Sam 144 - Natqgu

Sam Kratrtqki-esz'-nzpnu-pwx-nrade-pwx (144) Sa Namrlzbz Mz Leplz Mrkcng Amrlx Tqamrlz Yawe Mevalu Rnge

Nabz ne Devet.

¹ Yawe, glqpxx nim, murde nim butqbr nyznge. X alvztrpe' bange nzrpnangr x axplrq ninge mz nzotangr.

² Brti drtwrnge nzngini-krm lrpalvc nyznge. Nim Mevalu kx xplr x me rlakitrx. Nim temz ngr lomrnge kc tqyrputrngr nipna. X okatr-zvzq ninge mz nzaovxio-krnge lr mrkzbleng.

³ ?A' memule tqmatq-ngrgr mz drtwrm? ?X memule tqmrlzti-ngrn nigr leplz txneng?

⁴ Nzmrbcnekr nzlukr leplz apule nzyrplaokr nrc kxesz'. X apu-kzle zmio kc tqmrbr mz milzpq.

⁵ Yawe, lvxpx bongavz mz nzvzo-krme. Maletr newz murde nasikapung nzapulr trmami.

⁶ Atwzlro-ngrm bzlrpc mz nzaodaliti-krm enqmi rngeng. Pnzting nidr mz nipna scmqng murde navotxng.

⁷ Yawe, rtrngztiom ninge mz nzokatr-krm ninge, Na-apule kx veclzme ninge me boongr prla. X arlapxbz ninge mz mq lr mrkzbleng.

⁸ Murde nzmrlzti-txpwzlr nigr mz nzycmne-krdr. A' trnzatutrlru nzesz'tikr drtwrgr badr.

Nzkrka'-krnge

⁹ Gct, sa nangr-ngrbo bam nabz kxmrna. X na-angrlvzx nim mz nzayrni-krnge gita.

¹⁰ Murde okatr-zvzq king nemqng mz nzaovxio-krdrng. X sc tqarlapxpebzme ninge mz toki r vea kxmalc, murde ninge kxnzawz nem.

¹¹ Mzli ka arlapx-mopwz ninge mz mq lr mrkzbleng murde nzmrlzti-txpwzlr nigr mz nzycmne-krdr. A' trnzatutrlru nzesz'tikr drtwrgr badr.

¹² Delc mz nzkqlukr enqmi rgrng, Krka'-ngrgr kx na-amrlzq nigr lr mrnyzm. Murde obla negrng naxplrnelzm mz nzapu-krdr nounc kx xplr. X olvi negrng naxplr-kzng x mztr nalqngi mz nzapu-krdr nctrpou ngr ma nyz king.

¹³ Dalr nrlanc nyzgrng nalvc-angidrng, Murde bxli scgrng nayrbu zvz mz dakxnzng. X animol negrng naeloting Murde neidrng nayrlwrtxne.

¹⁴ X kxnzrmailz rgrng na-ale-zpwxlr nzwz-krdr, Murde leplz ma tztangetrplr drkq ngr mztea nyzgr mz nzvzmi-krdr nigr mrnyzdr, X lr mztea nyzgrng ma tzodalineng mz nzvzdz-krm nelzdr.

¹⁵ Yawe, leplz kcng tqokatrq mz da lcng, sa na-abrtz-ngrdr nzmnc-zpwx-krdr. Murde leplz amrlx kcng tqnginim Gct rdr sa namnc-zpwx-zvzng.