Sam 116 - Natqgu

Sam Kratrtqki-esz'-nzpnu-esz'-nrade-esz'mz (116) Naglqlzku Yawe Mz Nzxlr-krmle Natqgr Nabz Ngr Nzaovxiongr

^1-2 Yawe xlrmle natqnge. Mrlzti-zlwzx nide. Kqle-zvzx nide. Yawe xlrmle natqnge.

³ Ycpwz pipz nzbz-krnge, x sc tqmwxlr-ngrne. Nabznge talvzo-ngrde ycpwz pipz nzbz-krnge.

⁴ Sc tqkqlepex nide mz nzrpi-krbo bade kx, “Yawe, arlapx ninge!” Sc tqkqlepex nide.

⁵ Zmrlz ngr Yawe myalz-esz'ngr mz nzokatr-krde leplz. Ycngr drtwrde nigu. Zmrlz ngr Yawe myalz-esz'ngr.

⁶ Okatrle kxtrnzxplrung, murde arlapxbzle ninge Mz nzkxpu-krngeng. Okatrle kxtrnzxplrung.

^7-8 Amnc-zpwx-moule ninge. Trmetx-ngrpwc'u mz enqmi. Trbz-ngrneu, tryrni-ngrneu. Amnc-zpwx-moule ninge.

⁹ Navz-nqblq-zvzx nide x me pnz drtwrde. Mz nzmnc-krnge mz nrlc navz-nqblq-zvzx nide.

Nzawingr

^10-11 Kxmule-esz' ycpe pipz nzmwxlrti-lzbq-krnge, A' mzli kc tqkxpu-zlwz-ngrne, Pipxx murde abrtrpo drtwrnge mz Yawe, X krlzx kx mane nzbrtikr drtwrnge leplz.

¹² Kxmule-esz' rblx nzayzlu-krbo mz Yawe Da kxmrlzting kcng tqaletimleng bange,

¹³ A' sa natwzmc bade waen, Nangi dalr nzawi-krbo bade mz nzarlapx-krde ninge.

¹⁴ X sa nakabo bade nike esalz-ngrbo bade, Mz nzangiopx-lxblrkr leplz nedeng.

¹⁵ X napipxbo badr kx, “Drtwr Yawe vztx zlwz Mz nzmc-krde nzbzkr kzdq doa nedeng. Delc tqmrlz-ngrbzle bade nzarlapx-krde nigu, Tqmyaszpx-ngrde nzrlrpx-krde nzbz-krgu.”

¹⁶ Yawe, ninge kxnzawz nem, da kc tqwai lxenge mzli kc. Awi mz nzarlapx-krm ninge mz nzbzngr.

¹⁷ Kabo bam blz kx na-awi-ngrbo bam, Mz nzkrka'-krbo bam.

¹⁸ Delc tqka-ngrbo bam da kc tqesalz-ngrbo bam, Mz mzlir leplz nemqng,

¹⁹ Mz nzamrlue-lxblr-krgr nim Mangr-nzangiongr Jerusalem. Naglqlzku Yawe!