Mintiro Ya Vapostola 19 - Testamente Ledrimpswha ni Mapsalma

Pawulosi a Efesa

¹ Loko Apolo ahali Korinto, Pawulosi atremakanyi matiko ya tinhava, atlhasa Efesa. Akumiki kone a vadondrisiwa vakuhlawanyana,

² kutani avavutisa aku: Xana n'wayamukelile a Moya wa Kuxwenga loko n'wipfumelile? Vaku ku yene: Ahingiswiyingela leswaku kuni Moya wa Kuxwenga!

³ Pawulosi avavutisa na kone aku: Ke i babatiso drini n'wibabatisiwiki ku drone? Vayangula vaku: I babatiso dra Yohana.

⁴ Kolahu Pawulosi aku ku vone: A babatiso dra Yohana afa drili dra kutisola, na abyela vhanu leswaku avapfumele ku lweyi ataka ntrhaku kwake, anga Yesu.

⁵ Ntrhaku ka kuyingela leswo, vahanga babatisiwa avitweni dra Hosi Yesu.

⁶ Kutani loko Pawulosi ava ntlhanteka mavoko, a Moya wa Kuxwenga wuxikela henhla kwavu, vahanga khanela hi tindrimi timbeni ni kuprofeta.

⁷ A vavanuna lavo hinkwavu afa vali khume na vabiri.

⁸ Pawulosi ke afa aya asinagogeni, adondrisa hi xixixi ha tihweti tiraru, a khanela, akholwisa vhanu hi timhaka ta Mfumu wa Xikwembu Nkulukumba.

⁹ Kambe leswi van'we ku vone afaka vatinonon'hwisa, vangapfumeli, na vahlaya kubiha hi ndlela ya Hosi amahlweni ka xitrhungu, Pawulosi atravukani navu, ahlawula a vadondrisiwa, adondrisa masiku hinkwawu a xikolweni xa Tiranu.

¹⁰ Aswiyentxisa xiswoswo ha malembe mabiri, lakakuva hinkwavu avayaki va Aziya vayingela a ritu dra Hosi: Va-Yuda ni va-Girika.

¹¹ Na swone, Xikwembu Nkulukumba afa ayentxa mahlolana makulu hi mavoko ya Pawulosi,

¹² lakakuva vabeka ni le henhla ka timbabyi a makapulana ni minturu yake, kutani a mavabyi yavu masuka, na yone mimoya leyi minfani mihuma ku vone.

¹³ Kolahu van'we va va-Yuda, afaka vafamba-famba, na vali vahlongoli va mimoya leyi mimfani, vadringisa kuvitanela a vito dra Hosi Yesu ahenhla ka va mimoya leyi mimfani, na vaku: Han'wileleta hi vito dra Yesu, lweyi Pawulosi amutivisaka, humani!

¹⁴ Lava afaka vayentxa leswo, afa vali vana van'we va ntlhanu na vabiri va muprista lwenkulu Skeva.

¹⁵ Kambe a moya lowu mfani wuvayangula wuku: Yesu, namutiva, na yene Pawulosi namutiva. Kutani n'wine-ke, n'wi va mani xana?

¹⁶ Kolahu a mhunu lweyi a moya lowu mfani afaka wuli ku yene, avawela henhla, avahlula hi ntamu lowukulu, akhoma vabiri avaxanisa hi ntamu, lakakuva vahuma andlwini leyo, na vangayambalanga ntxhumu, vatrutruma na vatali hi timbanga.

¹⁷ A mhaka leyo yitibyiwa hi hinkwavu, va-Yuda ni va-Girika lava vayakiki Efesa, vakhomiwa hi kutxhava; kutani a vito dra Hosi Yesu afa drikulisiwa.

¹⁸ Vanyingi lava vapfumeliki ku Hosi vata, vatatatihlaya livaleni, vatitrhandra a mintiro yavu.

¹⁹ Ni vanyingi lava vatiriki swa vungoma, vabuyisa mabuku yavu matatahisiwa amahlweni ka hinkwavu. Loko kuhlayiwa nxavu wa wone, vakuma wudringana ntlhanu wa makume ya makume ya madzana ya madenari (50.000).

²⁰ Hi swoswo, a ritu dra Hosi driyandra dritiyisiwa hi ntamu.

Dzolonga a Efesa

²¹ Ku ti loko timhaka leto tiyentxekile Pawulosi atihambela a kungu dra kuya a Yerusalema na atremakanya hi Makedoniya na Akaya; afa aku: Ntrhaku ka kuya Yerusalema, nifanekela nakone a kuyavona a Roma.

²² Loko arumeli a Makedoniya vabiri va vapfuni vakwe: Timotewu na Erasto, yene ahlwelili nkama wa kulehanyana a Aziya.

²³ Hi minkama yoleyo, kuhumelela dzolonga drikulu hinkonta ya Ndlela ya Hosi.

²⁴ Hikusa mun'we, a vito drakwe anga Demetriyo, mufuli wa silivhela, afaka ahamba hi silivhela a mimbangu ya kubeka kone a swivumbiwa atempeleni dra Artemisi, afa akumela bindru drikulu a vafuli va silivhela.

²⁵ Avahlengeleta kun'we ni vatiri kulobye, aku: Vavanuna, n'waswitiva leswaku akufuya kweru kupfa antirweni wolowu,

²⁶ na kone, n'waswivona, ni kuswiyingela leswaku ahi le Efesa ntsena, kambe hi Aziya hinkwaku, Pawulosi yelweyo akholwisa vhanu vanyingi, avandruluta hi kuhlaya leswaku, a swikwembu leswi swiyentxiwaka hi mavoko ya vhanu ahi swikwembu.

²⁷ Ke ahi ntsena ntiro weru lowu wunga khombyeni dra kudreliwa, kambe na drone a tempele dra xikwembu xeru Artemisi dritahlayiwa leswaku ahi dra ntxhumu; a vukulu bya lweyi atxhaviwaka hi tiko hinkwadru dra Aziya ni misava hinkwayu, byitadjula kuhelela mfuri.

²⁸ Loko vayingeli maritu lawa vatala hi kuhlundruka vabandlukana vaku: I nkulu Artemisi wa va-Efesa!

²⁹ A muti hinkwawu wuvani nkitrinkitri; mfuri vatrutrumela ndlwini ya mintlangu, na vakhomi Gayo na Aristariko va-Makedoniya, vayendrikulobye va Pawulosi.

³⁰ Pawulosi afa adjula kuyatikombisa amahlweni ka nhlengeletanu, a vadondrisiwa vangamupfumeleli.

³¹ Na tone tindruna tin'we ta le Aziya leti afaka tili vanghanu va Pawulosi, timurumela ku yene, a maritu ya kumutratriya akuva angatinyikeli andlwini ya mintlangu.

³² Hikolahu-ke kusungula a mpfilu-mpfilu, van'we vabandlukana hi ndlela yin'we, avan'wana hi ndlela yimbeni. Vanyingi ku vone afa vangaswitivi ni leswi vahlengeletaneliki swone!

³³ Van'we afa vasusumetela Alexandre, na va-Yuda vamuyisa amahlweni ka nhlengeletanu, kambe yene akwehleta hi voko, akombela kuhlaya ntxhumu ku xitrhungu.

³⁴ Kambe vone vatiki va vona leswaku i mu-Yuda, vabandlukana hi xipimu xa minkama mibiri (02h00), vaku: I nkulu Artemisi wa va-Efesa!

³⁵ Lweyi wa mutrali wa muti amiyeta a xitrhungu, aku: Vavanuna va-le-Efesa, xana hi wini a mhunu lweyi wa kuka angativi leswaku a muti wa Efesa hi wone mubekisi wa tempele dra Artemisi lweyi anga nkulu, ni xifaniso lexi xiwiki hi le tilweni, xana?

³⁶ Leswi a timhaka leti tingakanetiwiki, rulani, n'wingayentxi ntxhumu hi magugu.

³⁷ Hikusa a vhanu lava, n'wivatisi na vanga nyamisanga tempele nambi kusandra a xikwembu xeru.

³⁸ Ke, loko Demetriyo ni switiri leswi swinga na yene valinimhaka ya kutengisa mhunu, ma kone masiku ya ku khanela, ni vafuminyana va kone, avarambelani vone vuswavu.

³⁹ Loko n'witengisana hi tin'wana timhaka, titatremiwa nhlengeletanwini hi nawu.

⁴⁰ Hikusa hingatxhuka hirambeliwa hinkonta ya pongwe dra namuhla, leswi kungeke na mhaka leyi hingahlayaka yone hinkonta ya nhlengeletanu leyi.

⁴¹ Loko ahlayi leswo, ahangalasa nhlengeletanu.