Mintiro Ya Vapostola 14 - Testamente Ledrimpswha ni Mapsalma

Pawulosi na Barnabasi a Ikoniya

¹ A mutini wa Ikoniya, Pawulosi na Barnabasi vanhingeni kun'we asinagogeni dra xi-Yuda, kutani vakhanela hi la kakuva a vhanu vanyingi vapfumela: Va-Yuda ni va-Girika.

² Kambe a va-Yuda lava vangapfumelangakiki vapfuxa mona ku va-Matiko ni kuvahlohlotela akuva vahlundrukela a vamakwavu lava vapfumeliki.

³ Kambe a vapostola vahangatrhama kone nkama wa kuleha, na vakhanela hi ntamu a Hosini. A Hosi afa yiseketela a ritu dra timpswalu ta Yone, yivanyika akuva hi mavoko yavu, kuyentxeka a swikombisu ni mahlolana.

⁴ A vhanu va muti afa vayavani hi le makari. Van'we afa vayima ni va-Yuda, van'wana vayima ni vapostola.

⁵ Ke leswi afaka kuhumeleli dzolonga dra va-Matiko ni va-Yuda, kun'we ni vakulu vavu, akuva vaxanisa a vapostola ni kuvakhandla hi maribye,

⁶ loko vone vaswitivile, vatrutrumela mitini ya Listra na Derbe, ni le mitini ya Likawoniya ni ya le matlhelweni ya kone,

⁷ lomu na kone afaka vahaxa a Ivangeli.

Kuhanyisiwa ka wa kukhuta a Listra

⁸ A Listra afa kutrhamisa mun'we wa wanuna wa kukhuta, afaka alamali minenge kusukela loko ahumi akhurini dra mamana wakwe, lweyi afaka angasami afamba.

⁹ A wanuna lweyo ayingeli kukhanela ka Pawulosi, lweyi amulavisisiki swinene, amuvona leswaku yene ani kupfumela kakuva angahanyisiwa,

¹⁰ kutani aku ku yene hi ritu ledri drikulu: Sekeleka uyima, uwololoka! Kutani atlula, asungula kufamba.

¹¹ Loko kuvoniwi leswi switiriwiki hi Pawulosi, a vhanu vabandlukana vahlaya hi lidrimi dra Likawoniya, vaku: I swikwembu swihiyendreliki hi swivumbeko swa vhanu!

¹² Kutani Barnabasi vamutxhula Zewusi, Pawulosi vamutxhula Hermesi, hikusa hi yene afaka arangela a ntiro wa ritu.

¹³ A muhahli wa Zewusi, lweyi afaka a tempele drakwe drili mahlwini ka muti, abuyisa matruna mabiri ya tihomu lawa mangani tihara ta swiluva anyangweni ya muti, adjula kuvatlhavela mhamba kun'we ni switrhungu.

¹⁴ Kambe loko a vapostola Barnabasi na Pawulosi vayingeli leswo, vahandrula swiyambalu swavu, xikombiso xa kuhlundruka, vatitxukumeta amakari ka switrhungu, vabandlukana vaku:

¹⁵ Vavanuna va-le-kweru! Xana n'wiyentxela yini leswo? Na hine hi vhanu ntsena lava vanga ha n'wine hi ntumbuluku. Hin'witivisa a Ivangeli, akuva n'witrika a mintxhumu ya kuka-ndlela, n'windrulukela ku Xikwembu Nkulukumba lweyi ahanyaka, lweyi angahamba a tilo ni misava ni likhulu, ni hinkwaswu leswi swinga ku swone,

¹⁶ Lweyi aminkameni leyi mihundriki apfumeleliki leswaku a matiko hinkwawu matifambela drin'wana ni drin'wana hi ndlela ya drone,

¹⁷ nambi swili tanu angabyipfumalanga vumboni ku vone hi kuyentxa leswi swinene, an'winyika timpfula ni tinguva ta mihandru, an'wiyandrisela swakuda ava atata timbilu tenu hi kunyoxa.

¹⁸ Nambi loko vavabyeli leswo, aswivanabyalelanga a kusivela leswaku a tiko drivatlhavela swihari swakuvadrumisa.

Pawulosi akhandliwa hi maribye

¹⁹ Kolahu kutlhasi va-Yuda vapfa hi le Antiyokiya ni le Ikoniya, vakholwisa switrhungu a kukhandla Pawulosi hi maribye, vamukokela handle ka muti, na vapimisa leswaku afile.

²⁰ Kambe, loko a vakriste vamutrandrelile yene apfuka, anhingena mutini. A siku ledri ntlhantamaka, Pawulosi na Barnabasi vaya Derbe.

Kutlhelela Antiyokiya wa Siriya

²¹ Ntrhaku ka kurera a Ivangeli amutini wa Derbe, na vakoti kuyentxa vapfumeli vanyingi, vatlhelela a Listra, ni le Ikoniya ni le Antiyokiya,

²² lomu vatiyisiki vapfumeli, ni kuvaleleta leswaku vaya mahlweni vatiyisela kupfumeleni, ni kuvadondrisa leswaku hikola ka mahlomulu lawa manyingi, swifaneli hinhingena a Mfun'wini wa Xikwembu Nkulukumba.

²³ Na swone vahlawuli vakulu akerekeni drin'wana ni drin'wana. Ntrhaku ka kukhongota ni hi kutitrona swakuda, vakombeli akuva vaxireleliwa hi Hosi leyi vabekiki ku yone vupfumeli byavu.

²⁴ Kutani na vatremakanyi hi dra Pisidiya, vayitlhasa a Pamfiliya.

²⁵ Loko vareri a ritu dra Xikwembu Nkulukumba a Perga, vafulameli ku dra Ataliya;

²⁶ kutani vasuka kone vawelela a Antiyokiya, lomu afaka vabekiwi atimpswalwini ta Xikwembu Nkulukumba akuva vakhoma a ntiro lowu afaka vawuhetile.

²⁷ Loko vatlhasi Antiyokiya vahlengeleti swiro swa Kereke, kutani vaswidrungulela hinkwaswu leswi Xikwembu Nkulukumba aswiyentxiki ha vone, ni hi laha apfuleliki va-Matiko a swipfalu swa vupfumeli.

²⁸ Kutani Pawulosi na Barnabasi vatrhami kone nkama vunyingi ni vamakwavu.