योहन 11 - सत मारग पर चलन वारो किताब

लाजर को मरनो

¹ एक आदमी को नाव लाजर होतो, उ आपरो बहिन मरियम अना मारथा को संग बैतनिय्याह नगर मा रव्हत होतो, उ बिमार भई गयो।

² या वाच मरियम से, जेना पिरभू पर इतर डाकके ओको पाय ला चुन्दी लक मलन लगीन। वोको भाऊ लाजर बीमार होतो।

³ एको लाई ओकी बहिन गीनना ओको जवर खबर धाड़िन, “ओ पिरभू, अता चोव, जेनको लक तु माया राखसेस, उ बीमार पड़यो से।”

⁴ यो आयक के यीसु ना कहीस, “यो बीमारी मरन लाय नहाय, पर परमेस्वर की महिमा लाय भईसे, जेनालक परमेस्वर को टूरा की महिमा होय।”

⁵ यीसु मारथा, ओकी बहिन अना लाजर सब लक माया राखत होतो।

⁶ जबा ओना आयकिस की लाजर बीमार से, तबा उ जहान होतो उतच दुई दिवस अखीन रूकयो।

⁷ तबा उ चेला गीन लक कहीस, “आव आमी यहुदिया ला चलबीन।”

⁸ चेला गीनना कहिन, “गुरू, अबा तो यहूदी तोला गोटा मारत होतीन, अना अबा तु उता जावासेस?”

⁹ यीसु ना जवाब देईस, “का दिवस मा 12 तास नही होवासे? अदी कोनी दिवस-दिवस मा चलासे ता खोद्दा नही खावासे, काहेकि यो जगत को उजाड़ो चोवासे।

¹⁰ पर अदी कोनी राति मा चलासे ता खोद्दा खावासे, काहेकि उ इंधारो मा चलासे।”

¹¹ यो गोस्टी सांगनो पर यीसु ना कहीस, “हमरो संगी लाजर जप मा से, मि ओला जगान जावासु।”

¹² तबा चेला ना ओला कहिन हे पिरभू अदी उ जप मा से, तो उ साजरो भई जाहे।

¹³ यीसु ना तो वोको मौत को बारे मा सांगी होतीस, पर वय समजीन की जप को बारे मा सांगसेस।

¹⁴ तबा यीसु ना उन लक सप्पा-सप्पा कह देईस “लाजर मर गई से,

¹⁵ अखीन मि खुस सेव का आमी उता नही होता, का तुमी भरोसा करहो। पर आव, आमी ओको कठा जाबिन।”

¹⁶ तबा थोमा, “जोन दिदमुस कहलावसे, आपरो संगी चेला गीन ला कव्हसे, आव, हमि भी ओको सँगा मरन ला चलबिन।”

यीसु खुद पुनरुत्थान अना जीवन आय

¹⁷ उता पहुचनो पर यीसु ला मालुम भयो, की लाजर ला मरयो अना मरघट्टी मा राखो चार दिवस भई,

¹⁸ जोन बैतनिय्याह यरुसलेम को जवर कोनी तीन किलोमीटर की दुरी पर होतो।

¹⁹ लगत यहूदिगीन मारथा अना मरियम को जवर ओको भाऊ की मौत पर सान्ती देवन लाई आई होतीन।

²⁰ जबा मारथा ना यीसु को आवन को खबर आयकिस, ता ओला मिलन को लाई गई, पर मरियम घर मा बसी रहयी।

²¹ मारथा ना यीसु लक कहीस, हे पिरभू! अदी तु यहान होतो, ता मोरो भाऊ कभ्भूच नही मरतो

²² अखीन अबा भी मि जानासेऊ की जोन कही तु परमेस्वर लक माँगजो ता परमेस्वर तोला देहे।

²³ यीसु ना ओको लक कहीस, तोरो भाऊ जिँदो भई जाहे।

²⁴ मारथा ना ओला कहीस, मि जानासेऊ की आखीर दिवस मा सबको जित्तो होवनो को बेरा उ जी उठेत।

²⁵ यीसु ना ओला कहीस, जित्तो होवनो, अना जिंदगी मि सेउ, जोन कोनी मोरो पर भरोसा करेत, उ अदी मर भी जाहेत ता भी जीहेत।

²⁶ अना जोन कोनी जित्तो से अना मोरो पर भरोसा करासे, उ अमर काल तकन नही मरेह। का तु भरोसा करसेस?

²⁷ ओना ओला कहीस, हव पिरभू, मि भरोसा करुसेउ, की तुच परमेस्वर को टूरा मसीह आस, जोन जगत मा आवनवालो होतो।

यीसु को रड़नो

²⁸ यो कहके मारथा चली गई, अना आपरी बहिन मरियम ला बुलाके चुप्पी लक कहीस, गुरू यहान से अना तोला बुलावसेत।

²⁹ यो आयक के उ एकदम उठके ओको जवर आई।

³⁰ यीसु अबा गाँव मा नही पहुचियो होतो, पर ओना जघा मा होतो, जिता मारथा ना ओला मिली होती।

³¹ तबा जोन यहूदी ओको सँग घर मा होतीन अना ओला सान्ती देय रही होतीन, यो चोयके मरियम एकदम उठके बाहेर गई, ता वय यो समझीन की उ मरघट्टी पर रोवन ला जावासे ता ओको मंघा भय गईन।

³² जबा मरियम उता पहुची जिता यीसु होतो, ता ओला चोवके ओको पाय पर पड़ गई अना कहीस, हे पिरभू! अदी तुमी इता होतत, ता मोरो भाऊ नही मरतो।

³³ जबा यीसु ना ओला अना उन यहूदिगीन ला जोन ओको सँग आई होतीन रड़ता चोवयो, ता आतमा मा लगत उदास अना बैचेन भयो।

³⁴ अना कहीस, तुमी ना ओला किता रखिसेव? उनना ओला कहीन हे पिरभू चलके चोव लेव।

³⁵ यीसु रड़यो।

³⁶ तबा यहूदी कव्हन लागीन, चोवो उ ओको लक केतरो माया राखासे?

³⁷ पर उनमा लक काही ना कहीन, का यो जोन अँधरा की डोरा खोलिस, यो भी नही कर सकिस, की यो मानूस न मरतो।

लाजर को जित्तो कियो जानो

³⁸ यीसु मन मा मंग लगत उदास भयो मरघट्टी पर आयो। उता एक गुफा होती, अना एक गोटा ओको पर राखियो होतो।

³⁹ यीसु ना कहीस, गोटा ला हटाय देव? उ मरयो हुयो की बहिन मारथा ओला कव्हन लगीस, हे पिरभू! ओमा लक अता ता बदबु आवासे, काहेका ओला मरयो हुयो चार दिवस भई गई सेत।

⁴⁰ यीसु ना वोला कहीस, का मिना तोला नही कव्हयो होतो? की अदी तु भरोसा करजोस ता परमेस्वर की महिमा ला चोवजोस।

⁴¹ तबा उनना वो गोटा ला हटाईन, यीसु ना डोरा उठायके कहीस, हे बाबूजी! मि तोरो धनवाद करू सेऊ, की तु ना मोरी आयक लेई सेस।

⁴² मि जानसु तु हमेसा मोरी आयकिसेस, पर जोन भीड़ इता-उता उभी से, उन ला भी भरोसा भय जाहे की तु ना मोला धाडिसेस, यो काजी मि ना असो कहीसेउ।

⁴³ यो कहके ओने मोठी आवाज लक हाकलीस, हे लाजर हिट आव।

⁴⁴ जोन मर गयो होतो उ कफन लक हात पाय बंधयो हिट आयो। अना ओको टोन्ड अंगोछा लक लिपटो होतो। यीसु ना कहीस, ओला उघाड़ देव अना जान देव।

यीसु को विरोध मा साजिस

⁴⁵ तबा जोन यहूदी मरियम को जवर आयो होतिन, अना ओको यो काम चोईन, उनमा लक लगत गीनना भरोसा करीन।

⁴⁶ पर उनमा लक काही ना मोसे को नियम को गुरू को जवर यीसु को काम को खबर देईन।

⁴⁷ एतरो पर मुखिया याजक अना मोसे को नियम को गुरू ना मोठी सभा बुलाईन अना कहिन, हमि का करबीन, यो मानूस तो लगत निसान चोवायोसे?

⁴⁸ अदी हमि ओला असोच सोड़ देबीन, तो सबच ओको पर भरोसा कर लेहेत, अना रोमी आयके आमरी जघा अना लोक दुही पर हक जमा लेहेत।

⁴⁹ तबा उनमा लक काइफा नाव को एक मोठो मुखिया याजक होतो। ओना कहीस, तुम काही भी नही जानो,

⁵⁰ अखीन नही समजासो, का तुमरो लाई यो भलो से, की हमरो काजी एक मानूस मरेत, अना सप्पा लोक को नास नोको होय।

⁵¹ यो गोस्टी ओने आपरो कन लक नही कहीस, पर आवन वारो गोस्टी ला जानके, मोठो मुखिया याजक होवनो को कारन लक सांगीस, का यीसु ओना लोकगीन लाई मार दियो जाहेत।

⁵² अना ना केवल उन लोक को लाय पर एकोलाय की परमेस्वर की गुमयो हुयो सँतान एकठ्ठो भयी जाहे।

⁵³ अखीन ओनो दिवस लक वय ओला मार डाकन की सलाह करन लगीन।

⁵⁴ एको लाई यीसु ओनो बेरा लक यहूदिगीन मा खुलो रित लक नही घुमयो, पर उता लक जंगल को जवर छेतर मा इफराईम नाव को एक नगर मा चली गयो, अना चेला गीन संगा उतच रव्हन लगयो।

⁵⁵ यहूदिगीन को फसह को तिहार जवर होतो। अना लगत सा लोक बलिदान को पुढा देहात लक यरुसलेम मा गईन, की आपरो आप ला पवीतर करयेत।

⁵⁶ एको लाई वय यीसु ला ढुढन लगीन, अना मंदिर मा उभा होयके आपस मा कव्हन लागिन, तुमी का सोचासो? का उ तिहार मा नही आहे।

⁵⁷ मोठो मुखिया याजक अना मोसे को नियम को गुरू ना यो हुकूम देईन, का अदी कोनी यो जाने की यीसु किता से ता सांगे, ताकि ओला धर लेबो।