Mintiro Ya Vapostola 24 - Testamente Ledrimpswha ni Mapsalma

Pawulosi atiyangulela mahlweni ka Felikisi

¹ Ntrhaku ka ntlhanu wa masiku, Ananiya, muprista lwenkulu aya Khezareya, kun'we ni van'we ku vakulu va tiko, na mun'we wa mukhaneli valiki i Tertulo, vayakombisa a swakurambela Pawulosi amahlweni ka hosi.

² Atiki avitaniwa, Tertulo asungula kumurambela aku: Leswi hikumiki kurula loku kukulu ha wene, ni leswi a mayentxela lawa ya kululama mahumexeliwiki tiko ledri hi vutlhari byaku,

³ hi tindlela hinkwatu, ni hi minkama hinkwayu, hiswiyamukela, na hitlangelile ngopfu swinene, we mutxhaviseki Felikisi.

⁴ Kambe, akuva ningakukhomi hikukuhetela a nkama, nakukhongota leswaku uyingela hi vumbilu byaku a maritunyana yeru.

⁵ Hi kumile leswaku a nuna lweyi i ntungu. Apfuxa madzolonga amakari ka va-Yuda lava vanga misaveni hinkwayu, mfuri i mufambisi wa dondronyana yimpswha ya va-Nazarete.

⁶ Adringisiki ni kunyamisa Tempele, kutani himukhoma, [hi djula kumuyavanyisa hi kulandra a nawu weru.

⁷ Kambe kuhumeleli ndruna Lisiya, atatamuwutla hi ntamu amavokweni yeru,

⁸ hi kuhlaya leswaku lava vamurambelaka vafaneli kuta ku wene.] Na wene, loko utamuvutisa, utaswitiva hinkwaswu leswi himurambelaka ha swone.

⁹ A va-Yuda van'wana na vone vayima ni mukhaneli, vatiyisa leswaku hi swone leswo hinkwaswu.

¹⁰ Pawulosi, kuti loko a hosi amukwehletela akuva avulavula, ayangula aku: Leswi nitivaka leswaku uvi mutremi wa tiko ledri hi malembe ya kuhlawa, nitiyangulela hi kudumba loku kuhundrisaka,

¹¹ hikusa ungaswitiva leswaku, amasinahundra khume dra masiku na mabiri na nintlhantukeli Yerusalema akuva niyagandrela.

¹² Avanikumanga a Tempeleni na nikanetana ni mhunu, kumbe ni hlengeleti vhanu, nipfuxa dzolonga, amasinagogeni, nambi ku mbangu wun'wana amutini,

¹³ mfuri a vhanu lava avana kuswikota a kutiyisa ku wene leswi vanirambelaka ha swone swoswi.

¹⁴ Kambe nitatihlayela leswi ku wene: Mine nitirela Xikwembu Nkulukumba wa vatatana veru hi kulandra Ndlela leyi yimpswha, leyi valiki i dondronyana ya kuhambuka, na nipfumelaka ku hinkwaswu leswi swifambelanaka ni Nawu (wa Moxe), swikumekaka ni le ku vaprofeta,

¹⁵ ningani kulavisela loku na vone vanganaku, ku Xikwembu Nkulukumba, ka leswaku ku tava ni kupfuka ka hinkwavu a va kufa, valulami swanga hi lava vamfani.

¹⁶ Hileswo-ke na mine nikhinyela minkama hinkwayu kuva ni lipfalu ledri dribasiki, amahlweni ka Xikwembu Nkulukumba ni le ku vhanu.

¹⁷ Kuhundriki malembe manyingi, nibuyeli, kubuyisa a swihanano ku tiko dra kweru ni kutatahamba a timhamba.

¹⁸ Avi nkameni wolowo vanikumiki na nitibasisile a Tempeleni, na ningena xitrhungu, mfuri ningena pongwe.

¹⁹ Kone afa kuni van'we va va-Yuda va kupfa hi le Aziya, lava aswifanekeli kuva ali lana ku wene, akuva vanirambela, loko vani mhaka ku mine.

²⁰ Kumbe avahlayi ni volava, a nandru lowu vawukumiki ku mine, loko ni yimisiwi amahlweni ka Huvu,

²¹ loko dringali ritu drin'we, ledri ningahuwelela loko ni yimisiwi amakari kwavu, ledri dra ku: Niyavanyisiwa amahlweni kwenu namuhla hinkonta ya kupfumela ka kupfuka ka vafi.

²² Kolahu Felikisi, leswi ativisisiki swinene a dondro leyi ya Ndlela ya Hosi avatlhelisa aku: Loko Lisiya, lweyi wa ndruna, atava atlhasile, nitakambisisa a timhaka tenu.

²³ Felikisi aleleta a ndruna ya dzana leswaku Pawulosi abekiwa bohelweni, kambe alondrisiwa ha hombe, ni kupfumeleliwa leswaku ayamukela a wupfunu bya va makwavu.

Pawulosi a bohelweni

²⁴ Loko kuhundri masikunyana, Felikisi atlhasa ni nkatakwe Durusila, lweyi afaka ali mu-Yuda, avitana Pawulosi amuyingela ahlaya swakupfumela ku Yesu Kriste.

²⁵ Kambe loko Pawulosi aha mudrungulela swa vululami, kutikhoma, ni kuyavanyisa loku kutaka, Felikisi asungula kururumela, abyela Pawulosi aku: Tifambele kutani. Nitatlhela nikuvitana na kone, loko nikumi nkama.

²⁶ Felikisi afa kambe alavisela leswaku Pawulosi atamunyika mali, hi laha-ke afaka amuvitana ha kanyingi, vakhanela kun'we.

²⁷ Kuku kuhundra malembe mabiri, Porkiyu Festu abekiwa mufuni matrhan'wini ya Felikisi. Kambe Felikisi leswi afaka adjula a kuseketeliwa hi va-Yuda, atrika Pawulosi a kubohiweni.