Sam 28 - Natqgu

Sam Kranzpnu-li-nrade-rtqmz (28) Aclve Alo Nigr

Nabz ne Devet.

¹ Yawe, kqlex nim murde nim butqbr kx rlakitrx. Bzkq apume bange kxnradrtqde ngq. Murde ma tqbzx nzmu napx-ngrn nzxlrngr nzyrni-krnge.

² Mzli kc tqobqtr-ngrbo Mrkc Tqtr mz nzmnc-krnge Mangr-nzangiongr nim, x glalzx mqnge mz nzkrka'-krbo bam, Xlrm natqnge x okatrp ninge.

³ Bzkq apusr-ngrn ninge kxdrka'-ngrng kcng tzrtrngz-zvzbzng da kxtrka. X nzrpilr kx nidr ncblo ngr nivz, a' trtingr.

⁴ Ayzlu-mopwz mz nzayrplapx-krm nidr mz da kxtrka x nzrtrkalrngr kcng tzalelr, Kabz badr da kx takitrde nzvz-rbr-krdrng.

⁵ Murde matitrpe drtwrdr da kcng tqwz-ngrn x da kxetuting tqaleqng. Dekc namilxtxo-ngrn nidr x bzkq da kx na-ale-moulr.

⁶ Yawe, glqlz-lxblrkr nim Murde ayzlume natqnge mz nzokatr-krm ninge.

⁷ Nim lrpalvc nyznge x temz ngr lomrnge kc tqyrputrngr nipna. Abrtrpo drtwrnge bam x okatr-zvzq ninge. Delc tqelalz-ngrm drtwrnge X tqawi-zvz-ngrbo bam mz nzngrngr.

⁸ Yawe, nim lrpalvc nyzgr kx rlakitrkr. X nim nzxplr-krnge, ninge king kc tqmcpxbzme.

⁹ Amrlz nigr leplz nemqng mz nzarlapx-krm nigr, Mz nzngini-krgr sip nemqng kcng tqaclve-zvzq.