Sam 83 - Natqgu

Sam Kranzpnu-rtqmz-nrade-tq (83) Enqmi R Israel Mzli Kc Pnz X Mzli Ka Enqmi Rmqng

Nabz ne Asaf.

^1-2 Gct, bzkq mnc-lrpitxn, Murde enqmi rmqng nzxpqbrlr-ngrdr nim.

³ Sa tzryrlqng drtwr kxyc-kapq kx na-atrkati-ngrdr nigr. X nigr leplz nemqng kcng tqmrlzti-zlwzq.

⁴ Nzrpilr kx, “Naodatitxbzku mrnyzdr, Murde drtq Israel namrbrtxtr alo mz drtwr.”

^5-8 Enqmi kcng tzmnc-ngalelr Israel drtwrdr esz'ti Mz nzprtr-krbzlr mz lr Amcn x lr Mcab, neidu lcng li nzvzpxmqng mz nqvi lr Lot. Kxnztupeng badr me esz' nidr seleng: Nqvi lr Isc, nqvi lr Ismael, neidu lr Haga, x neidu lr Amalek, Lr mztea Taea, lr Gebal, x lr Filistia. X lr Asiria kxnzxplrng nzngi tedr kz badr.

Ayrplapx Nidr

^9-11 Gct, aovxio kz enqmi lcng mzli ka, da kc tqwai pnz nzaovxio-zvz-krm enqmi r melrmqgrng. Ayrplapx nidr, da kc tqwai nzayrplapx-krm ami ne Jabin, King r lr Kenan x Ngrlrvea nede Sisera, Mzli kc tqmilxtxo-ngrn nidr mz Lue Kison kc tqyc-aepztr mztea Endo, X namz ngrdr mibio mrlcde mz mzli nyz Profet Debra. X rlxti-kzpzkr nanibqti-kzq enqmi rgrng, da kc tqwaisr-ngrn mz lr Midizn mz nznibq-krm Oreb x Seeb, ngrlrvea ngrdrng. X maneuti nidr da kc tqwai nzmaneuti-krm king rdr, Sebz x Salmuna, mz nznibq-krm nidr mz mq profet Gidion.

¹² Murde leplz lcng pnz nzrpilr kx, “Natwzku Israel, drtc' nyz Gct, nangi nyzgu.”

¹³ Gct, mz nzmu-krde lcde, apusrngr nidr bq r drtc', X leu kxglr kx wqplr nenq.

¹⁴ Odati-atwrnrngr nidr, apubz badr nyr kxetu Kc tqyrkrtxongr dalr peto x nardzng mz mzli r nepi.

¹⁵ Maneuting x amwxlrng Mz nzapu-krbzme badr nounenq.

¹⁶ Yawe, amyatitx-zlwzbz drtqdr, Murde nakrlz-ngrdr zmatq ngrm.

¹⁷ Aovxio alo x amwxlr alo nidr Murde nzmya-zlwzkr drtqdr nanibqle nidr.

¹⁸ X mzli lc, sc tzkrlz-atepelr kx nim txpwz Gct kc tqmyatxlz-esz'ngr x drtqm Yawe. X nim King kc tqaclvele nrlc tulvzo.