Marka 13 - Testamente Ledrimpswha ni Mapsalma

Yesu akhanela hi kubutrhutiwa ka Yindlu ya Hosi

¹ Loko Yesu ahuma Tempeleni, mun'we ku vadondrisiwa ate ku yene: Mudondrisi! Ahikuxonga ka maribye lawa, ni kuxonga ka tiyindlu leti!

² Kutani Yesu aku ku yene: Wativona tiyindlu tikulu, leti? Lavisa leswaku kungaka kungatrikiwi ribye ni drin'we a henhla ka ribye, ledri dringatikibutrhutiwa.

Masungulu ya mahlomulu

³ Ntrhaku Yesu ayi Nhaveni ya Minhlwari, atrhama alavisana ni Tempele. Kolahu Petrosi, na Yakobe, na Yohana na Andreyasi vamuvutisa na vali vuswavu vaku:

⁴ Hibyele a nkama lowu switakahumelela ha wone, ni xikombiso xa hinkwaswu leswi switakahumelela.

⁵ Yesu ahangasungula kuvabyela, aku: Tivonelani leswaku a mhunu angatin'wikanganyisa!

⁶ Vanyingi vatahumelela hi kukanganyisa vaku hi mine lweyi: Hi mine Kriste! Na vatakanganyisa vhanu vanyingi.

⁷ Loko n'wiyingela kuhlayiwa leswaku kuni tiyimpi hi matlhelo hinkwawu, n'wingavitxhava. Leswo swifanekeli kuhumelela, kambe abyisiva vugamu.

⁸ Hikusa drin'we tiko dritapfukela drin'wana, ni mfumu mun'we wutapfukela wun'wana; na kone kutava ni kutrekatreka ka misava, ku mimbangu min'wana kutava ni tindlala. Hinkwaswu leswo atava masungulu ya mahlomulu.

⁹ Tivonelani swinene! Vatan'wiyisa tihubyini, n'witabiwa masinagogeni. Nakone n'witanyiketiwa amahlweni ka tindruna ni vafumi hinkonta yanga, akuva n'wiva timboni.

¹⁰ Swifanekeli leswaku a Ivangeli yiranga yihlayiwa matikweni hinkwawu.

¹¹ Loko van'wiboha, van'winyiketa vuhosini n'wingahlatiyeleni hi leswi n'wita kayangula swone. Kambe hlayani leswi n'witakanyikiwa hi wolowo nkama, hikusa ahi n'wine n'wiyangulaka, kambe hi Moya wa Kuxwenga.

¹² Mun'we makwavu atanyiketa makwavu akudlaweni, ni tatana atanyiketa a n'wana. Ni vana vatapfukela vapswali vavanyiketa kudlayiweni.

¹³ N'wine n'witavengiwa hi hinkwavu hinkonta yanga. Kambe lweyi atiyiselaka kutlhasa vugan'wini, atahuluxiwa.

Nhlomulo lowu wukulu

¹⁴ Loko n'wivona swakutxhavisa a mbangwini lowu wungafanelikiki lweyi a hlayaka leswi adjulisise akuswiyingelisisa hi lowo nkama lava vanga lana Yudeya avatrutrumele tinhaveni.

¹⁵ Lweyi anga henhla ka yindlu, angaxiki ayanhingena ku yone akuva atisusela kone xantxhumu.

¹⁶ Lweyi anga masin'wini, angahatlheleli kaya, akuya teka a swiyambalu.

¹⁷ Yowee, ku vavasati lava vatakavani tinyimba, ni lava vayan'wisaka amasikwini lawo!

¹⁸ Khongotani, akuva hinkwaswu leswo swingahumeleli hi Vuxika,

¹⁹ hikusa amasikwini lawo kutavani nhlomulo wukulu ngopfu, lowu wungasamikiki wuva kone, kusukeli loko Xikwembu Nkulukumba atumbuluxi misava, kutlhasa swoswi, mfuri wungahatikiva kone.

²⁰ Mfuri, loko afa a Hosi yingapumbanga a masiku lawo, afa kungatihuluka mhunu ni mun'we. Kambe hinkonta ya vahlawuliwa, lava Xikwembu Nkulukumba avahlawuliki, agomisi masiku wolawo.

²¹ Loko a mhunu an'wibyela aku: Lavisani, Kriste akola, kumbe Kriste alahaya, n'wingapfumeleni!

²² Hikusa kutahumelela lava vatihlayaka vaku mine ni Kriste, hi madrimi, ni profeta va madrimi vatakahamba ni swikombiso ni mahlolana, akuva vakanganyisa vahlawuliwa va Xikwembu Nkulukumba, loko swingakotekaka.

²³ N'wine ke tivonelani, ngopfu, hikusa nin'wibyela ku hinkwaswu leswi na swingasanganahumelela.

Kubuya ka N'wana wa Mhunu

²⁴ Ntrhaku ka masiku lawo ya nhlomulo, a dambu dritava munyama, ni hweti yingatihumexa a kuvaninga ka yone.

²⁵ A tinyeleti titawa, ni mintamu ya le tilweni mitatrekatreka.

²⁶ Kolahu vatavona N'wana wa Mhunu, ahumelela matlavini hi ntamu lowu wukulu ni hi lidrumu.

²⁷ Kutani yene ataruma swirun'wa, kuhlengeleta vahlawuliwa vakwe. Kusukela avugan'wini byin'we bya misava, kuyatlhasa ku vugamu byin'wana.

Xifaniso xa nkuwa

²⁸ Dondrani hi xikombiso xa nkuwa: Loko wone wuni tinkambu ta kunabyala, wusungula kuhluka makamba mampswha hileswaku a Minyuku mikusuhi.

²⁹ Hileswo-ke, loko n'wivona kuhumelela mintxhumu leyi, tivani leswaku a nkama watrhindrekela.

³⁰ Nihlayelamfuri nili ku n'wine: A vhanu va nkama lowu vangahundri na mintxhumu leyi hinkwavu mingasanganahumelela.

³¹ A tilo ni misava switahundra, kambe a maritu yanga mangatihundra!

Akuna lweyi ativaka siku ni nkama

³² Loko drili siku ledro ni nkama wa siku, akuna mhunu lweyi aswitivaka, nambi swili swirun'wa swa le Tilweni, nambi ali N'wana, loko angali Tatana ntsena.

³³ Tivonelani, hitekani, hikusa an'witivi leswaku dritatlhasa drini a siku ledro.

³⁴ Swifana ni loko a nuna wa kukari asiya a yindlu yake ayendra, anyiketa ku malandra yake a ntamu wa kuyibekisa, na mun'wana-ni-mun'wana ani ntiro wakwe, kutani aleleta ku muyimeli wa nyangwa akuva alavelela.

³⁵ Kolahu-ke vanani valaveleli hikusa an'witivi leswaku atabuya drini a n'winyi wa yindlu. Swingakoteka kuva alihungwini kumbe hi le makari ka vusiku, kumbe ampundrwini, kumbe amixweni.

³⁶ Swingatxhuki swiyentxeka leswaku abuya hi kuhangwesa, an'wikuma na n'wikhutriyelile.

³⁷ Kambe leswi nin'wibyelaka swone, nibyela hinkwavu nili: Hitekani swinene!