Sam 137 - Natqgu

Sam Kratrtqki-esz'-nzpnu-tq-nrade-rlimz (137) Rblx Nzngr-abrtz-krgr Mz Nzmnc-krgr Bxbilon

¹ Kx dcpx mz drtwrgr nzodatingr Jerusalem, Sc tqyrnipekr mz nzwxbune-krgr mrkzble mz nqlvi r ningaling Bxbilon.

² X gita negrng adotxlzpekrng Mz nounc kx nztung mrlcde.

³ Krkcng tzlolvztilr nigr, tzxtrnga-ngrdr nigr, nzrpimlr bagr kx, “Ngr-ngrmamu du bagr nabz kxtr nemung.”

⁴ A' mz drtwrgr rpikr kx, “Rblx nzngr-abrtz-krbzkr mz Yawe, Mz nzmnc-krgr mz mztea nyz kxtrnzrlxngitiung.

⁵ Murde nzmu kx tqmrbrtitr drtwrnge Jerusalem, Namrbrtitr kz drtwrnge kxmu nzayrni-krnge gita nenge.

⁶ X nzmu kx tqrblx nzdcpx-kaikr Jerusalem mz nabznge, Narblx kz nzngr-krnge nabz ngrdeng.”

⁷ Yawe, nadcpxpwz mz drtwrm alwx ngr lr Edom. Murde mzli kc lr Bxbilon tzodati-ngrdr Jerusalem, Sc tzrpibzlr badr kx, “Odatiamu! Odatiamu x natutx-lxlrngr.”

⁸ Yawe, rlxtibzkr bam nzamrlz-krm ncblo kc naodati-atwrnr-ngrde lr Bxbilon, Mz nzayzlu-krbzle badr da kcng tzwaisr-ngrdr nigr.

⁹ Murde na-abrtz-ngrde nzlolvzti-krde doa lcng, Mz nztamyrtitx-krde nidr.