Sam 8 - Natqgu

Sam Krartqmz (8) Drtwr Kx Yrlq Kxrpalz

Nabz ne Devet kx yrbzle mz kxrmailz ngr dzbe kxnzngrng.

¹ Yawe, nim Kxetu rgr. Drtqm myalz-esz'ngr mz nrlc tulvzo. X nzmyalz-krm myaszlzle bongavz.

² Mz nzvz-nqblq-krde me pnz drtwrm, doa kxnztopwzng nzglqlzlr nim. X natqdr ailvzole nzrpibqtikr enqmi rmqng x awx-nabule nidr.

³ Kxrpalz, mzli kc tqobqlz-ngrne mz bongavz, Mclzx nzlulikr temz x vri kcng tqwz-ngrnqng.

⁴ ?A' memule tqmatq-ngrgr mz drtwrm? ?X memule tqmrlzti-ngrn nigr leplz txneng?

⁵ Murde wz-ngrn leplz vzo kxpipz mz lr Heven, X kabzme badr zmrlue x nzamatqngr.

⁶ Yrlqq nidr mz nzaclve-krdr da kcng tqwz-ngrn, X da amrlx nzyclzbzng mz zmatq ngrdr.

⁷ Nzaclvelr animol krbzq, X animol kzpeto kz.

⁸ X nidr kxnzetung r utc x nc, X da amrlx kx nzwrneng prla.

⁹ Yawe, nim Kxetu rgr, Drtqm myalz-esz'ngr mz nrlc tulvzo.