Sam 80 - Natqgu

Sam Kranzpnu-rtqmz (80) Ka-mop Bagr Nzxplr-krgr Kc Pnz Nigr Sip Nemqng

Nabz ne Asaf.

¹ Gct, myaszlzq enjrl kxnzetung. X aclve-zvzq nigr doa neng Josip, Mz nzapu-krgr sip nemqng. Lalztqm bagr, nigr doa neng Israel.

² X aelwa-ngrm zmatq ngrm bagr, Nigr nqvi lr Efrem, Benjamin, x Manase. Vzm mz nzxplr-krm mzli ka X arlapxbz nigr mz mq enqmi rgrng.

³ Gct, mz nzaodu-zvz-krm nigr, arlapx nigr, X ka-mop bagr nzxplr-krgr kc pnz.

Nabzgr Talvzo

⁴ Yawe Gct kc tqrninr, bzkq drtwrm ngya-zvzm bagr, A' ayzlum nzkrka'-krgr.

⁵ Tekqtrpebzme dakxnzng nagr mz nzavz-krbzme drtwrgr. X mz lue amnqtr-zvzpeq nigr mz drlemzkr.

⁶ Rlrtx-ngrpwzme mz lr mrkzbleng kcng tzmnc-ngalelr nigr nzyrpalelvz-krdr nigr X nzotalvz-krdr drtc' nyzgr kx neke nartwz.

⁷ Gct kc tqrninr, mz nzaodu-zvz-krm nigr, arlapx nigr, X ka-mop bagr nzxplr-krgr kc pnz.

Nigr Nqvi Lr Grep Nyzm

^8-9 Apusr-ngrn nigr nqvi lr grep ngr nrlanc nyzm. Murde mz nzvzmipx-krme nigr Ijipt, Apule kx bolvztipeq leplz kxnzmnc-mrbrng mrkc Kenan, Murde nqvi lr grep nyzm natu-amqngi mz drtc' lc.

^10-11 X bz ngr nrlanc kc tqoliqtime bagr yzutr mz drtc' ngr Lebanon, Vz krlzbzle Lue Yufretis. X vzki-kzple mz newz kxnzetung, Vz x krlzbzle Prla Meditrenia.

¹² A' mzli ka opxm kx awxlikiq nabxbz ngr nrlanc nyzgr, Mz nzrlr-krbzme mz enqmi rgrng nzrtwz-abeane-krdr dalr nrlanc.

¹³ Lr mrkzbleng nzapulr poi kzpeto kcng tzayabetilr nrlanc, Mz nzapusr-krdr nigr dakxnzng nadr.

¹⁴ Gct kc tqrninr, obqom bagr Heven. X okatr-mop nigr mz nzapu-krgr nqvi lr grep nyzm,

¹⁵ Kc tqpetiq Murde naxplrkr mz nzmnc-krgr mz drtc'.

^16-17 Ngaprbz ncpa'bu ngrgr kx nao-zlilzkr, Mz nztu-zvz-krme mz nibrgr, nigr leplz nemqng. Murde enqmi rgrng nzapusr-ngrdr nigr nounc kc tzlakitxo x nzangc mz nyr. Delc naodati-ngrbzme nidr mz zngya ngr drtwrm.

¹⁸ Zbz trnaesablqtikru nim, A' naglqlz-zvzpekr nim mz nzalu-krm nigr.

¹⁹ Yawe Gct kc tqrninr, mz nzaodu-zvz-krm nigr, arlapx nigr, X ka-mop bagr nzxplr-krgr kc pnz.