Sam 13 - Natqgu

Sam Kranzpnu-esz'-nrade-tq (13) ?Yawe, Na-aenzli-alopex Nim?

Nabz ne Devet kx yrbzle mz kxrmailz ngr dzbe kxnzngrng.

¹ ?Yawe, myx kxmule, namrbrtitr-alope drtwrm ninge? ?Namnc-rlru-alopeme bange?

² ?Nelznge navzdz-alopem? ?X drtwrnge navz-alope? ?X namnclz-alopebo mz zmatq ngr enqmi rngeng?

³ Yawe, obqm bange x ayzlum natqnge. Ka-mop bange nzxplr-krnge murde ma tqbzx.

⁴ Bzkq rlr-ngrbzme mz enqmi rngeng nzpi-krdr kx nzaovxiopelr ninge. X bzkq rlr-ngrbzme nzabrtzlvz-krdr nzrnrcti-lzbq-krnge.

⁵ Murde abrtrpo drtwrnge mz nzaodu-krm kc tqyc tqyc. X sa na-abrtz-zlwz-ngrne nzarlapx-krm ninge.

⁶ Yawe, sa nangrbo bam murde amrlz-zlwzpeq ninge. Mz da amrlx kx kame bange, Yawe, sa nangrbo bam.