Sam 54 - Natqgu

Sam Kranzpnu-nzlvqn-nrade-pwx (54) Nzbrtikr Drtwrgu Gct Nzaovxio-krde Enqmi Rgung

mzli kc lr Sifz tzvz-ngrbzlr mz Sol mz nzrpi-krbzlr kx, “?Krlzq kx Devet sc tqmnc-kapq mztea nyzgr?”

¹ Gct, arlapx ninge mz zmatq ngr drtqm, X aelwzpx-ngrbz nztubq-krnge mz nztu-krbzme mz nibrnge.

² Xlrm natqnge Mz nzkrka'-krbo bam.

³ Kxnzaetqng drtq nzglqpx-lzbqng nzrpilr natzlr ninge, X krkcng tzxpqbrlr-ngrdr nim, nzrpilr nanibqlr ninge.

⁴ A' nim Gct kx okatr-zvzle ninge, Mz nzngini-krm Kxetu rnge kc tqmnc-xgle-zvzx.

⁵ Yawe Gct, ayzlu-mopwz badr da kxtrka kcng tzwaisr-ngrdr ninge. X nibq nidr murde nim kx brti drtwr.

⁶ Zbz sa na-abrtzlvzx nzrka-krbo bam blz mz olta nyzm. X na-awi-ngrbo bam nzmrlz-zlwz-krm.

⁷ Murde arlapxq ninge mz nzkxpu-krngeng amrlx, X okatrq ninge mz nzaovxio-krnge enqmi rngeng.