ယောဟန် 18 - ဓမ္မသစ်ကျမ်း ရခိုင်ဘာသာစကား

ယေသျှုကို ဖမ်းဆီးကြခြင်း

¹ ယေသျှုသည် ဤသို့ ဆုတောင်းတော်မူပြီးလျှင် တပည့်တော်ရို့နှင့်အတူ ထွက်ခွာလာပြီးနောက် ကေဒြုန်ချောင်းကို ဖြတ်ကြ၍ ထိုအရပ်၌ဟိသော ဥယျာဉ်တစ်ခုထဲသို့ ဝင်ကြ၏။

² ထိုနီရာကား ယေသျှုသည် တပည့်တော်ရို့နှင့် အကြိမ်များစွာ တွိ့နိန်ကျ နီရာတစ်ခု ဖြစ်သောကြောင့် သစ္စာဖောက် ယုဒသျှာကာရုတ်သည်လည်း ထိုအရပ်ကို သိ၏။

³ ထို့ကြောင့် ယုဒသျှကာရုတ်သည် ယဇ်ပုရောဟိတ်အကြီးအကဲရို့နှင့် ဖာရိယှဲရို့က စီရွှတ်လိုက်သည့် ဗိမာန်တော်အစောင့်စစ်သားတချို့နှင့် ရောမစစ်သားများကို သူနှင့်အတူ ခေါ်လာကာ ထိုဥယျာဉ်သို့ ရောက်လာ၏။ သူရို့သည် မီးအိမ်၊ မီးတုတ်နှင့် လက်နက်များကို ကိုင်ဆောင်လာကြ၏။

⁴ ယေသျှုသည် မိမိ၌ ဖြစ်လာမည့် ဤအကြောင်းအရာအားလုံးကို ကြိုတင်၍ သိတော်မူပြီး ဖြစ်သောကြောင့် သူရို့ထံပါးသို့ လားကာ “သင်ရို့သည် ဇာသူ့ကို ရှာနိန်ကြသနည်း” ဟု မိန်းတော်မူ၏။

⁵ သူရို့က “နာဇရက်မြို့သား ယေသျှု” ဟု ပြောကြ၏။ ကိုယ်တော်က “ငါသည် ထိုသူပင် ဖြစ်၏” ဆိုလေ၏။ သစ္စာဖောက် ယုဒသျှကာရုတ်သည် ထိုအရပ်၌ဟိသောသူရို့နှင့်အတူ ရပ်လျက်ဟိ၏။

⁶ ယေသျှုက “ငါသည် ထိုသူဖြစ်၏” ဟု သူရို့ကို ပြောလိုက်သောအခါ သူရို့သည် နောက်သို့ လန်၍ မြီကြီးသို့ လဲကျလားကြ၏။

⁷ “သင်ရို့သည် ဇာသူ့ကို ရှာနိန်ကြသနည်း” ဟု ယေသျှုက တဖန် မိန်းပြန်၏။ “နာဇရက်မြို့သား ယေသျှု” ဟု သူရို့က ပြောကြပြန်၏။

⁸ “ငါသည် ထိုသူဖြစ်သည်ဟု သင်ရို့ကို ပြောပြီးပြီ။ သင်ရို့သည် ငါ့ကို ရှာနိန်ကြလျှင် တခြားလူတိကို ပြန်ရွှတ်လိုက်” ဟု ယေသျှုက ပြော၏။

⁹ ဤသို့ ပြောရခြင်းမှာ “အို အဖ၊ ငါ့ကို ပီးထားသောသူတိအားလုံး တစ်ယောက်မျှ မပျက်စီးပါစီကေ့” ဟု သူပြောထားသော စကားသည် ပြည့်စုံလာစီခြင်းငှာ ဖြစ်၏။

¹⁰ ဒါးကိုလွယ်ထားသည့် သျှိမုန်ဟု ခေါ်သော ပေတရုသည် ဒါးကို ဆွဲထုတ်ကာ ယဇ်ပုရောဟိတ်မင်း၏ ကျွန်တစ်ယောက်ကို ခွတ်လိုက်သဖြင့် သူ၏ လက်ယာဖက် နားရွက်သည် ပြတ်လားလေ၏။ ထိုကျွန်၏အမည်ကား မာလခု ဖြစ်၏။

¹¹ ယေသျှုက “သင်၏ဒါးကို ဒါးအိမ်၌ ပြန်ထားလိုက်။ ငါ၏ခမည်းတော်ပီးသော ဒုက္ခခွက်ဖလားကို ငါသည် မသောက်ဘဲ နိန်ရမည်လော” ဟု ပေတရုအား ပြော၏။

ယေသျှုကို အန္နတ်မင်းထံပါးသို့ ပို့ဆောင်ခြင်း

¹² ထို့နောက် ရောမစစ်သားတိနှင့် စစ်သူကြီးတိ၊ ယုဒလူမျိုး အစောင့်စစ်သားရို့သည် ယေသျှုကို ဖမ်းဆီး၍ ကြိုးနှင့်တုပ်ပြီးလျှင်

¹³ အန္နတ်မင်းရှိ့မှောက်သို့ ယူဆောင်လာကြ၏။ အန္နတ်မင်းကား ထိုနှစ်တွင် ယဇ်ပုရောဟိတ်မင်းအဖြစ် ဆောင်ရွက်နိန်သည့် ကယာဖ၏ယောက္ခထီးဖြစ်၏။

¹⁴ ထိုကယာဖသည်ကား လူအားလုံးအတွက် လူတစ်ယောက်က အသီခံပီးလျှင် သာ၍ ကောင်းပေ၏ဟု ယုဒလူမျိုး ခေါင်းဆောင်ရို့အား အကြံပီးခဖူးသော သူတစ်ယောက် ဖြစ်လေ၏။

ပေတရုက ယေသျှုကို ငြင်းဆိုခြင်း

¹⁵ သျှိမုန် ပေတရုနှင့် အခြားသော တပည့်တော် တစ်ယောက်သည် ယေသျှုနောက်သို့ လိုက်ပါကြလေ၏။ ထိုအခြားသော တပည့်တော်သည် ယဇ်ပုရောဟိတ်မင်းနှင့် သိကျွမ်းသဖြင့် ယေသျှုနှင့်အတူ လိုက်၍ ယဇ်ပုရောဟိတ်မင်း၏ အိမ်ခြံဝင်းသို့ ဝင်လေ၏။

¹⁶ ပေတရုသည် ယဇ်ပုရောဟိတ်မင်း အိမ်ခြံဝင်း၏ တန်းခါးအပြင်၌ ရပ်လျက်နိန်စဉ် ထိုတပည့်တော်သည် ထွက်လာကာ တန်းခါးတွင် စောင့်နိန်သော အစီခံမိန်းမအား ပြောဆို၍ ပေတရုကို အိမ်ထဲသို့ ခေါ်သွင်းလာ၏။

¹⁷ တန်းခါးစောင့်မိန်းမက “သင်သည်လည်း ယေသျှု၏တပည့်တော် တစ်ယောက်ဖြစ်သည် မဟုတ်လော” ဟု မိန်းသောအခါ၊ ပေတရုက “ငါ မဟုတ်” ဟု ဖြေ၏။

¹⁸ ချမ်းအီးသောကာလ ဖြစ်သဖြင့် အစီခံများနှင့် အစောင့်စစ်သည်များသည် မီးသွီးမီးဖို တစ်ခုကို ဖို၍ ပတ်လည်ဝိုင်းကာ ရပ်လျက် မီးလှုံနိန်ကြ၏။ ပေတရုသည်လည်း သူရို့နှင့်အတူ မတ်တပ်ရပ်လျက် မီးလှုံလျက်နီ၏။

ယဇ်ပုရောဟိတ်မင်းက ယေသျှုအား စစ်ဆီးခြင်း

¹⁹ ယဇ်ပုရောဟိတ်မင်းက ယေသျှု၏ တပည့်တော်တိအကြောင်းကို လည်းကောင်း၊ သူ၏ သွန်သင်မှုများအကြောင်းကို လည်းကောင်း စစ်ဆီးမိန်းမြန်း၏။

²⁰ ယေသျှုက “ငါသည် လောကလူအပေါင်းရို့ ရှိ့တွင် ထင်ရှားစွာ ဟောပြောခ၏။ ယုဒလူတိ စုဝေးကြသော ဗိမာန်တော်၌ သို့မဟုတ် တရားဇရပ်များ၌ အစဉ်မပြတ် ဟောပြောသွန်သင်ခ၏။

²¹ ဇာကြောင့် ငါ့ကို မိန်းနိန်ရသနည်း။ ငါဟောပြောခသော ငါ၏သွန်သင်မှုများကို ကြားထားပြီးသောသူတိအား မိန်းမြန်းကြည့်ကြလော့” ဟု ဆို၏။

²² ယေသျှုက ဤသို့ မိန့်တော်မူသောအခါ ထိုနီရာ၌ဟိသော အစောင့်စစ်သည်တစ်ယောက်က “သင်သည် ယဇ်ပုရောဟိတ်မင်းကြီးကို ဤသို့ ပြောဆိုရဲသလော” ဟု ဆို၍ ပါးကို သတ်လေ၏။

²³ ယေသျှုက “ငါပြောသည့်စကား မှားသည်ဆိုလျှင် ဤအရပ်၌ဟိသော လူတိုင်းကို မိန်းကြည့်ကြလော့။ ငါပြောသည့်စကား မှန်လျက်သားနှင့် ငါ့ကို ဇာဖြစ်လို့ သတ်ရသနည်း” ဟု ပြန်ပြော၏။

²⁴ ထို့နောက် အန္နတ်မင်းသည် ကိုယ်တော့်ကို တုပ်နှောင်ထားသည့်အတိုင်း တုပ်နှောင်ကာ ယဇ်ပုရောဟိတ်မင်းကြီး ကယာဖထံပါးသို့ ပို့လိုက်လေ၏။

ပေတရုသည် ယေသျှုကို တဖန် ငြင်းဆိုခြင်း

²⁵ သျှိမုန်ပေတရုသည် ထိုနီရာ၌ မတ်တပ်ရပ်ကာ မီးလှုံလျက်ဟိ၏။ “သင်သည်လည်း ထိုသူ၏ တပည့်တစ်ယောက် ဖြစ်သည် မဟုတ်လော” ဟု တခြားလူတိက သူ့ကို မိန်းကြ၏။ ပေတရုက “ငါ မဟုတ်ပါ” ဟု ငြင်းဆိုလေ၏။

²⁶ ပေတရု ဒါးနှင့် ခွတ်၍ နားရွက် ပြတ်လားသောသူ၏ ဆွီမျိုးတစ်ယောက်ဖြစ်သည့် ယဇ်ပုရောဟိတ် ကျွန်တစ်ယောက်က “သင်သည် ဥယျာဉ်ထဲ၌ သူနှင့်အတူ ဟိသည်ကို ငါမြင်ခသည် မဟုတ်လော” ဟု မိန်း၏။

²⁷ ပေတရုက “ငါ မသိ” ဟု တဖန်ထပ်၍ ငြင်းပြီးသည်နှင့် — ချက်ချင်း ကြက်တွန်လေ၏။

ယေသျှုကို ပိလတ်မင်း၏ထံပါးသို့ ပို့ဆောင်ခြင်း

²⁸ မိုးထစောစောတွင် ယေသျှုကို ကယာဖအိမ်မှ ဘုရင်ခံ၏ အိမ်တော်သို့ ယူဆောင်လားကြ၏။ ယုဒဘာသာရေး ခေါင်းဆောင်ရို့သည် ပသခါပွဲကို ခံယူခြင်းငှာ ဘာသာတရားဆိုင်ရာ ညစ်ညူးခြင်း မဖြစ်စီခြင်းငှာ အိမ်တော်ထဲသို့ သူရို့ကိုယ်တိုင် မဝင်ကြပေ။

²⁹ ထို့ကြောင့် ပိလတ်သည် သူရို့ဟိရာ အိမ်အပြင်သို့ ထွက်ပြီးလျှင် “ဇာအပြစ်နှင့် စွပ်စွဲပြီးကေ ဤသူကို ခေါ်လာကြသနည်း” ဟု မိန်းသော်၊

³⁰ “အကျွန်ရို့သည် ဤသူကို ပြစ်မှားခြင်း မဟိဘဲ ခေါ်လာကြသည် မဟုတ်ပါ” ဟု သူရို့က ပြောကြ၏။

³¹ ပိလတ်မင်းက “ဤသူကို သင်ရို့၏ ပညတ်တရားအတိုင်း သင်ရို့ကိုယ်တိုင် တရားစီရင်ကြလော့” ဟု ပြော၏။ ယုဒလူရို့က “အကျွန်ရို့သည် မည်သူ့ကိုမျှ အသီသတ်ပိုင်ခွင့် မဟိပါ” ဟု ပြန်ပြောကြ၏။

³² ဤသည်ကား မိမိသည် မည်သို့သော သီခြင်းမျိုးနှင့် သီရမည်ကို ယေသျှုပြောခသည့် စကားအတိုင်း ပြည့်စုံစီခြင်းငှာ ဖြစ်၏။

³³ ပိလတ်သည် အိမ်တော်ထဲသို့ ပြန်ဝင်၍ ယေသျှုကို ခေါ်ပြီးလျှင် “သင်သည် ယုဒလူမျိုး၏ သျှင်ဘုရင်လား” ဟု မိန်း၏။

³⁴ “ဤမိန်းခွန်းသည် မင်းကြီး၏ စကားလား သို့မဟုတ် တခြားလူတိက မင်းကြီးအား ငါ့အကြောင်းကို လျှောက်ကြသလော” ဟု ယေသျှုက မိန်းတော်မူ၏။

³⁵ ပိလတ်မင်းက “သင် ငါ့ကို ယုဒလူမျိုးဟု ထင်မှတ်နိန်လား။ သင်ရို့လူမျိုးတိနှင့် ယဇ်ပုရောဟိတ်အကြီးအကဲရို့က သင့်ကို ငါ့ပါးသို့ လာရောက်အပ်နှံကြ၏။ သင်သည် မည်သို့ ပြုလုပ်ခသနည်း” ဟု ပြန်ပြောလေ၏။

³⁶ ယေသျှုက “ငါ၏ နိုင်ငံတော်သည် ဤလောကနှင့် မသက်ဆိုင်၊ ဤလောကနှင့် သက်ဆိုင်လျှင် ငါ၏လူရို့သည် ငါ့ကို ယုဒအာဏာပိုင်တိ လက်ထဲသို့ မရောက်ရအောင် တိုက်ခိုက်ကြလိမ့်မည်။ သို့ရာတွင် ငါ၏နိုင်ငံတော်သည် ဤအရပ်နှင့် မသက်ဆိုင်” ဟု မိန့်တော်မူလေ၏။

³⁷ ပိလတ်မင်းက “သို့ဖြစ်လျှင် သင်သည် သျှင်ဘုရင်တစ်ပါး ဖြစ်ပါသလော” ဟု မိန်းပြန်၏။ ယေသျှုက “ငါသည် သျှင်ဘုရင်တစ်ပါးဖြစ်သည်ဟု သင်ဆို၏။ ငါသည် သမ္မာတရားကို သက်သီခံခြင်းငှာ ဤလောကထဲ၌ မွီးဖွားခြင်းကိုခံ၍ ဆင်းသက်လာ၏။ သမ္မာတရားနှင့် သက်ဆိုင်သောသူတိုင်းသည် ငါ့စကားကို နားထောင်ကြ၏” ဟု မိန့်တော်မူ၏။

³⁸ “သမ္မာတရားဆိုသည်မှာ ဇာလဲ” ဟု ပိလတ်မင်းက မိန်း၏။ ပိလတ်မင်းက ယုဒလူမျိုးတိထံသို့ ပြန်လာပြီးလျှင် “ဤသူကို ပြစ်ဒဏ် ပီးစရာအကြောင်း ငါတစ်ခုမျှ မတွိ့။

ယေသျှုကို သီဒဏ် စီရင်ခြင်း

³⁹ သို့သော်လည်း ပသခါပွဲချိန်၌ ငါသည် သင်ရို့အတွက် အကျဉ်းသားတစ်ယောက်ကို လွှတ်ပီးသော သင်ရို့၌ ထုံးစံဟိသည်အတိုင်း ယုဒလူမျိုးများ၏ သျှင်ဘုရင်ကို သင်ရို့အတွက် ရွှတ်ပီးလိုကြသလော” ဟု မိန်းသော်၊

⁴⁰ သူရို့က “ဤသူကို မလွှတ်ပီးပါကေ့။ ဗာရဗ္ဗကိုသာ ရွှတ်ပီးပါ” ဟု ပိလတ်အား အော်ဟစ်၍ တောင်းဆိုကြ၏။ ဗာရဗ္ဗသည်ကား လူဆိုးဒါးပြ တစ်ယောက်ဖြစ်လေ၏။