II Kor 13 - Testamente Ledrimpswha ni Mapsalma

Switiviso swa Pawulosi

¹ Ledri i dravuraru na nita ku n'wine, hi nomu wa vabiri kumbe vararu, amhaka hinkwayu yita tiyisiwa.

² Afa ni n'witivisile nkama lowu ni viki kone kavubiri; kambe swoswi nambi ni sukile, ni tlhela ni byela lava vadohiki khale, ni ku hinkwavu leswaku, loko nitlhela nita hi drin'wana, ningati n'widrivalela.

³ Hikusa leswi n'widjulaka kukombisiwa leswaku Kriste avulavula ha mine, lweyi angeke na gome ku n'wine, na kambe ani ntamu.

⁴ Hikusa, kunene, avambiwile a gomeni, ku hinkwaswu, awa hanya hi ntamu wa Xikwembu Nkulukumba, hikuva na hini gome ha Yene, kambe hita hanya ha Yene, hi muhanyela hi ntamu wa Xikwembu Nkulukumba.

⁵ Tikambani lipfalwini kutani n'wivona leswaku mehe kupfumeleni, tiyanakanyani; kumbe an'wiswitivi leswaku Yesu Kriste ale ku n'wine? Kambe loko swinge tanu, an'wina kuyamukeliwa!

⁶ Kambe ni lavisela akuva n'witiva leswaku, ahi lava vakuka vangayamukeliwi.

⁷ Hi khongota Xikwembu Nkulukumba leswaku n'winga yentxi ntxhumu wa kubiha, na kunge hileswaku hivoneka leswaku hayamukeliwa, kambe akuva n'wine n'wiyentxa leswi swinene, nambi loko haha voneka leswaku hayamukeliwa.

⁸ Hikuva ahi na kuyentxa ntxhumu wa kulwa ni xihlayelamfuri, loko ingi kuyimela xihlayelamfuri.

⁹ Hikuva hi trhava loko hili ni gome, na n'wine n'wili ni ntamu; leswi hi n'wikombelaka i kuva n'wihetiseka.

¹⁰ Kutani ni trala timhaka leti, na ni suki ku n'wine, akuva loko nitava halanu, ningatita tirisa kunonon'hwa loko a Hosi yi ni nyikiki, akuva ni n'wiyaka, na kunge hi ku n'wihahlula.

Madrungula ya vugamu

¹¹ Leswi swisaliki vamakweru, salani, djulisisani akuva lava hetisekiki, txhavelelanani van'we ni van'wana; n'wiva ni kuyanakanya kun'we, hanyani hi kurula, kutani Xikwembu Nkulukumba wa lirandru ni kurula atava na n'wine.

¹² Losanani van'we ku van'wana hi kunyuntana ka vukwavu. Tan'widrungula hinkwatu tinsasi.

¹³ A timpswalu ta Hosi Yesu Kriste, ni lirandru dra Xikwembu Nkulukumba ni kutlhangana ka Moya wa Kuxwenga aswive na n'wine hinkwenu.