Sam 6 - Natqgu

Sam Kraesz'mz (6) Drle Mzke' Nzkrka'ngr

Nabz ne Devet kx yrbzle mz kxrmailz ngr dzbe kxnzngrng.

¹ Yawe, kxmule-esz' drtwrm ngya, A' bzkq pnanatiq x ayrplapxq ninge.

² Kxetu, nayc mz drtwrm ninge murde yangrngapex. X axplr mou nrkrdrtqnge murde yagox-zlwzx.

³ ?Rnrcti-lzbqtrpo bam mz zmwxlr, X aenzli-alopex nzokatr-krm ninge?

Nzarlapxngr

⁴ Yawe, tekqtr drtwrm x arlapx ninge, Mz nzaodu-krm kc tqyc tqyc.

⁵ Murde mz nzbzngr trpengr nzrglqlzngr nim. X mz gq nzangiongr nim kc tqyrkrpxpebz.

Nzyrningr

⁶ Drtqnge mewepe mz nzkrka'-zvz-krbo bam. X mz nrlckxbq kang kqlu, nqni x pilo pnrnge nzlrpr-ngrdr drle mzke'.

⁷ Mzke' vaotxtrpebz x tropxpeu, Murde nzyrni-krnge lc nzngi-batrplr enqmi rngeng.

Nzaovxiongr

⁸ Nimu leplz kxdrka'-ngrng amrlx, dwaszpeamu ninge! Murde Yawe sa tqlalztqpem mz nzyrni-krnge.

⁹ Xlrpemle nike rlxtibo, X sa na-ayzlumle natqnge.

¹⁰ Krka'-ngrne kx drtq enqmi rngeng namya x narnrcti-lzbq-kzng mz zmwxlr, X naplc-aning mz nzaovxio-krnge nidr.