रोमियो 7 - सत मारग पर चलन वारो किताब

बिस्वासी को मोसे को नियम को लाय मरनो

¹ अगो भाऊहुन! सहि मा का तुमी समजा सेव? जबा तकन मानूस को जिंदगी सेत तबा तकन च वोको लाय कानून सेत। का तुमी नही जानासो?

² समजन को लाय यो उदाहरन सेत। काहेका सादि-सूदा भी मोसे को नियम को लक आपरो मरद को जित्तो जी वोको लक बन्धो रव्हसेत। पर यदि वोको मरद मर जावासे, तबा वा आपरो मरद लक सूट जासेत।

³ एकोलाय यदि कोनी बायका आपरो मरद को जित्तो जी वा कोनी दुसरो मरद को भई जाय। ता वोला छिनाल कव्हा सेत। तरी वोको मरद मर जाय तो वा मोसे को नियम अनुसार वा वोको लक वोको लक सूट गई, अना कोनी दुसरो मरद को भई जाय तो कोनी पाप नाहती।

⁴ अगो मोरो भाऊ हुन असोच मसीह को देह को लक तुमी कानून को लाय मर गयो सेव। एकोलाय अबा तुमी कोनी दुसरो लक नातो जोड़ सका सेव। वोको लकजोन मरयो हुया लक मंग जित्तो भयो सेत। जोन लक अमी परमेस्वर को लाय साजरो काम कर सकत।

⁵ जबा अमी मानूस को जसो जिंदगी बितावा सेत। ता कानून लक दियो गयो पाप को लालच आमरो देहमा काम करा सेत। अना येको आखीर मौत से।

⁶ तर अबा कानून लक सूटकारा भेटयो सेत। काहेका जोन कानून ना अमीला बांधयो होतो वोको काजी अमी मर गयो सेत। अना अबा, जूनो लिख्यो कानून लक नही, बल्कि आतमा को नवा रीत लक अमी आपरो मालिक को सेवा करा सेजन।

पाप अना नेम

⁷ अमी काजक कव्हबीन? का कानून खुदच पापी से बिलकूल नही! पर यो कानून होतो जोन ना सांगयो का पाप काजक सेत? अगर कानून यो नही सांगयो होतो का लोभ नोको करो, तो मोला मालूम नही होतो का लोभ करनो पाप सेत।

⁸ पर पाप ना डाव चोवके हुकूम लक, मोरो मा, सब परकार को लोभ पैदा करीस। काहेका बिना मोसे को नियम को पाप मुरदा से।

⁹ मी तो मोसे को नियम बिना पयले जित्तो होतो। पर जबा हुकूम आयो तबा पाप जी गई, अना मी मर गयो।

¹⁰ अना वोच हुकूम जेन जीवन को लाई होती। मोरो लाय मरन को कारन बनी।

¹¹ काहेका पाप ना मौका पायके हुकूम लक मोला बहकायो, अना वोको लक मोला मार डाख्यो।

¹² एकोलाय मोसे को नियम पवीतर सेत, अना हुकूम भी न्याय अना भला सेत।

¹³ तो का उ जोन साजरो होती। मोरो काजी मरनो को कारन बनी? कभी नही! पर पाप वोना साजरो चीज लक मोरो लाय मरनो पैदा करनवारा बनी। का वोको पाप पूढा चोवयेती। अना हुकूम को लक पाप गजब बेकार साबीत भई जाये।

¹⁴ काहेका अमीला मालूम सेत, का कानून तो आत्मिक सेत। अना मी हाड़-माँस को मानूस सेऊ। जोन पाप को हात बिकयो गुलाम सेऊ।

¹⁵ मोला मालूम नाहती, मी काजक करा सेऊ। काहेका जोन मी करनो चाव्हअ सेऊ, मी नही करा सका सेऊ। पर जोन लक मोला घिरना आवा सेत, वोच काम मोरो लक होवासेत।

¹⁶ यदी मी जोन नही चव्हासू, अना वोच करासू, तो मी मान लेवसू का कानून साजरो सेत।

¹⁷ एकलाय मी सहीमा उ नही सेऊ। जो असो काम करा सेत। बल्कि यो वा पाप सेत। जोन मोरोमा रव्हसेत।

¹⁸ मोला मालूम सेत। का नेकी मोरो मा नाहती। मजे मानूस को सुभाव मा। भलो मोरो मनमा साजरो करन को मरजी सेत। परअ मी साजरो नही कर सका सेऊ।

¹⁹ वा नेकी को काम जो मी करनो चाव्हसू, नही करा सका सेऊ, पर मी बदी करा सेऊ जोन मी करनो नही चाव्हसू।

²⁰ अबा मी जोन नही चव्हासू वोच करासू तो करनवारा मी नही सेव। पर पाप जोन मोरो मा बसो हुवो सेत।

²¹ एकोलाय मी आपरो आपमा यो नियम चोवअ सेऊ। जबा मि नेकी करनो चाव्हसू, ता मोरो मा बदी चोवासेस।

²² मी यो भीतर को परमेस्वर को नियम लक खुस सेऊ।

²³ तर मोरो देहमा काम करन को एक बेगरो कानून चोवअ सेत। एक असो कानून जोन वोना कानून को खिलाफ लड़अ सेत। जोनला मोरो डिमाक मंजूर करा सेत। यो मोला पाप को कानून कोलाय कैदी बनावा सेत। जोन मोरो देहमा काम करा सेत।

²⁴ मी एक दुखी मानूस सेऊ! मोला यो देह लक कउन सोड़ाहेत? जोन मोला मरासेत।

²⁵ परमेस्वर को लाय धनवाद जोन आमरो पिरभू यीसु मसीह कोलक यो करा सेत। मंग मोरो यो हालत सेत। आपरो दम मा मी आपरो मन लक सिरप परमेस्वर को कानून को सेवा करा सका सेऊ। जबकि मोरो आदत मा पाप को कानून काम करा सेत।