Marka 16 - Testamente Ledrimpswha ni Mapsalma

Kupfuka ka Yesu akufeni

¹ Ntrhaku ka savata, Maria Madalena, na Maria mamana wa Yakobe, na Salome, vaxava mafura ya kunun'hwela, akuva vatayatota a ntrumbu wa Yesu.

² Hikola ka leswo, hi sonto amixweni, hi kuhuma ka dambu, vayi axireni.

³ Andleleni afa va vutisana vaku: Hi mani lweyi atakahipfingulela a ribye ledri dringa nyangweni ya xira?

⁴ Hikusa afa drili drikulu. Kambe loko vatlhasi kone, vavoni leswaku afa dripfinguleliweli tlhelweni.

⁵ Vanhingeniki axireni, vavona kone a ndrisanyana lweyi atrhamisiki axineneni, na ayambali xiyambalu xa ntlhohe. Vatxhuka vava vatxhava ngopfu,

⁶ kambe a ndrisanyana aku ku vone: N'wingatxhukeni! N'witatadjula Yesu wa le Nazarete, lweyi avambiwiki; Yene apfuxiwi kufeni. Angehe kone lana! Lavisani mbangu lowu afaka vamubeki ku wone.

⁷ Kambe fambani n'wiyativisa a vadondrisiwa na Petrosi, n'wiku Yene atan'wirangela aya a Galileya; n'witamuvona kone, swanga hi leswi an'wibyeliki.

⁸ A vavasati vahuma axireni vatrutruma, hikusa afa varurumela ni kutxhava. Nakone avadrungulelanga mhunu ntxhumu.

Kutikombisa ka Yesu Ka kusungula

⁹ Ntrhaku kakuva apfuki kufeni ahumeleli hi sonto amixweni ngopfu, akusunguleni ku Maria Madalena, lweyi afaka ahlongoli ku yene, ntlhanu wa mademoni na mabiri.

¹⁰ Kutani yene ayivativisa lava afaka vafamba-famba na Yesu, afaka vali kuvavisekeni ngopfu ni le kudrileni.

¹¹ Vone-ke loko vayingela leswaku Yesu awahanya, ni leswaku avoniwi ha Maria, avapfumelanga.

¹² Ntrhaku ka swone, Yene atikombisi ku vadondrisiwa vabiri lava afaka vakongoma atintlhaveni.

¹³ Na vone vayitivisa van'wana vadondrisiwa, kambe ni ko ku lava vabiri, vone avapfumelanga.

Yesu ahumelela ku vadondrisiwa

¹⁴ A vugan'wini, Yesu ahumeleli ku lava va khume na mun'we, na vatrhami kudeni. Avasola hikuva vangana likholo, ni kunonon'hwa ka timbilu, ni leswi vangapfumelangakiki ku vhanu lava vamuvoniki loko apfuki kufeni.

¹⁵ Ntrhaku aku ku vone: Fambani amisaveni hinkwayu, n'wiyarera a Ivangeli ku swivumbiwa hinkwaswu.

¹⁶ Lweyi apfumelaka, ava ababatisiwa, atahuluka, kambe lweyi angapfumelikiki, atayavanyisiwa.

¹⁷ Lava vatakavani kupfumela vatatibyiwa hi swikombiso leswi: Hi vito dranga vatahlongola mademoni, ni kukhanela tindrimi timpswha.

¹⁸ Loko vakhoma tinyoka, kumbe kunwa vuhlungu byini ni byini, vangatitwa kuxanisiwa hi ntxhumu. Ni loko vantlhanteka mavoko ku timbabyi, titahanya.

¹⁹ Ntrhaku kakuva akhaneli ni vadrondrisiwa, Hosi Yesu atekeliwi atilweni, ayatrhamisa axineneni xa Xikwembu Nkulukumba.

²⁰ A vadondrisiwa vasuki vayarera a Ivangeli amimbangwini hinkwayu. Na Hosi yivapfuna ni kutiyisa kurera kwavu hi swikombiso leswi afaka swilandrela a kurera kwavu.