Sam 96 - Natqgu

Sam Kranzpnu-rpwxmz-nrade-esz'mz (96) Naglqlzku Yawe, King Kc Tqtubq Takitrde Nzrglqlzngr

¹ Nigu lr nrlc amrlx Nangr-ngrbzku mz Yawe nabz kxmrna!

² Na-angrlvzku nide Mz nzyapwxtipx-krgu kx arlapxle nigu.

³ Napipxbzku mz leplz amrlx Da kxmatq x da kxmyapxbz kcng tqaletileng.

⁴ Takitrde nzrglqlzngr Yawe kc tqmyalz-esz'ngr, Murde nzmrlue-krde namyaszlzle kxnzmncng mzlilxlr amrlx.

⁵ Lr mrkzbleng nzangio-txpwzlr mqngr da kxnzlz, A' Yawe txpwz kx rwzngr bongavz x nrlc atwrnrngr.

⁶ Mz nzmncpx-krm Yawe Mangr-nzangiongr, Xngibzku zmrlue, zyzlr, zmatq x zluli rdeng.

Lr Nrlc Naglqlzlr Yawe

^7-8 Napibzku mz lr mrkzbleng kx naglqlz-kzlr nide Mz zmatq, zluli, x zmrlue lcng. Murde takitrde nzale-krgu da lcng, Mz nzrtwz-krmgu da bade mz makoa nyzde.

⁹ Na-angioku Yawe murde tr-esz'ngr. Na-amrlueku nide x narnrctrpzku bade.

¹⁰ Eu, napipxbzku mz neidung amrlx kx Yawe nide King r nrlc, x atu-amqngile nrlc mz trnzycngrlr-krdeu. X sa na-aclvele lr nrlc amrlx mz nzrsakrlrngr.

Nzaclve-krde Tubq

¹¹ Nimu bongavz x drtc' naelalvzamu nide! X nim prla x dalrmqng amrlx drtwrmu naelalzm!

¹² Nimu nardzng x dalrmqng amrlx na-abrtz-kzamu! Nimu nounc ngr peto amrlx na-angrlvz-kzamu Yawe.

¹³ Murde sa tqvzm mz nzaclve-krde lr nrlc. X nzayzlu-krbzle da mz leplz amrlx sa namrlz x tubq.