Sam 64 - Natqgu

Sam Kranzpnu-esz'mz-nrade-pwx (64) Drtwr Kxtrka Trngida-pnzu Enqmi Rngeng

Nabz ne Devet kx yrbzle mz kxrmailz ngr dzbe kxnzngrng.

¹ Gct, kxputxpex. Xlrm nzkrka'-krnge. Mwxlrti-zlwzx enqmi rngeng. Arlapx ninge.

² Tum mz nibrnge murde kxdrka'-ngrng nzyrlqng drtwr Mz nzesabrti-krdr ninge.

³ Nzxngitrkr leplz nzycmne-krdr apule nzrlakikr toki r vea kx malc. X nzpnz-krdr leplz mz natq kxtrka apule nipna.

⁴ Nzmnc-kapqng mz nzpnz-krdr kxnztubqng mz natq ngr nzpokiangr. X trnzmwxlrung nzaniti-krdr nzatrkati-krdr nidr.

^5-6 Nzapqtrlr drtwrdr mz drtwr kxtrka kx nzyrlqlr. X nzamyatxlzpwzlr nzrkrlzkr leplz, Mz nzrpi-lxblr-krdr kx, “Na-amwiku trtxki mz nzesabrti-krgu leplz. X nzbrngztio-krgu lc da kxvz-rbr trpnzngr kx narmc x kx narkrlzti.”

Gct Rnge

⁷ A' Gct sa na-ayrplapx-anile nidr, na-apule kx pnzle nidr mz nipna scde. X napwrkilvc-ngrdr nztupekr nipna ngrdr.

⁸ Sa na-atrkatile nidr murde nzrpiting natq kxtrka. X sa nayrpalelvzng krkcng tzrmcng nidr.

⁹ X leplz amrlx sa namwxlrtilr Gct. X sa na-aoti drtwrdr da kxmatq kc tqaleleng x nayapwxtipxlr.

¹⁰ Leplz kxnztubqng sa na-abrtzlvzlr Yawe x sa na-abrtrpzlr drtwrdr bade. Leplz kx nabzdr lq sa na-awibzng bade.