Marka 11 - Testamente Ledrimpswha ni Mapsalma

Kunhingena ka Yesu a Yerusalema

¹ Kuti loko vatrhindrekela a Yerusalema ni le Betefage, ni le Betaniya, anhaveni ya Minhlwari, Yesu aruma a vadondrisiwa vakwe vabiri,

² aku ku vone: Yanani amutini lowu n'wikongomaniki na wone. Loko n'winhingeni ku wone n'witahatla n'wikuma a ximbongolwana lexi xikulekiwiki, lexi kungasiki khandriya mhunu a henhla ka xone. Xintrhunxani n'wixitisa kola.

³ Kutaku loko a mhunu an'wivutisa, leswaku n'wiyentxela yini leswo, mubyelani n'wiku a Hosi yaxidjula, kambe Yene atahatla axitlhelisela kola.

⁴ Kutani vafamba vayakuma a ximbongolwana lexi xikulekiwiki anyangweni, a handle, vaxintrhunxa.

⁵ A van'wana lava afaka vayimi kone, vaku ku vone: Xana n'wiyentxela yini kuntrhunxa a ximbongolwana?

⁶ Vone-ke vavayangula hilaha Yesu ahlayiki ha kone, vahangavatrika.

⁷ Kutani vatisa a ximbongolwana ku Yesu, vabeka a henhla ka xone a makapulana yavu, kutani Yene atrhama a henhla ka xone.

⁸ Kutani a vhanu vanyingi vayandlala a makapulana yavu andleleni, van'wana vabehela tinkambu leti afaka vatitremi amasin'wini.

⁹ Lava varangiki ni lava valandrelelaka afa vabandlukana vaku: Hozana! Akukhensiwe lweyi ataka hi vito dra Hosi!

¹⁰ Akukhensiwe a Mfumu lowu wutaka, wa tatana weru Davida! Hozana lweyi anga henhla-henhla.

¹¹ Kutani Yesu atlhasa a Yerusalema, anhingena a Tempeleni; kuti loko aralarali hinkwaswu, leswi afaka me madambu amuka Betaniya kun'we ni lava va khume na vabiri.

Nkuwa wa kukala mihandru

¹² Byiku byaxa, loko vabuya hi le Betaniya, Yene atwa ndlala.

¹³ Avoniki nkuwa na ahali kule lowu wungani makamba, ayalavisa leswaku kumbe wuni mihandru. Loko atlhasa ku wone angakumi ntxhumu loko mange makamba ntsena, hikusa afa wunge nkama wa makuwa.

¹⁴ Kutani Yesu aku ku wone: Kungahavina mhunu lweyi atakada mihandru yaku hi la kungahelikiki! A vadondrisiwa vakwe vaswiyingela.

Yesu a Tempeleni

¹⁵ Kutani vayatlhasa Yerusalema. Loko Yene anhingeni a Ndlwini ya Hosi, asungula kuhlongola handle lava vaxavisaka ni lava vaxavaka. Abakanyisa matafula ya vabindrulisi va mali, ni switrhamu swa vaxavisi va matuva,

¹⁶ afa angapfumeleli mhunu kutremakanya Tempele na arwali xibya.

¹⁷ Kutani avadondrisa aku: A Matralweni kuhlayiwa leswaku: A yindlu yanga yitava Yindlu ya xikhongoto ku matiko hinkwawu! Kambe n'wine n'wiyihambi mhakwa ya vayivi!

¹⁸ A varangeli va vaprista ni vatrali vaswiyingela, kutani vadjula leswi vangamudlayisaka xiswone. Kambe afa vamutxhava, hikuva a xitrhungu hinkwaxu afaka xihlolelwa hi dondro yake.

¹⁹ Amadambyeni, (Yene ni vadondrisiwa vakwe) vahuma amutini.

Dondro ya nkuwa lowu wungeke na mihandru

²⁰ Amixweni, vatiki vahundra vavona a nkuwa wuwomile kusukela mitrwini.

²¹ Petrosi adrimuka leswi swihumeleliki, aku ku Yene: Mudondrisi, lavisa! A nkuwa lowu ungawuruketela wuwomile!

²² Yesu ayangula vadondrisiwa aku ku vone: Vanani ni kupfumela ku Xikwembu Nkulukumba!

²³ Nihlayelamfuri nan'wibyela nili: Loko n'wingaku ku nhava leyi, suka uyatitxukumeta likhulwini, na n'wingaganaganeki ambilwini, kambe n'wipfumela leswaku leswi n'wiswihlayaka switahumelela, switava tanu ku n'wine!

²⁴ Hileswo-ke, nan'wibyela nili: Hinkwaswu leswi n'wiswikombelaka hi kukhongota, pfumelani leswaku n'winyikiwile.

²⁵ Nakone loko n'wikhongota, drivalelani lweyi n'wingavakani mhaka na yene, akuva na Yene Tatana wenu lweyi anga Matilweni an'widrivalela a swidoho swenu. [

²⁶ Kambe, loko n'wingadrivaleli, Tatana wenu lweyi anga Matilweni na Yene, angatin'widrivalela a swidoho swenu.]

Vakaneta ntamu wa Yesu

²⁷ Kutani vatlhela vanhingena a Yerusalema. Aku loko Yene atifamba-fambela a Tempeleni, a vaprista lava vakulu ni vadondrisi va Nawu, ni vakulu va tiko, vata ku yene,

²⁸ vaku: xana leswi uswitiraka, uswitira hi ntamu wini xana? Nakone hi mani lweyi angakunyika a mfanelo leyo xana?

²⁹ Yesu aku ku vone: Na mine, nitan'wivutisa ritu drin'we, kutani niyangulani, na mine nitan'wibyela a ntamu lowu nitiraka leswi ha wone.

³⁰ Nibyelani: Yohana, afa ababatisa hi ntamu wa Xikwembu Nkulukumba, kumbe wa vhanu?

³¹ Vone afa vakanetana, vaku: Loko hiku ku Xikwembu Nkulukumba ataku ha yini n'wingapfumelanga ku Yohana?

³² Kambe loko hiku: Avhanwini vavini kuvatxhava vhanu, hikusa hinkwavu afa vapfumela leswaku Yohana afa e muprofeta kunene.

³³ Vahangayangula Yesu vaku: Ahiswitivi. Na Yene Yesu aku ku vone: Na mine ningatin'wibyela a ntamu lowu nitiraka leswi ha wone.