Yoane 8 - Nouveau Testament en Ngombe 1961

Mwali Obɔɔli

¹ Yesu akɛ a Mono moOlive.

² Yana ko ahoa busa, akwea koko a tempelo ehume mɛnɛ. Bato basusu bangando badoa ai yo, na yo ada na mobondo a bobakoja.

³ Bakina basɔni na BaPalusi badoa ai yo na okina mwali. Bama kukoa mwali omina na bɔɔli, na bamomeja a boso bobato.

⁴ Babala na Yesu bo, Mokoja, iso bokukoi mwali yoyo oko yana angɛki yo bɔɔli

⁵ Mose abekea so a Mibeko bo bowoe bato na matai baya bakɔkɔ boa. Wɛ ko obalaka bo?

⁶ Ibo babala boa a bomeka Yesu, bo bamodumbe na mokina mojɔ. Yesu ko asumana, na asɔnɔ a kpɔtɔ na mosapi.

⁷ Ibo ko bamohɔjɔ koko, pɛ bokina. Oko boa, Yesu asunoa, abala na bu bo, Isa okina onu aditi nongo na bobe, yɛ amomae Iitai Iiboso.

⁸ Asumana koko, na asɔnɔ a kpɔtɔ na mosapi.

⁹ Ama bo ka ekenge emina, basuku ba’mi banga oko boyana, na bato bayana omɔci-omɔci oko a moto osuka. Yesu adika yo buki pɛ, oko na mwali yona odaka ami a boso bonde.

¹⁰ Yesu asunoa, abala na nde bo, Mwali, badi jɔ? Moto adumbiti wɛ nongo omɔci?

¹¹ Iyo amosɔmbeja bo, Kumu, pɛpɛ nongo moto. Yesu abala na nde bo, Mbi pongono, nitadumbaka wɛ. Yana; t’oyebí kɔ koko bobe.

Yesu Bohu Bongondo

¹² Yesu abala koko na bato bo, Mbi nadi bohu bongondo. Moto akacingama na mbi, atadala a modidi; âda oko na bohu bobomɔ.

¹³ BaPalusi babala na nde bo, Wɛ otataka tati ewɛ mɛnɛ; tati ewɛ editi tati esoti.

¹⁴ Yesu abasɔmbeja bo, Nongo nakatata tati embi mɛnɛ, edi tati esoti, mojɔ bo mbi najebaka esika ehula mbi, na esika ekɛkɛ mbi. Ino ko otajebakani esika ehula mbi na esika ekɛkɛ mbi.

¹⁵ Ino osambejakani oko bosambeja bobato. Mbi ko nitasambejaka nongo moto.

¹⁶ Mbi ko nakasambeja, bosambeja bombi bodi bosambeja bosoti, mojɔ bo nitasambejaka moto mbi buki pɛ. Sango yona olomani adi na mbi.

¹⁷ Mosɔnɔmɔ a Mibeko minu bo tati ebato babae edi tati esoti.

¹⁸ Mbi yona otataka tati a mojɔ mombi mɛnɛ nadi omɔci, na Sango yona olomani atataka tati a mojɔ mombi pongono.

¹⁹ Ibo babala na nde bo, Sangwao adi jɔ? Yesu abasɔmbeja bo, Ino otajebakani mbi, na otajebakani Sangwa’mbi. Akɔki no jeba mbi, ka ojebini Sangwa’mbi pongono.

²⁰ Yesu abala bikenge bimina yana akojaka yo a tempelo, oko a esika edaka nguku ebipeeli. Pɛpɛ nongo moto ko omopea, mojo bo ehole ende eipaka mea.

²¹ Yesu abala koko na bu bo, Mbi nakɛkɛ nayane. Ino ôdukani mbi, na ôgwani a bobe bonu. Otahɔnɔkɔni hodoa a esika ekɛkɛ mbi.

²² Oko boa BaYuda babala bo, Isa âsa’wa yo mɛnɛ? mojɔ bo abali bo, Otahɔnɔkɔni bodoa a esika ekɛkɛ mbi.

²³ Iyo abala na bu bo, Ino odini bato banase. Mbi ko nahula oho Diko. Ino odini bato bangondo ye. Mbi ko naditi ongondo ye.

²⁴ Mbi nabali na nu bo ôgwani a jibe jinu, mojɔ bo omiti jimani bo mbi nadi yo, ôgwani soti a jibe jinu.

²⁵ Ibo babala na Yesu bo, Wɛ odi nda? Yesu abasɔmbeja bo, Oko yona obala mbi na nu eyou.

²⁶ Ino odini na mijɔ minɛnɛ; na mbi nabwani bobala na nu na bosambeja no a mojɔ momina. Iyona ko olomani adi yona oSoti; mbi natɔndɔkɔ ngondo oko ngando jiki mbi na nde.

²⁷ Ibo ko baicingea bo abalaka na bu a mojɔ moSango.

²⁸ Oko boa Yesu abala bo, Omaka ngɔjɔni Mwana ’Moto diko, osa ko ojebeni bo mbi nadi yo, na bo mtakɔkɔ nongo mojɔ na kpaci embi mɛnɛ. Mbi nabalaka oko mijɔ mikojaka Sango mbi.

²⁹ Iyona olomani adi na mbi. Iyo t’akmake mbi buki, mojɔ bo nakɔkɔ ngando jia jimosepejaka bihole bisusu.

³⁰ Bato banɛnɛ bamojimea yana abalaka yo bikenge bimina.

Mojɔ Mosoti

³¹ Yesu abala na BaYuda baya bamojimea bo, Okayeyoani a ebaeli embi, odini bacingami bambi na soti.

³² Ôjebani mua mosoti, na Soti êcingoa no.

³³ Ibo bamosɔmbeja bo, Iso bodi bana baAbalayama. Bodakini babuli bamoto. Oko boa, abali wɛ bo, Ôcingoamani; cina edi bo?

³⁴ Yesu abala na bu bo, Mbi natɔndɔkɔ no na soti bo, Moto yona okɔkɔ bobe adi mobuli obobe.

³⁵ Mobuli t’adake a ndako na bosusu; yona ko odi mwana ayeyoaka na bosusu.

³⁶ Oko boa, Mwana akasikoa no, ôdani basɔmi na soti.

³⁷ Mbi najebaka bo odini bana baAbalayama; endele ko, opalakani bowa mbi mojɔ bo oditini nongo na pokiso a tei enu a mojɔ moebaeli embi.

³⁸ Mbi nabalaka oko ngando jinɛkɛ mbi na Sangwa’mbi; ino pongono, okɔkɔni ngando jinɛkɛ no na Sangwa’nu.

³⁹ Ibo bamosɔmbeja bo, Sangwa ’su oko Abalayama. Yesu abala na bu bo, Akɔki no da bana baAbalayama, ka odaeni na ekɔmɛli eAbalayama.

⁴⁰ Oko edɛye, odukakani njea a bowa mbi, mbi yona otɔndɔkɔ no mijɔ misoti misɔ mbi ai Njambe. Abalayama aikɔ nongo boa.

⁴¹ Ino odini oko na ekɔmɛli esangwa’nu. Ibo babala na nde bo, Iso boditi bana babɔɔli; bodi na Sangwa’su omɔci, oko Njambe.

⁴² Yesu abala na bu bo, Njambe, akɔki yo da Sangwa’nu, ka opalini mbi, mojɔ bo mbi namana ai Njambe, nahula oko ai yo. Naidoa na kpaci embi mɛnɛ; iyo alomani.

⁴³ Otacingeakani ngando jibalaka mbi mojɔ moye? Mojɔ bo otahɔnɔkɔni bohokea ebaeli embi.

⁴⁴ Ino odini oko bana basangwa’nu Satana, na opalakani bokɔ ngando jipalaka sangwa’nu. Iyo adaka mowoi oko a bobanga mɛnɛ, na acingiti nongo na ngando jisoti, mojɔ bo Soti editi a tei ende. Yana abalaka yo na bokosea, abalaka oko kɔpi ende mɛnɛ, mojɔ bo adi mokosei, na sange ’bokosea.

⁴⁵ Mbi ko, nongo abalaka mbi ngando jiSoti, otajimakani mbi.

⁴⁶ Okina onu adi bodumba mbi na mojɔ mobe? Abalaka mbi ngando jisoti, otajimakani mbi mojɔ moye?

⁴⁷ Iyona odi moto oNjambe ahokeaka bikenge biNjambe; oko boa ino otahokeakani, mojɔ ho oditini bato baNjambe.

⁴⁸ BaYuda bamosɔmbeja bo, Abali so bo odi MoSamalia na bo odi na mwembo mobe, bolongiti?

⁴⁹ Yesu asɔmbeja bo, Mbi naditi na mwembo mobe. Mbi nadi na lisuma ai Sangwa’mbi; ino ko osambojakani mbi.

⁵⁰ Mbi nitadukaka ekumu a mojɔ mombi mɛnɛ; okina adi yona oedukaka, na yo asambejaka.

⁵¹ Soti mɛnɛ, mbi natɔndɔkɔ no bo, moto akasuma ebaeli embi atanɛ nongo bogwa.

⁵² BaYuda babala na nde bo, Bojebi edɛye bo odi na mwembo mobe soti. Abalayama agwa, na batɔndɔi pongono, na wɛ obalaka bo moto akasuma ebaeli ewɛ atanɛ nongo bogwa.

⁵³ Wɛ onɔi tata osu Abalayama yona ogwa? Na batɔndɔi bagwa pongono. Odingaka bo wɛ odi nda?

⁵⁴ Yesu abasɔmbeja bo, Nakasakumeja mbi mɛnɛ, ekumu embi edi boda eka engasa. Iyona okumejaka mbi, oko Sangwa ’mbi; na ino obalakani bo yo adi Njambe onu.

⁵⁵ Otamojebakani nongo mweka. Mbi ko namojebaka. Nakabala bo nitamojebaka, nadi boda oko mokosei o adi no. Mbi ko namojebaka, na nasumaka ebaeli ende.

⁵⁶ Tata onu Abalayama adaka na sepi enɛnɛ a bonɛ busa bombi. Abonɛ, na adaka na enanga.

⁵⁷ BaYuda babala na nde bo, Wɛ onɛ Abalayama? wɛ yona omeakini bianga domi-itano?

⁵⁸ Yesu abasɔmbeja bo, Soti mɛnɛ; mbi natɔndɔkɔ no bo, Mbi nadaka oko Abalayama apetakini da.

⁵⁹ A mojɔ momina, bandoa matai bo bamole. Yesu ko asabomba na amana a tempelo.