi swone kusukela a vutrongwanini, a Yerusalema, ni le tikweni dra le kweru hinkwadru, hinkwavu va-Yuda vaswitiva.

⁵ Vanitiva, kusukela khale, ni loko vaswidjula vangahamba vumboni, leswaku nahanyi hi dondro leyi ya kunonon'hwa kutlula hinkwawu avukhongotweni byeru, nihanyiki swanga mufarisi.

⁶ Kutani swoswi, nayavanyisiwa hinkonta ya kulavisela a xidumbiso, lexi a vatatana veru vangadumbisiwa xone hi Xikwembu Nkulukumba.

⁷ Hikola ka xidumbiso lexo, a tinxaka teru ta khume na tibiri titiyisaka a kutirela Xikwembu Nkulukumba, vusiku ni nhlikanhi. I hinkonta ya kudumba loko, we hosi Agripa, nirambeliwaka hi va-Yuda.

⁸ Xana hayini n'wiyanakanya leswaku aswipfumeleki leswaku Xikwembu Nkulukumba angapfuxa a vafi?

⁹ Loko ali mine, kunene afa nipimisa leswaku afa nifanela kuyentxa hinkwaswu leswi swikotekaka kulwa ni ritu dra Yesu wa le Nazarete.

¹⁰ Hi leswi ningayentxa swone a Yerusalema. Na nipfumeleliwile hi vaprista lava vakulu, nipfaleli vahlawuleki vanyingi abohelweni. Ni loko vadlayiwa, afa nipfumela hi ritu dranga.

¹¹ Amasinagogeni hinkwawu, ni vaxanisi ha kanyingi, nivasindrisa akuva vasandra vupfumeli byavu. Nivahlundrukela ngopfu, nivahlongola kuyatlhasa mitini ya va-Matiko.

¹² Hi swoleswi afaka niyela swone Damaseka, na nipfumeleliwi niva ninyikiwa ntamu hi vaprista lava vakulu.

¹³ Hi nkama wa nhlikanhi, na nahali ndleleni, we hosi, nivona kuvaninga loku kupfaka tilweni, loku kutlulaka kuphatima ka dambu, kunitrandrela mine, ni lava afaka vafamba na mine.

¹⁴ Hitiki hiwa hansi hinkweru, niyingela a ritu ledri driliki ku mine hi lidrimi dra Xiheberu: Saulo, Saulo! Xana unixanisela yini? Swanonon'hwa ku wene a kulwa ni ntrhombo

¹⁵ Kolahu mine nivutisi niku: Hi wene mani, wene Hosi? A HOSI yiyangula yiku: Hi mine Yesu, lweyi umuxanisaka!

¹⁶ Kambe sekeleka uyima hi minenge yaku, hikusa nitivonekisi ku wene akuva nikubeka uva mutireli ni mboni ya leswi uswivoniki ku mine, ni leswi nahataka tivonekisa ku wene ha swone,

¹⁷ na nikuhuluxa ku va tiko ni le ku va-Matiko, lava nitakakuruma ku vone swoswi;

¹⁸ akuva uyapfula mahlu yavu, vatasuka amunyameni vata alivaningweni, vatasuka antan'wini wa Sathana, vata ku Xikwembu Nkulukumba. Kolahu, ntrhaku ka kuvani kupfumela ku mine, vatayamukela a kudrivaleliwa ka swidoho swavu, ni kuda pfindla kun'we ni lava vaxwengisiwiki hi kupfumela ku mine.

¹⁹ Hileswo-ke, we hosi Agripa, anahayalanga ku xivoniso xa Tilo,

²⁰ kambe nirerela a ritu kusungula ku va-le-Damaseka, ni va-le-Yerusalema, ni tiko hinkwadru dra Yudeya, ni ku va-Matiko, akuva vandruluka, vatlhelela ku Xikwembu Nkulukumba, vatira a mintiro leyi mikombisaka kundruluka.

²¹ Hikola ka leswo, a va-Yuda vanikhomiki a Tempeleni, vadringisa kunidlaya.

²² Kambe leswi ningakuma kupfuniwa hi Xikwembu Nkulukumba, nahali kone ni namuhla, nihamba vumboni ni le ku lava vatrongo ni lava vakulu. Ningahlayi ntxhumu ahandle ka leswi a vaprofeta na Moxe vangahlaya leswaku switayentxeka.

²³ Leswaku Kriste afa afanekeli kuxaniseka, ava lweyi wa kuranga a kupfuka kufeni, atadrungulela a livaningo ku va tiko ledri ni ku va-Matiko.

²⁴ Aku na ahahlaya leswo akuva atiyangulela, Festu amutremakanya hi ritu ledri drikulu: Pawulosi, uhungukile! A vutivi byaku byikulu byikundruluti singe!

²⁵ Pawulosi aku: Anihungukanga, we Festu, mufumi wa kutxhaviseka. Kambe nikuhlaya a maritu ya xihlayelamfuri ni ya vutlhari.

²⁶ Hikusa awaswitiva hinkwaswu a mufumi, lweyi nikhanelaka hi kutiyisela amahlweni kwake, hikusa nakholwisisa leswaku ni mun'we ku mintxhumu leyi mifihlekile ku yene, hikuva akuna ntxumu wuyentxiwiki axihundleni.

²⁷ Mufumi Agripa, xana wapfumela ku vaprofeta? Naswitivisisa leswaku wapfumela!

²⁸ Kolahu Agripa aku ku Pawulosi: Hi kutrongo ukusuhi ni kunikholwisa niva mukriste!

²⁹ Pawulosi ayangula aku: Kutrongo, kumbe ngopfu, anikhongota ku Xikwembu Nkulukumba leswaku angavi wene ntsena, kambe vava hinkwavu lava vaniyingelaka namuhla, vava swanga ha mine, hi matlhelo hinkwawu, handle ka mapindra lawa.

³⁰ A mufumi wa tiko, ni mufumi wa xifundra, na Berenise ni lava afaka vatrhamisi navu vasekeleka,

³¹ vasuka, vayakhanela hi tlhelo vaku: A nuna lweyi angayentxanga ntxhumu wufanekelaka leswaku adlayiwa, kumbe kubohiwa.

³² Kolahu Agripa aku ku Festu: A nuna lweyi afa swingakoteka kuntrhunxiwa, loko afa anga kombelanga ku yavanyisiwa ha Khezari.