Sam 108 - Natqgu

Sam Kratrtqki-esz'-nrade-rtqmz (108) Mnc-xgle-txpwzkr Nim Mz Na-aovxio-krm Enqmi Rgrng Sa Na-angrlvzx Nim

Nabz ne Devet.

^1-2 Sa na-angrlvzx nim mz nabznge atwrnrngr mz nzayrni-krbo gita bam, Murde abrtr-zvzbo drtwrnge bam. Nilz r nepi adwalzmle ninge mz zbq kang kqlu. A' mz nzdwalz-krmc mz nourla kx topwz, Na-apule nabz nenge adwalzmle nepi, Mzli lc tqglqlzpex nim.

³ Yawe, sa na-awibo bam mz mzlir lr mrkzbleng, X na-angrlvzx nim mz mzlir neidung.

⁴ Murde nzaodu-zvz-krm myalz krlzlzle bongavz, X nzangidati-zvz-krm natqm.

⁵ Lr Heven namclr nzmyalz-esz'ngr-krm, X lr nrlc namclr nzaovxio-krm.

Gct Ayzlu-ngrmle Natqgu

⁶ Mz zmatq ngrm, arlapx nigr kcng tqaodu-zvzq, X ayzlu-ngrme natqgr.

Da Kc Tqpi Gct

⁷ Gct, natqmqng nzvzpxmqng mz Mangr-nzangiongr, mz nzrpi-krdr kx, “Mzli kc na-aovxio-ngrne, sa na-akipxbo mz leplz nengeng Drtc' kcng mz nrlar LueJodzn rlilr.

⁸ Murde neidu lr Gilead nengeng. X nqvi lr Manase nenge-kzng. X neidu lr Efrem tum mz nibrnge. X nqvi lr Judz kx na-aclve-zvzng mz zmatq rnge.

⁹ A' enqmi rmung trna-aovxiolru nimu. Murde lr Moab sa nawztrpqng bange X lr Edom sa nametxmqng bange. X sa namalqlvzx nzmilxtxo-krnge lr Filistia.”

Natq King

¹⁰ ?Gct, sa na-atutrq natqm lc mz nzokatr-krm ninge, Nzprtr-krnge mz lrpalvc ngr mzteadau nyzdr lr Edom?

¹¹ Murde mzli kc axtxpeq nigr, X trokatrwq ami negr mz nzotangr.

¹² Gct, okatrp nigr mz nzota-krgr badr enqmi rgrng mzli ka. Murde mane nzmnc-xgle-krgr ncblo nzarlapx-krdr nigr.

¹³ X krlzkr kx mz nzmnc-krme bagr, Sa narnzlvzokr enqmi rgrng mz nzokatr-krm.