Sam 115 - Natqgu

Sam Kratrtqki-esz'-nzpnu-esz'-nrade-nzlvqn (115) Naglqlzku Yawe Mz Nzngini-krde Gct Angidr Bzkq Angioku Mqngr Drka'

¹ Yawe, nim txpwz kx takitrde nzarmyalzngr, a' trngiu nigr. Murde nim txpwz kx aodu zvz x trataowq natqm kcng tqyrlqq.

² Delc trtakitrdeu lr mrkzbleng nzrpi-zvz-krmlr bagu kx, “?Myxpe Gct rmu?”

³ Murde Gct rgu mncom Heven, X rngisc zmatq ngr nzale-krde nikeng suti drtwrde.

⁴ A' kxnzmnc-mrbrng nzangiolr mqngr da kxnzlz Kcng tzwzngr leplz mz mqdr.

^5-7 A' mqngr da kxnzlz lcng trnzycmneung x trnzobqung. Trnzxlrung, trnzycminiung, X trnzrtcngiung da. Trnzrmaleung x trnzvzneung.

⁸ Leplz kcng tzrwz-ngrng mqngr drka' lcng tzlz X krkcng tzangiolr nidr nzapu-kzlr nidr mz trnzrngisc-krdru zmatq. Nznabung, mztr mwi, nradrtqdr ngq, trnzycngrlrung, Trnzrtcngiung da, trnzxngitrung, x trnzvzneung.

A' Na-angio-txpwzku Yawe Gct Rgu

^9-11 Nimu kcng tzaxvctr-lzbq-kzpqng bagr mz nzangio-krgr Yawe, X nimu pris nedeng mz nqvi lr Eron, X nigu lr Israel amrlx na-abrtrpzku drtwrgu bade. Murde nide temz ngr lomrgu kc tqyrputrngr nipna.

^12-13 Yc zvz mz drtwrde nigu x sa na-amrlz-zvzle nigu. A' sa na-amrlzle nimu kcng tzaxvctr-lzbqmqng mz nzangiongr nide, X nimu nqvi lr Eron, x nigu lr Israel amrlx. Kxmule-esz' nigu leplz txneng o kxnzetung,

^14-15 Krka'-ngrne kx Yawe kc tqwz-ngrde Heven x nrlc Na-amrlz-ebir-ngrde nimu badr doa nemung.

¹⁶ Heven mztea nyz Yawe, A' kamle bagu, nrlc ka.

^17-18 X nigu kxnzlung mz nrlc ka na-awibzku bade, Murde kxnzbzpeng kcng tzyrtzmqpeng mz gq, rblx nzglqlz-krdr nide. Naglqlzku Yawe na-abzo mzli ka x tqvzpe tqvzpe. Naglqlzku Yawe!