Sam 85 - Natqgu

Sam Kranzpnu-rtqmz-nrade-nzlvqn (85) Nzamrlzkr Yawe Mzli Kc Pnz, Mzli Ka, X Mzli Kc Navzm Mzli Kc Pnz

Nabz ne nqvi lr Kora kx nzyrbzlr mz kxrmailz ngr dzbe kxnzngrng.

¹ Yawe, yc ngr drtwrm lr Israel mzli kc pnz, Mz nzamnc-zpwx-mou-krm nidr mz drtc' nyzm.

² Sc tqipqpeq nidr, leplz nemqng, mz nzvz-rbr-krdr, X katxpxbzme alwx ngrdrng.

³ Mzli lcde, lolvzo-mowq zngya ngr drtwrm, X nrwx kc tqprlxpebzme badr.

Mzli Ka

⁴ Mevalu rgr, mzli ka, amnc zpwx mou kz nigr, X nikitx nzngyatikr drtwrm nigr.

⁵ ?Myx kxmule, nangyati-alope drtwrm nigr, X trpengr nzyzlukr drtwrm?

⁶ Trtingr! Axplr-mop nzlu-krgr, Murde na-abrtz-ngrgr nim.

⁷ Yawe, aelwa-ngrm bagr nzaodu-krm kc tqyc tqyc, Mz nzarlapx-krm nigr.

Mzli Kc Navzm

⁸ Nabrti drtwrgu natq Yawe, Murde esalz-ngrmle nrwx bagu mz nzyrlqpx-lzbq-krgu mz dalr nzngqngungr.

⁹ X oliq zvz nzarlapx-krde kxnzamrluelr nide, Murde nzulrde naxngi-alope mz drtc' nyzgu.

¹⁰ Yawe aodu-zvzle nigu, murde nangida-zpwxbzku bade. X nzaclve-krde tubq, murde namnc-zpwxku.

¹¹ Mz nzavzo-krmle nztubqngr lc bagu, Ayzlubzku mz nzngida-zpwx-krbzku bade.

^12-13 Apule kx nztubqngr lc rtwayzbz bade mz nzatubqti-krde nabz leplz, Murde naoliqti-ngrdr nzvz-krmle. Mz nzoliqngr lc, Yawe sa narkatim bagu da kxmrlzting, X drtc' nyzgu sa nalvcngr dakxnzng kxkqlu.