Sam 4 - Natqgu

Sam Krapwx (4) Abrtrpzmu Drtwrmu Mz Gct Gct Rnge

Nabz ne Devet.

¹ Gct, ayzlum nzkrka'-krnge, Murde dwaki-zvzme bange. X mzli kc tqkxpu-ngrne, okatrq ninge. Delc naycngr mz drtwrm ninge x naxlr-ngrme natqnge.

Kxnzmnc-mrbrng

² ?Nimu leplz, myx mzli kx naesakingr nzatrkati-krmu nzmyalz-krnge? ?X myx mzli kx naesakingr nzmrlzkr bamu da kx ngi brmrda x nzpokiangr?

³ Murde nakrlzamu kx Yawe mcpxle nigr leplz kxnztubqng kx nanginedeng. X mzli kc nakrka'-ngrbo bade, sa na-ayzlumle natqnge.

⁴ Bzkq nabztq ngr nelzmu mailzle nimu mz alwx. A' na-aoti drtwrmu nqmq krmu mz nzyrbq-lrpi-krmu mz nelvq nyzmu mz nrlckxbq.

⁵ Zbz na-abrtrpzmu drtwrmu bade, X nakabzmu bade blz, mz nzvz-nqblq-krgu natq kc tqkapxmle bagu.

Gct Rnge

⁶ Yawe, leplz nemqng nzkqlung kx nzrpimlr bange kx, “?Myx mzli kx namnc-zpwx-ngrgu?” Delc tqkrka'-ngrbo kx na-amrlzq nigr.

⁷ Murde mzli kc tqamrlz-ngrn ninge, abrtz-zlwzx Myaszpxle nzabrtzkr leplz kx dakxnzng nadr x waen mqdr kqlu.

⁸ Mzli kc tqyrbq-ngrne, mwi-angidrx mz nrlckxbq, Murde nim kx aclve-zpwxle ninge.