Sam 73 - Natqgu

Sam Kranzpnu-rlimz-nrade-tq (73) Nzmnc-zpwx-krnge Yc-zvzbz Bam Nzxplrkr Kxdrka'-ngrng

Nabz ne Asaf.

¹ Kxmule-esz' rpiku kx, “Gct mrlzti nivz lrde nigu lr Israel, X amrlzle kx nabzdr lq,”

² A' nabznge ngrgo. X nzrlxngiti-krnge ycpwz pipz nzaxtx-krbole.

³ Murde mcx nzrngisc-zlwzkr kxdrka'-ngrng, X kcmnztx-ngrne dztu kxnzglqpx-lzbq lcng.

⁴ Mz nzaotikr drtwrnge, trpnzngr nzetqkr drtq kx nzxngitrlr, A' nzyrlvz-angidrng x nzxplrng.

⁵ Leplz lcng trpnzngr zyagox kx prtzbz badr, X trnzrmctilru nzkxpungr.

⁶ Delc tzbi-zlwz-ngrdr mz nzglqpx-lzbq-krdr, X drtqdr trmyau nzrtulrtr-krbzlr me pnz drtwrdr.

⁷ Da kxtrka nzvzpxmqng mz nabzdr x drtwrdr, Apule lue kc tqyrlepxm mz nzwxplikr kxpqbu.

⁸ Nzryrpalelvzng leplz kxnztubqng x nzycmnetxtrpwzng mz da kxtrka. X nabzdr nzbilvzlr zmatq ngrdr mz natq ngr nzamwxlr-krdr leplz.

⁹ Nzycmne-atrkatilr Gct kc Heven, X nzrpilr kx nidr kxnzetu r leplz mz nrlc mz nzrka-krbzlr natq badr.

Nzvz-rbrkr Leplz Neng Gct

¹⁰ Mzli ka kzdung leplz neng Gct nzlalztqpe-kzpzng badr, Mz nzlxngiti-krbzlr natqdr.

¹¹ Nzrpibzlr badr kx, “Vz-nqblqmamu nigr, Murde Gct kc Heven trtxpnzngr nzmc-krde nimu.”

¹² Krlc nqmq kr leplz kxdrka'-ngrng. X kxmule-esz' nzrngiscpeng da kxkqlu, a' drtwrdr trpnzngr nzesapx-krdr.

¹³ Gct, mz nzmc-krnge nidr, rpix esz'-krnge kx, “Mane nzalqti-lzbq-krnge. X mane nzyrlqpx-lzbq-krnge mz alwx.

^14-15 Murde drtqnge etq zvz mz zbq kalvz, mz nzkxpu-zlwz-krnge.” A' trvz-nqblqwxu natq kxdrka'-ngrng, Mz nzrpi-krdr kx trmcwq alwx ngrgrng, Murde ma tqmailzx leplz nemqng mz nzvz-rbr-krdr.

Kxdrka'ngrng Sa Naodating

¹⁶ Rblxm bange nzkrlz-krnge drtwr ngr nzrlr-krbzme mz kxnztubqng nzkxpu-krdr, A' trayrplapxwq kxdrka'-ngrng.

¹⁷ Zbz kx vztrx Mangr-nzangiongr nim mz nzmnc-lrpi-krnge, Sc tqkrlz-atex kx kxdrka'-ngrng lcng trpnzngr nzmnctr-krbzlr bam Heven.

¹⁸ Murde rlr-ngrbzme badr nzvz-nqblq-krdr me pnz drtwrdr, kc tqbatrpzle nzodatingr nidr. Nzapulr kx nzvzneng mz drtc' kxmiglq kc tqrbatrpz nztao-krdr.

¹⁹ X nzodatingr lc nidr na-ani txpwz, X nzvzdz-krm nelzdr mz zmwxlr sa naprtrpz badr mzli kc nabz-ngrdr.

²⁰ Mz nzbz-ani-krdr lc, nzapulr nzrmwiblengr Kc tqmrbrtr mou mz nzdwalz-ngrm.

Nabznge Ngrgo

²¹ Mzli kc tqxngitr-ngrne mz nabznge nzaetq-krme drtqnge, X zngya ngr drtwrnge lolvztxne,

²² Apux poi kzpeto Mz nzpqbrtxnekr narnge x nzngqngu-krnge.

²³ Kxmule-esz', a' mnc-zvzme bange, Mz nzlolvz-amqngi-krm mqnge.

²⁴ X vz zvz nzmailz-krm ninge mz nzalvztr-krm ninge. Murde naprtrx mz nzarmyalz-krm ninge kalr.

Brti Drtwrnge Gct

²⁵ Trpnzngr da kx wz-ngrn Heven x nrlc Kx suti drtwrnge, a' nim txpwz, Trte.

²⁶ Kxmule-esz' nabznge ngrgo, a' nim nzxplr-krnge, X namncme bange, tqvzpe tqvzpe.

²⁷ Gct, krkcng tzpx-ngrdr nim, trnamnctrpzu bam mz nibr nzbz-krdr, Murde sa naodatiq kxtrnzabrtrpzlru drtwrdr bam.

²⁸ Kxetu Yawe, mrlzvxitxm bange nzmnc-aepztr-krbo bam Mz nzrlatr-krbo bam, murde napipx-zvzbo nqmq krm mz leplz.