Sam 114 - Natqgu

Sam Kratrtqki-esz'-nzpnu-esz'-nrade-pwx (114) Naglqlzku Yawe Mz Zmatq Ngrde

¹ Mzli kc lr Israel nzrlasz-ngrdr Ijipt, Mz nzngini-krdr lr mrkzbleng elr,

² Lr Judz lcng tznginipedr leplz kxnztrng ne Yawe, Mz nzaclve-krde drtc' nyzdr, Israel.

³ Prla Bla akipx-lzbq x pzlzm. X LueJodzn lvxpxbzle lrpzki badr.

⁴ X mzli lc newz x nra nzyameng, Nzapulr nzblc-abrtznekr nei sip.

⁵ ?Myx kxmule, Prla Bla tqakipx-lzbq-ngrde, X LueJodzn tqlvxpx-ngrde lrpzki?

⁶ ?X nike nzyamengr newz x nra amrlx Mz nzapu-krdr nzabrtzkr nei sip?

⁷ Da kcng tqwzngr Yawe nzvz-nqblqlr natqde. Nzelalvzlr nzaelwapx-krde zmatq ngrde, mz nzngini-krde Gct r lr Israel.

⁸ Murde batrpzle nzyrlepx-krm lue mz rplz, Lue lc tqngi aulz mz rplz.