Mintiro Ya Vapostola 23 - Testamente Ledrimpswha ni Mapsalma

¹ Kolahu Pawulosi apondrolela a swiro swa Huvu, aku: Vavanuna, vamakweru! Mine nihanyi hi lipfalu dra kululama hinkwaku amahlweni ka Xikwembu Nkulukumba kutlhasa siku dra namuhla.

² Kutani Ananiya, a muprista lwenkulu aleleta lava vayimiki kusuhi na yene leswaku vamuba nomu.

³ Kolahu Pawulosi aku ku yene: Xikwembu Nkulukumba atakuba, wene, khumbi dra ntlhohe! Hikusa wene utrhamiseli kutrema mhaka yanga hi nawu, uva uleleta leswaku nibiwa, utlula nawu?

⁴ Kambe lava afaka vali kusuhi vaku: Xana uruka muprista lwenkulu wa Xikwembu Nkulukumba?

⁵ Pawulosi ayangula aku: Vamakweru, afa ningaswitivi leswaku i muprista lwenkulu hikusa kutraliwi leswaku: Ungavihlaya kubiha hi mufambisi wa tiko dra kwenu.

⁶ Pawulosi, loko ativi leswaku van'we i vasaduki, van'wana i vafarisi, abandlukana ahubyini aku: Vavanuna, vamakweru, ni mufarisi, n'wana wa vafarisi. Nitengisiwa hinkonta ya kudumba ni ya kupfuxiwa ka vafi!

⁷ Loko ahlayi leswo, kupfuka kukanetana amakari ka vafarisi ni vasaduki, a xitrhungu xitravukana.

⁸ Hikusa a vasaduki vali akuna kupfuka ka vafi, nambi swirun'wa, nambi moya, kasi a vafarisi vapfumela hinkwaswu leswo.

⁹ Kahangavani pongwe drikulu. Van'we va vatrali va tlhelo dra vafarisi vasekeleka, vatiyisa hi ntamu vaku: Ahikumi ntxhumu xa kubiha ku nuna lweyi; angava moya, kumbe a xirumiwa, xivulavuliki na yene xana?

¹⁰ Kutiki kupfuka kukanetana kukulu, a ndruna yikulu yisungula kutxhava leswaku Pawulosi atahahluleliwa ha vone, yileleta a masotxha akuva mafulamela mayamuwutla amakari kwavu, mamuyisa khokholweni.

¹¹ Kambe hi vusiku lebyi byilandrelaka, a Hosi yihumelela ku Pawulosi yiku ku yene: Tiyisela! Swanga hi leswi unibekeliki vumboni lani Yerusalema, kudjuleki uyanibekela vumboni ni le Roma.

Makungu ya kudlaya Pawulosi

¹² Loko byixa, va-Yuda vakukari vahlengeletana, vahamba rengu, vatiboha hi kufunga, leswaku vangatida, mfuri vangatinwa, loko vangasinadlaya Pawulosi.

¹³ Lava afaka vayentxi a rengu ledro, afa vatlula mune wa makume.

¹⁴ Volavo, vaya ku vaprista lava vakulu ni vakulu va tiko, vaku: Hi tibohi hi kufunga leswaku hingatida ntxhumu loko hingasinadlaya Pawulosi.

¹⁵ N'wine-ke, byelani a ndruna leyi yikulu kun'we ni Huvu leswaku yimufulameta ku n'wine, swanga hi loko n'widjula kutlhela n'wivutisisa swinene a timhaka takwe. Hine-ke hitatibekisela a kumudlaya na angasinatlhasa ku n'wine.

¹⁶ Kambe, loko a mupswhana wa Pawulosi ativi rengu ledro, ayi khokholweni ayativisa Pawulosi.

¹⁷ Kolahu Pawulosi ahangavitana yin'we ku tindruna ta dzana, aku ku yone: Teka a ndrisanyana lweyi umuyisa ku ndruna leyi yikulu, ani mhaka akuva ayamutivisa.

¹⁸ A ndruna ya dzana yiteka a ndrisanyana yimuyisa ku ndruna leyi yikulu yiku: A mubohiwa, Pawulosi anivitani, akombela leswaku nitisa a ndrisanyana lweyi ku wene, angani mhaka akuva akubyela.

¹⁹ Kutani a ndruna leyi yikulu yiteka a ndrisanyana hi voko, yi huma na yene, vone wuswavu yimuvutisa yiku: I mhaka muni leyi udjulaka kunibyela yone xana?

²⁰ A ndrisanyana amubyela aku: A va-Yuda vatlhangani akuva vakombela ku wene leswaku ufulameta Pawulosi ku Huvu swanga hi loko vadjula kutlhela vavutisisa timhaka takwe vaheta.

²¹ Wene-ke ungakholwisiwi ha vone, hikusa amakari kwavu kuni vavanuna va tlulaka mune wa makume vatumbeleliki Pawulosi, akuva vamudlaya. Vatibohi hinkwavu hi kufunga, leswaku vangatida, vangatinwa, loko vangamudlayanga. Mfuri swoswi vatibekiselile, vahalavisela kupfumeleliwa ha wene.

²² Kolahu, a ndruna yikulu yimukisa a ndrisanyana lweyo, yimuleleta yiku: Ungabyeli mhunu a timhaka leti unitivisiki.

Pawulosi ayisiwa Khezareya

²³ Kutani a ndruna yikulu yivitana a tindruna ta dzana tibiri yiku: Hlomisani madzana mabiri (200) ya masotxha, matafamba hi nkama wa vuraru wa vusiku (21h00), maya Khezareya, na ntlhanu na mabiri wa makume (70) ya lava va mahanxi, na madzana mabiri (200) ya lava va kutamela matlhari.

²⁴ N'wibekisa ni mahanxi, vatakhandriyisa Pawulosi, vamutlhasisa swinene ku hosi Felikisi.

²⁵ Yitrala ni papela drini mahlayela lawa:

²⁶ Klaudiyu Lisiyasi, ku Felikisi, hosi lweyi atxhavisekaka, xawani!

²⁷ A nuna lweyo akhomiwi hi va-Yuda, afaka ali kusuhi ni kudlayiwa ha vone, laha nitlhasiki ni masotxha, nimususa ku vone, hikuva niyingeliki leswaku i mu-Roma.

²⁸ Hi kudjula a kutiva a mhaka leyi vamurambelaka ha yone, namufulameti ku Huvu yavu.

²⁹ Nikuma leswaku arambeliwa hi timhaka ta kukanetana ta nawu wavu. Kambe angavanga na nandru wa kuva afanekeli kufa ha wone, kumbe kubohiwa.

³⁰ Ntrhaku nitivisiwa leswaku vatadjuletela a nuna lweyo akuva vamudlaya, kutani nihatla nimutisa ku wene, na nileleti lava vamurambelaka kutatatrhandra mhaka yake amahlweni kwaku.

³¹ Kolahu, a masotxha mahangateka Pawulosi, swanga hi leswi maleletisiwiki xiswone, mamutlhasisa amutini wa Antipatrisi ni vusiku.

³² Byiku byaxa, a masotxha masiya lava va mahanxi vafamba na Pawulosi, amutini wa khezariya wone matlhela.

³³ Loko vayatlhasa kone, vanyika hosi a papela, vamunyiketa na Pawulosi.

³⁴ A mufumi atiki ahlaya a papela, amuvutisa a xifundra lexi angawa le ku xone. Atiki ayingela leswaku i wa le Kilikiya,

³⁵ aku: Nitakuyingela loko lava vakurambelaka vatlhasile. Aleleta leswaku abekiwa andlwini ya vufumi bya Heroda.