Sam 10 - Natqgu

(10)

¹ Opxm kx mncme rlru, Yawe. Opxm kz kx mnc-kapqq mzli kc tqkxpu-ngrgr.

² Obqm! Kxdrka'ngr glqpx-lzbqmile nzayoti-krde leplz kxnzkxpung. Pnz drtwrnge kx sa namwati-lzbq mz br scde.

³ Pipxle kx nzaotikr drtwrde da kxtrka zlwz ngi da kxmrlz mz nzbilvz-zvz-krdele. Pivxile Yawe x pxtxpx-ngrde nide, a' amrlzle leplz kx nztrkibrng.

⁴ Rblx nzrtangrti-krde Gct murde glqpx-lzbq. Rblx nzrmcti-krde Gct murde mz drtwrde trtxpnzngr Gct.

⁵ Rlr! Xplrmi-zlwzle nzmncngr kxtrka, a' pxtxpx-ngrde me pnz drtwrm. Suti txpwz drtwrde nzyrpalelvz-krde enqmi rdeng.

⁶ Sc tqrpipele kx, “Trpnzngr da kxtrka kx naprtzm bange, X trpnzngr nzodatingr ninge kalr.”

⁷ Sc tqglqlz-zvzle alwx x nzpokiangr. Natqdeng amrlx ngi dalr nzrpikitingr, nzrpibqtingr, x nzrpilzngr.

⁸ Trmrlzu nzmnc-kapq-aepztr-krde mztea mz nzrnibq-krde kx nabzdr lq. Tu zvz mz nzaenzli-krde ncblo kxesz'nebz.

⁹ Tqtu-kapq apule laion kc Tqtcngzpxm mz gq nyzde mz nzkivzti-krde ncblo kx trxplru.

¹⁰ Vz zvz nzxplr-zlwz-krde. Vz zvz nzatrkati-krde nzmnckr kxnzkxpung.

¹¹ Vz-rbr kxdrka'ngr mz nzrpi-krde kx, “Gct trobqpepuu bange. Wzx a' trkrlzleu da kcng trka tqalex.”

¹² Wztitxpxbz nzwzkr ncblo kxdrka'ngr, kx Yawe, mz nzayrplapx-krm nide. Wai-ngrn da lc murde bzkq mrbrtr mz drtwrm kxnzkxpung.

¹³ Wai-ngrdele kxdrka'ngr pxtxpx-ngrde nim. X rpile kx, “Gct trtxpnzngr nzayrplapx-krde ninge.”

¹⁴ Xlqkqamu nimu kxdrka'-ngrng, murde Gct mcle da kxtrka lcng amrlx tqaleamu. X oliqtile nzokatr-krde kxnzkxpung kcng tzrtangrtilr nide. Xlrle nidr murde nide kc tqokatr zvz kxnzobqszong.

¹⁵ Yawe, katxpxbz zmatq ngr kxdrka'-ngrng. Yrpalelvz nidr x ayrplapxng mz da kxtrka kcng tzalelr, navz x naesaki zpwx.

¹⁶ Yawe, nim King. Yc zvz nzaclve-krm nrlc. Yrlqtxpx mz drtc' nyzm krkcng trnzangiolru nim.

¹⁷ Zmatq ngrm etu-esz'ngr, murde krlzpe-kaiq nike narlxtibz kxnztubqng. Zbq kalvz axplrq nidr x kabzme badr nike nzrlxtilr.

¹⁸ Zbo ngr leplz kxnzobqszong x kxnzkxpung, sa na-arlapxbzmeng mz zmatq ngr leplz mz nrlc ka. Zmwxlr amrlx sa na-aesaki-zvzq.