Sam 19 - Natqgu

Sam Kranzpnu-esz'-nrade-rpwxmz (19) Zyzlr Ngr Bongavz X Zyzlr Ngr Natq Gct Zyzlr Ngr Nepi, Temz, X Vri

¹ Nzmyalzkr Gct nzmc mz bongavz, X dalr bongavz amrlx.

² Mz nrlckxngrlx, nepi aelwa-ngrde zmatq rde, Da kc tzwai temz x vri mz nrlckxbq.

³ Kxmule-esz' bongavz trpnzngr naode x nepi trycmneu, X trpnzngr natq kxnztwz temz x vri,

⁴ A' nrpa scdr vzpx, krlzbzle leplz amrlx mz nrlc tulvzo. Gct yrlqbzle nrlckxbq nangi ma nyz nepi kx mwipx-ngrmle.

⁵ Mz nourla, nzvzpx-ani-krm nepi ma nyzde apule nzabrtzkr ncblo kx yrlz ate. X apu-kzle ncblo menrpa kc tqoliq mz nzesangr.

⁶ Nepi lc prtzm mz nzngrlr-krde mz bongavz. Ngrlr, krlzbzle nrlarde kc tqtakiole. X zyzlr ngrde yzlro-ngrm mz da amrlx. Da kc tqwai Natq Yawe mz nzyzlro-krmle mz leplz amrlx.

Natq Yawe Apule Zyzlr Kx Pnamilxtile Nabz Leplz

⁷ Natq Yawe amrnale nzlukr nabz leplz mz nzmrlzvxi-krde. Akrlztrle kxnzngqngung murde trycngrlru.

⁸ Natq Gct aelalzmle drtwr kxnzrvz-nqblqng mz nztubq-krde. Aelwapx-ngrde da kx yc-kapq mz nzobqplx-krde nabz.

⁹ Nzamrluengr Yawe tqyc tqyc murde lq-esz'ngr. Natq Yawe rsakrlrngr murde da angidr zvz.

¹⁰ Delc nzsutikr drtwrnge natqde namyaszpxle trau kxkqlu, Murde vzpx-ngrm nzabrtzngr kx myaszpxle dakxnzng kcng tqbrngzvxi.

¹¹ Mz nzvz-nqblq-krnge natqde, aelwapx-ngrmle bange da kxmrlzting. X mz nzlalztq-krnge mz natqde, atubqtimle nzmnc-krnge.

¹² Kxetu Yawe, ipq ninge mz alwx kznikeng yc-kapqtrp bange, Murde rblxm bange nzmc-krngeleng.

¹³ X lolvz-amqngi ninge, Murde ma tqvz zvz nzale-krnge alwx Kcng tqotr ngr drtwrnge nzale-krngeleng. Murde nabznge natr x natubqbo mz nzobq-krm.

¹⁴ Yawe, nim butqbr kx rlakitrx. Krka'-ngrne kx natqngeng x nzaotikr drtwrnge navz-nqblq-zvzlr me pnz drtwrm.