Sam 55 - Natqgu

Sam Kranzpnu-nzlvqn-nrade-nzlvqn (55) Kxdrka'-ngrng X Kxamwale Kztede Nzkrka'ngr

Nabz ne Devet kx yrbzle mz kxrmailz ngr dzbe kxnzngrng, mz nzayrningr gita.

¹ Gct, xlrm nzkrka'-krbo bam. X bzkq drtqm satrp nzycmne-krbo bam.

² Lalztqm bange x ayzlum natqnge, Murde nabznge tropxpeu mz nztalvzo-krde.

Nzetqkr Drtq

³ Enqmi rngeng nzrkatrpqng bange nzkxpungr, Mz nzxngitr-krnge nzycmne-kato-krdr, Mz nzrnzlvzo-krdr ninge, X nzobq-krmlr bange mz zngya.

⁴ Nelznge vzdz-zlwzm, Murde ycpe pipz nzbz-krnge.

⁵ Rnrcti-lzbqpenge mz zmwxlr, X nrkrdrtqnge esz'pe-ngrde.

⁶ X rpix mz drtwrnge kx, “Nzmu nabxnge naycbzle, da kc tqwai bona, Nalvcx x nartangrx me namnc-zpwx-ngrne.

⁷ Nalvctr-rlrux lzke, X namnc-lrpix esz'-krnge mrlcde.

⁸ Na-anitxpwo nzrtangrti-krnge me narlakitrx Mz tewa x nounenq.”

Nzkrka'ngr

⁹ Kxetu, akipx kxdrka'-ngrng mz nzarlxlvrti-krbzme natqdr. Murde nzota-zvzng x nznani-lzbq-zvzng mz mztea.

¹⁰ Mz nrlckxngrlx x nrlckxbq Mztea esz'tx-ngrpwz nzxpqbrlrngr lou x nzkxpungr.

¹¹ Nzodangr prtz-zvzm mrlcng kqlu mz mztea. X me nzamwangr da tresakipxpuu nzpokiangr x nzangqngutingr leplz.

Kxamwa Kztede

^12-14 Kztenge, mzli kc ryapwx-angidrki mz nzodu-krgi, X vztr-lxblrki mz Mangr-nzangiongr Gct. A' mzli ka trngiu enqmi rnge kc tqxtrnga-ngrde ninge, A' krlc nim, kc tqmuki me esz' x line-zvzki. X trngiu kxpxtxpx-ngrde ninge kc tqyrpalelvzle ninge, A' krlc nim, mrlxkztenge. Mz nzatrkatikr enqmi rnge ninge Nabznge trtalvzou x krlzx nzmnc-kapqngr, A' nzamwa-krm lc ninge, kx mzlenge, Delc tqvztx-zlwzngr drtwrnge.

Nzkrka'ngr

¹⁵ Gct, ayrkrpx-anibz enqmi lcng nabzdr x nzao-krdr drtwrdr tqdrka'ngr, Murde napwrkilvc-ngrdr nzbz-krdr.

¹⁶ Yawe, mzli kc nayrni-ngrbo bam, Krlzx kx sa na-arlapxq ninge.

¹⁷ Murde sa naxlrme natqnge mz nourla, bea, x mz nrlckxbq, Mz nzkalz-zvz-krbo bam nzlckr drtwrnge x nztalvzokr nabznge.

¹⁸ Kxmule-esz' enqmi rngeng nzkqlung, a' mzli kcpe naota-ngrgr badr, Sa na-amnc-zpwxq ninge mz mzlirdr.

¹⁹ Murde nim Gct kc nzaclve-krde tqyc tqyc. X sa na-ayzlume natqnge lcng mz nzaovxio-krm nidr mz nzotangr. Murde nzpxtxpx-ngrdr nztekqtr-krdr nqmq krdr, X trnzamrlue-kzlru nim.

Kxamwa Kztede

²⁰ Mrlxkztenge lc, mzli kc nigr badr dzbede kxesz', a' mzli ka yrlqpx-lzbq mz nzesz'tikr drtwrgr badr. A' se tqrtwztipele nigr zngya tqotapekr badr.

²¹ Nzprlxpx-krde nivz narpi-ngrbz nide ncblo ngrde, A' mz nabzde la poi kx mu ncblo. Mz nzycmne-krde nide pakrle, A' natqdeng malc apule toki r vea.

Nzkrka'ngr

²² Yawe, napipxbzkr nzkxpu-krgrng bam, murde nalolvz-amqngiq nigr. X tr-rlrpx-ngrwq leplz kxnztubqng nzaxtx-krbzlr nzlxngiti-krdr nim.

²³ Murde sa nartco-ngrn mz gq lrdr Krkcng tzrnibqng x tzpokiang, Mzli lc tznginibe-ngrdr obla. A' sa na-abrtr-zvzbo drtwrnge bam.