मरकुस 15 - खेरलो वचन नोवालो नियमपिलातुसान सोमोर यीशु ( मत्ती 27:1 , 2 , 11-14 ; लुका 23:1-5 ; योहान 18:28-38 ) 1 उजालो एताच चालोच मुखी चाकऱ्या डायडाया, एने देरेमगुरू मिलीन यहुदिन मोटला पोंचा माय राय काड्या एने यीशुह बांदिन ली गीया, एने ताह पिलातुसान आथाम होप देना। 2 पिलातुस यीशुह फुशो, “काय तु यहुदिन राजा हे?” यीशु ताह जापाप आप्यो, “होव जिहकेरीन तु खुद केणे बाजरिनोह।” 3 तेवी मुखी चाकऱ्या यीशु पोर जुलूम वातुन गुनो लागाड़ताला। 4 पिलातुस यीशुह उंजु फुशो, “काय तु कायच जापाप नाह आपेत? देख ज्या तुवा पोर जुलूम वातुन गुनो लागाड़तेह।” 5 पुण यीशु कायच बी जापाप नाह आप्यो; तेवी पिलातुस जुलूम बोंगलाय गीयो। यीशुह मोत डेंड ने उकुम आपणु ( मत्ती 27:15-26 ; लुका 23:13-25 ; योहान 18:39–19:16 ) 6 देर वोरीह फसह ने तिवारान टेम माय यहुदि माणहे एक काल्ला बी आरापीह सोड़नेन मांग केरताला, ताह पिलातुस सोड़ देतालो। 7 बरअब्बा नावान एक एदमी ईतो, जो रोमन सारकारान विरोद माय काम केरनारा हिऱ्यो जेली माय ईतो, जा रोमन सारकारान विरोद माय खुन किरेल एता। 8 एने गेरदी उपेर जाईन पिलातुसाह विन्ता केरने बाज गियी, काय जिहकेरीन तु कायेम आमरी केरता किरते आयेल हे तिहेच केर। 9 पिलातुस ताह जापाप आप्यो, “काय तुमरी मोरजी हे काय मी तुमरी केरता यहुदियान राजाह सोड़ देव?” 10 पिलातुस जाणतालो काय मुखी चाकऱ्या यीशुह कुयराये होपेल हेते। 11 मुखी चाकऱ्या माणहाह ईरेचेड़ाया काय पिलातुस बरअब्बाह आमरी केरता सोड़ देय। 12 ज्य होमलीन पिलातुस ताह उंजु फुशो, “ते जाह तुमू यहुदियान राजा केतेह, ताह मी काय केरू?” 13 माणहे उंजु आयेड़ने बाज गीया, “ओयाह खुरूसखाम पोर खीला ठोकीन चेड़ाव दे।” 14 पिलातुस ताह केयो, “काहा, ज्यो काय गुनो किरेल हे?” पुण ता उंजु जोरेस आयड़ीन केणे बाज गीया, “ओयाह खुरूसखाम पोर खीला ठोकीन चेड़ाव दे।” 15 तेवी पिलातुस गेरदीह खुस केरनेन केरता, बरअब्बाह तान केरता सोड़ दिनो, एने यीशुह चापका देवाड़ीन सिपायड़ाह होप दिनो काय खुरूसखाम पोर खीला ठोकीन चेड़ाव देती। सिपायड़ा यीशुन ईजुत उड़ाया ( मत्ती 27:27-31 ; योहान 19:2 , 3 ) 16 ज्यान पासाण सिपायड़ा यीशुह प्रिटोरीयुम राज्यपाल ने राजवाड़ान ओंगाण खोली माय ली गीया, एने ता आखा रोमी सिपायड़ान टोलीह हादिन एकठा केऱ्या। 17 तेवी ता यीशुह जामण्या फाड़का पेराया, एने काटान मुकूट गुथीन यीशुन मुंडा पोर पेराया, 18 एने इही केयीन यीशुह नमस्कार केरने बाज गीया, “एय यहुदियान राजा, तारी जय एय।” 19 ता यीशुन मुंडी पोर होटा केरीन देना, एने ता पोर थुप्या, एने मांड्या वोलीन ताह वोंदते रेना। 20 जेवी ता यीशुन ईजुत उड़ाव लेदा, तेवी यीशुन सेरीरा पोर रेन जामण्या फाड़का काड़ीन ताच ने फाड़का पेराव देना; एने यीशुह खुरूसखाम पोर चेड़ावणेन केरता बाहेर ली गीया। यीशुह खुरूसखाम पोर चेड़ावणो ( मत्ती 27:32-44 ; लुका 23:26-43 ; योहान 19:17-27 ) 21 आलेकजांडर एने रुफुस ने आबोख शिमोन कुरेनी गावाम रेन आवतालो, ताह बोलजोबरी देऱ्या काय यीशुन खुरूसखाम उखलीन ली चाली। 22 एने ता गुलगुता नावान जागा पोर लावा, जान मतलब हे, “खोपड़ीन जागो।” 23 एने ता यीशुह माणली दावा बेचकीन अंगुरान रूह पिवाड़ ने होदताला; पुण यीशु नाह पिदो। 24 तेवी ता यीशुह खुरूसखाम पोर खीला ठोकीन चेड़ाव देना, एने यीशुन फाड़कान केरता चिट्ठी टाक्या एने जाह जो जुड़नो तो वाट लेदा। 25 जेवी ता यीशुह खुरूसखाम पोर खीला ठोकीन चेड़ाया तुलबूखे वेगाच ने नोव वाज जायेल एता। 26 यीशुन गुनान चिट्ठी लेखीन खुरूसखामा पोर लागाड़ देना, “ज्यो यहुदियान राजा हे।” 27 ता यीशु हेऱ्या दुय डाकुह एक तान जीवड़े उगे एने दिहराह तान डाखरे उगे खुरूसखाम पोर खीला ठोकीन चेड़ायेल एता। 28 तेवी वचन माय जो लिखेल हे, “तो गुनेगारा हिऱ्यो गेणाय गीयो, तो पुरो एनो।” 29 आवणे जाणारे यीशुन चिहटा केरती लेन केताला, एय मोंदिराह ओदारनार एने तीन दिह्याम बाणावणार, 30 खुरूसखाम पोर रेन उतरीन आपणे आपाह वोचाड़ ली। 31 इहीचकेरीन मुखी चाकऱ्या बी देरेमगुरू हेऱ्या मिलीन ता आखा यीशुन ईजुत उड़ावीन इहकेरीन केताला, ज्यो दिहराह वोचाड्यो; पुण ताहाच नाह वोचाड़ सिकेत। 32 इस्राएल ने राजा मसी, एवी खुरूसखाम पोर रेन उतेर आवी काय आमु देखीन बुरहो केरहु। एने जा दुय डाकु यीशु हेऱ्या खुरूसखाम पोर खीला ठोकीन चेड़ाय जायेल एता, ता बी इहीचकेरीन केरीन यीशुन चिहटा केरताला। यीशुन जीव सोड़नो ( मत्ती 27:45-56 ; लुका 23:44-49 ; योहान 19:28-30 ) 33 जेवी दिह्यान बारा वाज गीया, ते आखा देसा माय आदारो सावाय गीयो, एने तीन वाजता वोर आदारोच रेनो। 34 दिह्यान तीन वाजता यीशु मोठेच आयड़ीन केयो, “इलोई, इलोई लमा शबक्तनी?” ज्यान मतलब हे, “एय मार बोगवान, एय मार बोगवान, तु माहु काहा सोड़ दिनोह?” 35 जा आहने उबरियेल एता ता माय रेन थोड़ाक ज्य होमलीन केया, “दिखो, ज्यु ते एलियाह आयड़ेह।” 36 एने एक जाण दोवड़ीन स्पंजाह अंगुरान माणला रूहा माय बुड़ावीन ताह टोकरा माय विलगाड़ीन यीशुह चुहाड्यो एने केयो, “उबरी जावो, देखता एलिया ज्याह खुरूसखाम पोर रेन उतारनेन केरता आवीह काय नाह।” 37 तेवी यीशु जोरेस आयड़ीन जीव सोड़ दिनो। 38 एने मोंदिरान पुड़दो उपेर रेन बुंदे वोर फाटीन दुय टुकड़ा एय गीयो। 39 आदिकारी जो यीशुन आहने उबरियेल ईतो, जेवी ताह इहकेरीन आयड़ीन जीव सोड़तालो दिख्यो। ते तो केयो, “खेरीच ज्यो माणुह बोगवानान बिटोख ईतो।” 40 मोकत्यु बायकु बी सेट्युच रेन देखताल्यु: ता माय मरीयम मगदलीनी, आतल्यो याकुब एने योसेस ने आहख मरीयम, एने सलोमी एत्यु। 41 जेवी यीशु गेलील माय ईतो, तेवी त्यु तान पासाण आयेल एत्यु एने यीशुन सेवा चाकरी केरताल्यु, उंजु दिहऱ्यु जुलूम बायकु बी एत्यु; ज्यु ता हेऱ्यु यरूशलेम माय आयेल एत्यु। यीशुह बुजणो ( मत्ती 27:57-61 ; लुका 23:50-56 ; योहान 19:38-42 ) 42 ज्यो दिह यहुदियान विहेवणेन दिह्यान पेल्लो दिह ईतो, जो तिवारान दिह केवातालो, एने हांज पोड़ जायेल एती, 43 अरीमतीया गावाम रेणार युसूफ आवो, तो यहुदिन मोटला पोंचान एक आदिकारी ईतो। तो बोगवानान राज ने वाट जोवतालो। युसूफ ईमोत केरीन पिलातुस फाय जाईन यीशुन देड़ मांग्यो। 44 पिलातुस बोंगलाय जायेल ईतो काय यीशु ओलो उतवाल्यो काहा मोर गीयो। एने तो आदिकारीह हादिन फुशो, “काय यीशु मोर जायेल हे?” 45 ओवतो तो आदिकारी फाय मालुम केरीन युसूफाह यीशुन देड़ आप दिनो। 46 तेवी युसूफ एक डाठी वेचाती लिदो, एने यीशुन देड़ाह खुरूसखाम पोर रेन उतारीन ती डाठी माय गुंडालीन एक माहणा माय जो देगड़ाह कोरीन बाणायेल ईतो, ता मेल्यो एने बायणा पोर एक मोटलो हिलो टेकाड़ दिनो। 47 मरीयम मगदलीनी एने योसेस ने आहख मरीयम ताह काहरीक मेलतेह तो देखताल्यु। |
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020