Filimon 1 - Natqgu

¹ Nim la Filimon. Ninge Pol. Ninge ka tqmncx mz presin mz mzteadau Rom murde yapwxtipxbo nrpa ngr Mevalu Jiszs. Nigr mz mzlegi Timoti. Nigu mzle-lzbq mz nzwztr-krbzku mz Gct.

² Rpibz “Nim la,” mz Apfia kc tqngi inwegu mz Kraes, x Akipzs kc tqnginigu badr ncblo ngr vea ne Kraes. X rpi-kzpz “Nimu la,” mz kxnzrlxngiting mrkc mztea Kolosia kcng tqyrlwr-lxblramu badr mz ma nyzm.

³ Krka'-ngrne kx Gct Trtegu x Kxetu rgu Jiszs Kxnzmcpx naka-zvzbzlr bamu nzmnc-zpwxngr x zmrlz ngrdr kxmyalz.

Pol Krka'-ngrde Filimon

⁴ Filimon, awi-zvzbo mz Gct,

⁵ Mz nzxlr-krnge kx lxngitiq Kxetu Jiszs x mrlzti-zvz-kzq kxnzrlxngiting.

⁶ X krka'-ngrne kx nzrlxngiti-krgi naokatrle nim mz nzale-krm da kx narkatrpz mz leplz nzglqlz-krdr Kraes, mz nzmc-krm kxmu nzamrlz-zlwz-krde nim.

⁷ X abrtzlvzx nim mz nzxlr-krnge kx nivz lrm apqtr-zvzle nabz leplz neng Gct.

Filimon Naipqle Kxnzawz Nede Kc Drtqde Onesimzs

^8-10 Mzlenge, mz nzngini-krnge aposol ne Mevalu Jiszs, rngiscnge zmatq mz nzrtulrtr-krbo bam nzale-krm da kxtubq. Kxmule-esz', a' rlxtibo bam nzipq-krm Onesimzs murde mrlztiq ninge. Ninge lrtzlvz Pol kc tqmnc mz presin murde vz-nqblqx Mevalu. Mz nzmncpx-krmc lc mz presin, okatrx Onesimzs mz nzlxngiti-krde Jiszs, x mzli ka apupele mrlxnge.

¹¹ Mzli kc ena nzmc-krm nide ngi brmrda. A' mzli ka sa namcpeq kx na-atutrpele drtwr ngr drtqde. Murde Onesimzs drtwr ngrde ‘kxabrngz’ x sa naokatrle nigi.

^12-13 Pq zlwz mz nabznge x mrlzm bange nzyzlu-krmle mrka mz nzwztr-krmle bange. Murde naokatrle ninge da kc nawai nzokatr-krm ninge nzmu namncq mrka. Kxmule-esz', a' na-ayzlu-kaipo nide bam.

¹⁴ Murde trmrlzu nzmnc-krde mrka, nzmu trnavzpxpleu bam. Trmrlzu nzrtulrtr-krbo bam nzale-krm da kx mrlzm bange.

¹⁵ Mwx rlr-ngrbz Gct nzdwasz-krde nim mzli kxmrbc, murde mz nzyzlu-krbzle bam namnctr-alopebz bam.

¹⁶ X mz nzyzlu-mou-krpwzle, trnangi-txpwzu kxnzawz nem, a' nangipe kz mzlem mz Kxetu rgu. Mrlzti-zlwzx nide. X krlz-kzx kx nzmrlzti-krm nide namyapx-zlwzbz mz nzngini-krde kxnzawz nem x mzlem.

¹⁷ Mz nzmu-krde lcde, nide kz kztegu. X suti drtwrnge kx na-apusr-ngrn nide da kc tqwaisr-ngrn ninge.

Filimon Bzkq Rlx Trau Mz Nikeng Oti-rbrbz Onesimzs Bade

^18-19 Ninge Pol, yrx natq lcng mz mqnge esz'-krnge kx, “Suti drtwrnge nzxpe-ngrbz bam mz nzvz-nqblq-krde nikeng oti-rbrbz Onesimzs mz nzka-niwzlr-krbo bam trau kznike takitrde.” Kxmule-esz', a' mrlzm bange kx bzkq rlxq trau mz nikeng oti-rbrbzle bam. Murde da kx rtrngztibo bam mz nzokatr-krnge nim mz nzlxngiti-krm Jiszs, myaszpx-zlwzle trau kcng narlxtibzme mz Onesimzs. A' navz-nqblqle drtwrm.

²⁰ Delc, mzlenge, okatr ninge mz nzale-krm da kx rlxtibo bam x mz nzayzlu-krme Onesimzs bange, murde na-apqtrpe' nabznge mz Kraes.

²¹ Krlz-angidrx kx sa navz-nqblqq natqnge x nzaodu-krm nide sa namyaszpxle da kcng tqrlxtibo.

²² X kzdq mou da. Lxngitix kx Gct sa na-atutrle nzkrka'-krmu mz nzvzpx-krmc mz presin. Delc, mzli ka oliqtibz dq me namnc-ngrne mzli kc nayzlu-ngrbzkr.

Natq Ngr Nzarlr-lzbqngr

²³ Kxnzrlxngiting mrka nzrpibzlr bam kx, “Nim la.” Krlcng Epafras kc tqmnckr ncdr mz presin mz nzrlepx-krgr Nrpa ngr Mevalu Jiszs,

²⁴ nidr badr Mak, Aristakzs, Demas, x Dckta Luk, mrlx kcng tqwzkr badr.

²⁵ Krka'-ngrne kx zmrlzkxmyalz ngr Kxetu rgu, Jiszs Kxnzmcpx, nayc zvz mz nabzmu. Delape. Ninge Pol.