II Kor 9 - Testamente Ledrimpswha ni Mapsalma

Kuhanana vakriste va-le-Yudeya

¹ Loko wuli ntiro lowu wa xipfuno ku tinsasi, aswipfuni ntxhumu kun'witralela.

² Hakuva nitiva akukhinyela kwenu, hikolahu nititwalisaka kun'we ni va-le-Makedoniya, niku: va-le-Akaya, vatilulamisele akusukela lembe ledri hundriki; A nkhinkhi leyi n'wiyikombisiki yi tiyisi lava vanyingi.

³ Nambi swili tanu, ni n'wirumela vamakweru lava, akuva aku titwalisa loku hinga na kone ha n'wine, amhakeni leyi kungavi mahala; akuva swanga hi leswi ningan'wibyela, n'wiva lava vatibekiseliki,

⁴ akuva loko van'we va Makedoniya vafamba na mine, vangatin'wikuma na n'wingabekisanga ntxhumu, kutani hikhomeka tingana (kumbe ninga hlaya leswku, ngopfu n'wine), akudumbeni kweru loku.

⁵ Xiswoswo, ni pimisi leswaku afa swidjuleka kukombela ku vamakweru leswaku vanirangela vata ku n'wine akuva valulamisa nyiko yenu leyi n'wiyidumbisiki, kutani ayive nyiko leyi yi nene na inge ya kufelela.

⁶ Mfuri na n'wibyela nili: Lweyi abyalaka kutrongo atatrhovela kutrongo, lweyi abyalaka ngopfu atatrhovela leswi swinyingi.

⁷ Mun'wana-ni-mun'wana anyike hi laha atremiki ha kone ambilwini, kunge hi kuvaviseka, nambi kuli hi kusindrisiwa; hikusa Xikwembu Nkulukumba arandra lweyi anyikaka hi kunyoxa.

⁸ Xikwembu Nkulukumba akota kun'wiyandrisela hi timpswalu, akuva n'wikuma minkama hinkwayu leswin'wiyanelaka amatlhelo hinkwawu, n'witlhela n'witaleliwa hi ntiro wa kuxonga hinkwawu,

⁹ Swanga hileswi kutraliwiki leswaku: Yene anyiki hi vumbilu a swisiwana. A vululami byake byitrhama hi laha kungahelikiki.

¹⁰ Kutani, Yene lweyi anyikaka mbewu amubyali ni kati dra kuda, nangweso ata n'winyika ava ayandrisela timbewu leti n'witivilelaka atakulisa antrhovelo wa mihandru ya vunene byenu;

¹¹ atan'wiyandrisela ku hinkwaswu, leswaku minkama hinkwayu miva swipfundri akuva n'witanyika hi vunene; leswo switavanga kutwalisa Xikwembu Nkulukumba ha hine.

¹² Hikusa akupfuna ka ntiro lowu, an'wipfuni tinsasi ntsena leti pfumalaka, na kone n'wiswiyentxa akuva vatlangela Xikwembu Nkulukumba.

¹³ Loko va vona ntiro lowu, vata drumisa Xikwembu Nkulukumba, hinkonta yakuyingiseta kwenu akutihlayeni kwenu ka Mahungu lawa manene ya Kriste, ni hinkonta ya kuhanana kwenu loku kukulu ku vone, ni le kuhinkwavu.

¹⁴ Na vone vakhongota hinkonta yenu, hikuva van'wirandra ngopfu, hinkonta ya timpswalu leti tikulu ta Xikwembu Nkulukumba leti tingana n'wine.

¹⁵ Hitlangela Xikwembu Nkulukumba hi lirandru ledringeke na kufananisiwa.