2 ಯೊಹಾನ 1 - ಕ್ಹುದಾನಿ ಕ್ಹರಿನಿ ವಾಕ್ಯಾ

¹ ಸಭೆಮಾ ಮ್ಹೊಟೊ ಥಯಲ ಮಿ ಯಾವೊನೆ ವರಿ ತ್ಯುನಾ ಬಚಾವೊನೆ ಬರ್ದಾನು ಸುವೈ ಕದ್ಯಾಮ; ಅಪ್ನೊಮಾ ರ‍್ಹಯಲ ವರಿ ಅಪ್ನಾ ಕ್ಹಾತೆ ಕೆಳಾಮಾಬಿ ಹಮೆಶಾಬಿ ಅಪ್ನಾ ಕ್ಹಾತೆ ರ‍್ಹವಾನು ಕ್ಹರಿನಾ ಹುತಿ ಮಿ ತುಮೊನೆ ಕ್ಹರಿಕ್ಹು ಮಯಾ ಕರುಸ; ಮಿ ಯಕ್ಕಜ಼ ನೈ ಮಾರಾ ಕ್ಹಾತೆ ಕ್ಹರಿ ಸು ವ್ಹೈ ಕೈನ ತಿಳಿದಿಲಿದಲ ಕ್ಹಾರಾಜ಼ನಾ ತುಮೊನೆ ಮಯಾ ಕರಸ.

² ಹಮಾರಾ ರಹೆಲ ವರಿ ಹರ ಯಕ್ಕ ವತ್ಕ ರ‍್ಹವಾಹು ಕ್ಹರಿನಾಹುತಿ, ಮಿ ತಮನೊನೆ ಕ್ಹರಿಜ ಮಯಾ ಕರುಸ. ಮಿ ನೈಸೊ ಕ್ಹರಿನೆ ಕುನ ಮಯಾ ಕರಸ ತಮನೊನೆ ಬಿ ಮಯಾ ಕರಸ.

³ ಬಾ ಥಯಲ ಕ್ಹುದಾಕ್ಹು, ಕ್ಹುದಾನೊ ದಿಕ್ರೊ ಥಯಲ ಯೆಸು ಕ್ರಿಸ್ತಕ್ಹು, ಕೃಪೆ, ಮರಗಾ, ಶಾಂತಿ, ಕ್ಹರಿ, ಮಯಾ ಹರ ಯಕ್ಕ ವಕ್ಹತ ಅಪ್ನಾ ಕ್ಹಾತೆ ರ‍್ಹವಾದೆ.

ಕ್ರಿಸ್ತ ಕದಲ ಲಿಂಗತ ಚಾ಼ಲಾನು

⁴ ಬಾ ಕ್ಹು ಹಮೆ ಹೊಂದಿಲಿದೆಲ ಆಜ್ಞಾಕ್ಹು, ಪ್ರಕಾರ ತಮಾರಾ ಬಚಾವೊಮಾ ದಕ್ಹಜ಼ನಾ ಕ್ಹರಿನಾಜ ಥೈನ ಚಾ಼ಲಾನು ದೆಕಿನ ಮಿ ಘನೊ ಖುಶಿ ಥಯೊ.

⁵ ಮಾರಿ ಮಾವೊ, ಮಿ ತಮನೊನೆ ನಯಾ ಆಜ್ಞಾ ಬರದೆವಾಚಿ ಪೈಲಾತೊಜ ಹಮನೊನೆ ರ‍ಹೆಲ ಆಜ್ಞಾ ತಮನೊನೆ ಬರ್ದಾಲೊ ಥೈನ; ಅಪೆ ಯಕ್ಕನೆ ಯಕ್ಕ ಮಯಾ ಕರಾಲಾ ಥೈನ ಕೈನ ತಮನೊನೆ ಕನ ಮಾಂಗಿಲ್ಯುಸ.

⁶ ಕ್ಹುದಾನಿ ಆಗನ್ಯಾನೆ ಕಾಯಿದಿಲಿನ ವಿಧೆಯತೆ ಥೈವಾನುಜ ಮಯಾ ವ್ಹೈ. ಮಾಯಾ ಚಾಲಾವಾಲಾ ವ್ಹೈ ಕೈನ ತಮೆ ಪೈಲಾತಾ ಪುಚೆಲ ಆಜ್ಞಾ ಥೈಸು.

⁷ ಕಾಕದ್ಯಾಮ ಯೆಸುಕ್ರಿಸ್ತ ಮನಕ್ಹ ಥೈನ ಆಯೊ ಕವಾನು ಒಪೆವಾಚಿ ರಹೆಲ ದಕ್ಹಜ಼ನಾ ಮೊಸ ಕರಾವಾಲಾ ದುನಿಯಾಮ್ಮಾ ಆಯಾತ್ತಾ. ಹವಾಜ ಯೆಸುನೆ ಒಪೆವಾಚಿ ಮೊಸ ಕರಾವಾಲಾ ಕ್ರಿಸ್ತನಾ ವಿರೊದಿಯೊ ಥಯಾಸ.

⁸ ತಮೆ ಮ್ಹೈನತ ಕರಿನ ಕರಲ ಜುವೈಲೆವಾಚಿ ಪುರ್ಣ ಪ್ರತಿಫಲ ಹೊಂದಿಲಿವಾನಾ ಹುತಿ ಹುಶಾ ರ‍್ಹೈ.

⁹ ಕ್ರಿಸ್ತನ ಉಪದೆಶಮಾ ನೈ ಘಟ ರ‍್ಹಯೆಲವಾಲಾವೊನೆ ತಿನೆ ದಾಟಿ ಜಾ಼ವಾಲಾವೊನೆ ತ್ಯುನಾ ಕ್ಹಾತೆ ಕ್ಹುದಾ ರ‍್ಹತೊ ನೈ. ತೆ ಉಪದೆಶಮಾ ಘಟ ರಹವಾಲಾವೊನಾ ಕ್ಹಾತೆ ಬಾ ಬಿ ರ‍್ಹವಸ ವರಿ ದಿಕ್ರೊ ಬಿ ರ‍್ಹವಸ.

¹⁰ ತೆ ಉಪದೆಶ ದಾಟಿ ಜಾ಼ವಾ ವಾಲಾ ಕುನಬಿ ತಮನೊ ಕನ ಆಯಾಮ್ಮಾ ತಿನೆ ಘರಾ ನಕೊ ಲ್ಯು ಕೈನ ತಿನೆ ಚೊ಼ಕು ಥಾವಾದೆ ಕೈನ ಕೌನೈ.

¹¹ ಕಾಕದ್ಯಾಮ್ಮ ತಿನೆ ಚೊ಼ಕು ಥಾಂವಾದೆ ಕೈನ ಕವಾನು ತೆ ಕಟ್ಟಕಾಮೊಮ್ಮಾ ವಾಟೊ ಲಿವಾಲೊ ಥೈವಸ.

ಲಾಸ್ಟನಾ ವಾತೊ

¹² ತುಮೊನೆ ಬರ್ದಾನಾ ಹುತಿ ಮನೆ ಘನಿಯೊ ವಿಷಯೊ ರ‍್ಹೈತಬಿ ತಿನೆ ಮನಸಕ್ಹು ಕಾಗತಪರ ಬರ್ದಿನ ತಿಳಸಾನಾ ಹುತಿ ಮನೆ ಮನಸ ನತ್ತಿ. ತಿನಾಹುತಿ ಮಿ ತುಮಾರಾ ಕ್ಹಾಜ ಬೊಲು ಕೈ ಮನಸ ಛೆ. ತೆಳಾಮಾ ತುಮಾರು ಕ್ಹುಶಿ ಪರಿಪುರ್ಣ ಥಾವಸ.

¹³ ತಾರಿಯೊ ಭೆನೊನಾ ಬಚ್ಚಾ ತುನೆ ವಂದನೆ ಕವಾಡ್ಯಾಸ.