Sam 135 - Natqgu

Sam Kratrtqki-esz'-nzpnu-tq-nrade-nzlvqn (135) Nigu Nqvi Lr Israel Naglqlzku Yawe Mcpx Gct Nqvi Lr Israel

Nabz kx nzngrnelzngr Jerusalem mz nzangiongr.

^1-2 Naglqlz-zvzku Yawe, Murde nide Gct rgu. X nigu kxnzawz nedeng na-amrlueku nide Mz nzkrka'-krmu mz Mangr-nzangiongr x makoa ngrde.

³ Na-amatqku nide murde mrlz-esz'ngr. X na-angrlvz-ngrgu nide nivz lrde.

⁴ Murde mcpxle nqvi lr Jekop, nigu lr Israel, Mz nzngini-krgu leplz nedeng.

Kxrpalz

⁵ Krlzku kx Kxetu rgu, Yawe, nide Gct kc tqmyatxlz-esz'ngr, Myaszlzle kxnzmncng mzlilxlr amrlx.

⁶ Vz-nqblq-txpwzle me pnz drtwrde mz da kx alele Kxmule-esz' mz bongavz, nrlc, prla, x me boo-ngrng.

⁷ Wz-ngrde zbo nzvzdz-krdr mz lclxlr mz bongavz, X bzlrpc nzvzmi-krm trlipu le. X batrpzle nzwqkr nenq.

Kxaovxio

⁸ Sc tqnibqtile ncblo kx ayrnrngr Ijipt, Kr neng leplz x kr neng animol.

⁹ Rwzngr da kxnzkctipxng kxkqlu mrlcde, Mz nzayrplapx-krde king rdr x kxnzetu nedeng.

¹⁰ Aovxiole lr mrkzbleng kxkqlu Mz nznibqti-krde king kxnzxplr-zlwzng.

¹¹ Krlcng King Sihon, King Og, x kzdu-kzng king Kcng tzaclveng mz drtc' Kenan.

¹² X drtc' nyzdrng katimleng bagu, Nigu lr Israel, da kc tqwai nzpi-krmlele bagu.

Gct Angidr

¹³ Nqmq kr Yawe tqyc tqyc. X nzrkrlzngr drtqde tqvzpe tqvzpe.

¹⁴ Yawe sa napipxbzle mz leplz nedeng kxnzvz-rbrng o trtingr, X sa na-aodu-zvzle nidr.

¹⁵ Kxnzmnc-mrbrng nzangiolr mqngr da kx nzlz, Kcng tzwzngr ncblo mz silvz x gol.

¹⁶ Mqngr da kxnzlz lcng naodr x mztr ycbz, A' trnzycmneung x trnzrmcung da.

¹⁷ Nradrtqdr x nctqdr ycbz, A' trnzxlrung da x trnzycmini-kzung.

¹⁸ Leplz kcng tzrwz-ngrng nzapu-kzlr mqngr lcng. Murde nznabung, trnzobqung, nradrtqdr ngq, x trpnzngr nzlungr badr.

Lr Israel Naglqlzlr Yawe

¹⁹ A' Nigu nqvi lr Israel, naglqlzku Yawe. X nimu pris, nqvi lr Eron, na-amrlue-kzamu nide.

²⁰ X nimu kxnzawz nedeng, nqvi lr Livae, na-amatqamu nide. Nigu amrlx kcng tzamrluelr nide, na-angrlvzku nide.

²¹ Na-angioku Yawe Jerusalem, mz Newz Saeon. Naglqlz-zvzku Yawe.