Sam 56 - Natqgu

Sam Kranzpnu-nzlvqn-nrade-esz'mz (56) Mzli Kznike Mwxlr-ngrne, Abrtrpo Drtwrnge Bam Okatrp Ninge

mzli kc tzlolvzngr lr Filistia nide mrkc mztea Gat.

^1-2 Yawe, nayc mz drtwrm ninge. Murde enqmi rngeng nzkqlu-zlwzng. X vz zvz nzmaneuti-krdr ninge x nzatrkati-krdr ninge, Murde nzrpilr na-aovxiolr ninge mz nzrnzlvzo-krdr ninge.

³ A' mzli kznike mwxlr-ngrne, Abrtrpo drtwrnge bam.

⁴ Trmwxlrtiwxu zmatq ngrdr murde abrtrpo drtwrnge mz natqm, Nim Gct kc tqglqlz-zvzx.

⁵ Yawe, enqmi rngeng vz zvz nzrtangr-krdr drtwr kx na-atrkati-ngrdr ninge, Mz nzrkatr-zvz-krmlr nzkxpungr bange.

⁶ X nzyrlwr-lxblrng me nzmnc-kapq-ngrdr, Mz nzaukzti-krdr ninge, murde nanibqlr ninge.

⁷ Bzkq rlr-ngrbzme nzdwa-krdr, A' ayrplapxng mz zngya ngr drtwrm.

Abrtrpo Drtwrnge Bam

⁸ Krlz-angidrq nzrkrkxkr drtqnge. Murde aplxtipxpeq nztaliokr drlemzke' amrlx, mz nzyrtio-krmlr mz buk scm.

⁹ X krlz-zpwxx kx mz nzkqle-krnge nim, sa navzme x enqmi rngeng nadwaszlr ninge. Murde tu-zvzme mz nibrnge.

^10-11 Trmwxlrtiwxu zmatq ngrdr murde abrtrpo drtwrnge mz natqm, Yawe, nim Gct kc tqglqlz-zvzx, x brti drtwrnge natqm amrlx.

¹² X sa na-alebo bam da kcng tqpibo, Mz nzrka-krbo blz ngr nzawingr.

¹³ Awi mz nzarlapx-krme ninge mz mq enqmi rngeng. Murde trpnzngr nznibq-krdr ninge, X trmetxpou badr. Gct nawztr-zvzbo bam, nzmnc-krnge mz nrlc.