इब्रानियो 1 - खेरलो वचन नोवालो नियम

बोगवानान वचन बेटाख उगे रेन

¹ पेल्ला काला माय बोगवान जाणकारान द्‍वारे आमरा डायडाया हिऱ्यो आलेग आलेग टेम माय एने आलेग आलेग रिती से वातु किऱ्यो,

² पुण एवी न्या सेवल्या दिह्या माय आमु हिऱ्यो बेटाख ने द्‍वारे वातु किरेल, जाह बोगवान आख्‍यु वोस्तुन वारीस ठेरायो, एने तास ने द्‍वारे बोगवान आखी केलीह बाणायेल हे।

³ तो बोगवान बोड़ाय ने उजेड़ एने तान वेहान साप रूप हे, तोच आख्‍यु वोस्तुह तान ताकेतीन वचना केरीन होमालने। जेवी तो आपुह आपणा पापाम रेन दोव दियेल ईतो, ते तो मोटली बोड़ाय पोर बुहेल बोगवानान जीवड़े उगी बोह गीयो।

बोगवानान बेटाख ने मोठवाय

⁴ एने हेरोगदुताह रेन तो उलोस हाजो ठिरेल, जुलोक तो ताह रेन मोटलो पद ने वोस बोणीन हाजो नाव सापड़ायेल हे।

⁵ केदी काल्ला हेरोगदुताह बोगवान ज्य कियेल, “तु मार बिटोख हे; आज मी तार आबोख बोण गीयोह” एने पोशो ज्य काल्ला हेरोगदुताह कियेल, “मी तार आबोख रेह, एने तु मार बिटोख।”

⁶ एने जुलबुखे पेल्ला बेटाख दुनिया माय लावीन किथे, “बोगवानान सोब हेरोगदुत तान सोराह नमस्‍कार केरी।”

⁷ एने हेरोगदुतान बाराम ज्य किथे, “तो तान हेरोगदुताह वारो, एने तान सेवकाह देदेकताली आक्‍ठो बाणावीह।”

⁸ पुण बेटाख ने बाराम किथे, “एय बोगवान, तारी राजगादि जेलेमक्यीस रेय! तु तार राज ने शासक नियाव हिऱ्यो किरहे।

⁹ तु देरमाह मोंग किरेह एने एदेरमा हिऱ्यो दुसमोनाय किरेल हे। केरीन बोगवान, तार बोगवान, तार हातीह रेन जादा खुसीन तेल केरीन तारो निवोड़ किरेल हे।”

¹⁰ एने उंजु ज्य किथे, “एय मालीक, पेलुस तु देरतीन पायो टाकेल हे, एने हेरोग तार आथान कारागिरी हे।

¹¹ ता ते खेतेम एय जाती, पुण तु बोणीन रिहे; एने ता आखा फाड़कान गेत जुनाला एय जाती।

¹² तु ताह चादरान गेत चोंडाल दिहे, एने ता फाड़कान गेत बोदेल जाती। पुण तु तोच हे, एने तार जीवाय ने सेवोट केदी बी नाय एय।”

¹³ हेरोगदुता माय रेन बोगवान कुणीह कुलबुखे कियेल: “तु मार जीवड़े उगे बोह, जाह वोर काय मी तार दुसमोनाह तार पायान बुंदेन चोवकी नाह बाणाव देव।”

¹⁴ काय आखा हेरोगदुत सेवान केरता निवाड़ेल जीव नाह सोता? जा सुटकारो सापड़ावण्या हेते तान सेवा केरी।