Yoane 9 - Nouveau Testament en Ngombe 1961

Moto Omiso Mago

¹ Adalaka yo a njea, Yesu anɛ okina momi yona odaka na miso mago; abotama boa.

² Bacingami bande bamohɔjɔ bo, Labi, okɔ bobe nda? moto yo, isa baboti bande, yana abotama yo na miso mago?

³ Yesu abasɔmbeja bo, Te nongo yo isa baboti bande baya bakɔ bobe; adi boa bo Njambe anejae bilomu binde a tei ende.

⁴ Mbi nabwani bokɔ elomu eyona olomani a ehole emose. Bulu bokɛkɛ adoe, na pɛpɛ nongo moto obwani bokɔ elomu a ehole emina.

⁵ Yana adi mbi a ngondo, nadi bohu bongondo.

⁶ Abala yo boa, atwea lisɔi a kpɔtɔ, aliputoana na dɔmbi, na alisnoa a miso mamoto omina.

⁷ Abala na nde bo, Kɛ asose a libale liSiloa. (Cina ekombe emina edi Molomami.) Iyo akɛ, asasosa, na ahula na njɛnɛ ende.

⁸ Mituteano minde, na baya bamonɛkɛ boso a yambo ende, babala bo, Iyo, te moto yona odaka na mobondo a bo’mba yambo?

⁹ Bakina babala bo, Oko yo. Batongo babala bo, Pɛpɛ; adi ko na yema ende. Iyo mɛnɛ ko abala bo, Mbi nadi oko yo.

¹⁰ Ibo babala na nde bo, Osi njɛnɛ ewɛ o bo?

¹¹ Iyo abasɔmbeja bo, Moto yona odi na kombe Yesu apɔtɔi dɔmbi, asuoi mbi miso, na atɔndɔi mbi bo, Kɛ asasose a Siloa. Oko boa, mbi nakɛi, nasasosi, na nasi njɛnɛ embi.

¹² Bamohɔjɔ bo, Adi yo jɔ? lyo asɔmbeja bo, Nitajebakadea.

Kitɛ eBaPalusi

¹³ Badoa ai BaPalusi na moto yona omaka da na miso mago.

¹⁴ Mojɔ bo busa bopɔtɔ Yesu dɔmbi, na bodipoa yo miso mamoto omina, bodaka busa boSabata.

¹⁵ Oko boa, BaPalusi pongono bamohɔjɔ a mojɔ mobo’sɔ bonjɛnɛ ende. Iyo abala na bu bo, Asuoi miso mambi dɔmbi, nasasosi, na edɛye nanɛkɛdea.

¹⁶ Bakina BaPalusi babala bo, Moto omina aditi moto oNjambe, mojɔ bo atasumaka mobeko moSabata. Batongo ko babala bo, Moto akada mobe adi bokɔ bimbete bimina na ye? Oko boa, banoana moano a mojɔ momina.

¹⁷ Babala koko na moto omiso mago bo, Wɛ olɛkɛ bo, a mojɔ momoto yona odipoi miso mawɛ? Iyo asɔmbeja bo, Adi motɔndɔi.

¹⁸ BaYuda ko baijima bo yo amaka da na miso mago, na bo asɔ njɛnɛ ende. Oko boa babea baboti bamoto yona osɔ njɛnɛ ende.

¹⁹ Babahɔjɔ bo, Moto yoyo adi mwana’nu? Obalakani bo yo abotama na miso mago? Oko boa asi njɛnɛ ende na ye?

²⁰ Baboti bande basɔmbeja bo, Iso bojebaka bo adi mwana’su, na bojebaka bo abotama na miso mago.

²¹ A mojɔ monjɛnɛ ende ko, botacingeakadea; na botajebaka moto yona odipoi miso mande. Mohɔjɔni yo mɛnɛ. Aditi yɛngɛ. Abwani bobala mojɔ yo mɛnɛ.

²² Baboti bande babala boa mojɔ bo babangaka BaYuda; cina bo BaYuda bama jima bo moto akajima bo Yesu adi Masiya, badi bomomeja a sinagoge.

²³ A mojɔ momina, baboti bande babala bo, Mohɔjɔni yo mɛnɛ. Aditi yɛngɛ.

²⁴ Oko hoa, babea koko moto yona omaka da na miso mago. Babala na nde bo, Kumeja Njambe; iso bojebaka bo moto omina adi moto mobe.

²⁵ Iyo abasɔmbeja bo, Isa adi moto mobe, mbi nitajebakadea. Mojɔ momɔci mojebaka mbi modi oko bo mbi nadaka boso na miso mago, edɛye ko nanɛkɛdea.

²⁶ Babala na nde bo, Mojɔ mokɔi yo ai wɛ nda? Adipoi miso mawɛ na ye?

²⁷ Iyo abasɔmbeja bo, Natombi bobala na nu, ino ko pɛ bohokea. Opalakani boka koko mojɔ cina eye? Ino pongono opalakani bo odaeni bacingami bande?

²⁸ Ibo bamololea oko bololea. Babala na nde bo, Wɛ odi mocingami onde. Iso ko bodi bacingami baMose.

²⁹ Bojebaka bo Njambe abala na Mose. Moto yo ko, botajebaka nongo esika ehula yo.

³⁰ Momi abasɔmbeja bo, Mojɔ mu modi mojɔ mobokamoa soti! Iyo adipoi miso mambi, na otajebakani esika ehula yo.

³¹ Bojebaka bo Njambe t’ahokeake bato babe. Njambe abokeaka oko moto yona omosakoaka, yona okɔkɔ bolulea bonde.

³² Bokakini bo okina adi bodipoa miso mamoto yona obotama na miso mago.

³³ Isa moto yo ahuliti ai Njambe, ka abwaniti bokɔ mokina mojɔ boa.

³⁴ Bamosɔmbeja bo, Wɛ opalaka bokoja so, wɛ yona obotama kanga mobe mɛnɛ? Oko boa bamobengana oko bobengana.

³⁵ Yesu aka bo bamobengana. Yana amotana yo, abala bo, Wɛ ojimeaka Mwana ’Njambe?

³⁶ Iyo asɔmbeja bo, Kumu, yo adi nda, bo namojimee?

³⁷ Yesu abala na nde bo, Omoni; mbi yoyo, mbi yona obalaka na wɛ.

³⁸ Iyo abala bo, Kumu, mbi najimakadea. Atita na magbunda bo amosakoe.

³⁹ Yesu abala bo, Mbi nadoi a ngondo ye a bosambeja, bo baya badi na miso mago basɛ njɛnɛ, na bo baya badi na njɛnɛ bagwɛ miso.

⁴⁰ Bakina BaPalusi baya badaka a esika emina baka ekenge emina, na babala na nde bo, Iso bodi koko na miso mago?

⁴¹ Yesu abasɔmbeja bo, Akɔki no da na miso mago ka oditini na lindo. Ino ko obalakani bo odini na njɛnɛ; oko boa odini oko na lindo.