Yoane 7 - Nouveau Testament en Ngombe 1961

Kitɛ Ebato baYesu

¹ Iyana asia mijɔ mimina, Yesu akɛkɛ mɛngɔ minde oko a Galile pɛ. Aipala bokɛ mɔngɔ a Yuda, cina bo BaYuda badaka na mokano bo bamowoe.

² Yana ko abatama ehole eKola eBaYuda, oko Kola-eMaako,

³ bananango babala na nde bo. Donga ya; kɛ oho Yuda bo bacingami bawɛ banɛe bilomu bikɔkɔ wɛ.

⁴ Mojɔ bo, isa moto apalaka bo bato bamojebe na soti, atakɔ nongo mojɔ a libombi. Akɔkɔ wɛ agando jiji, saneja a bohu a ngondo.

⁵ Cina edi bo bananango mɛnɛ baimojimea nongo.

⁶ Yesu abala na bu bo, Ehole embi ebwanakini. Ehole enu ko ebwani masu masusu.

⁷ Ngondo editi na nu soki; edi ko na mbi soki, mojɔ bo mbi namejaka mijɔ mibe mingondo a bohu.

⁸ Kɛni ko a Kola; mbi nitakɛ a Kola edɛye, mojɔ bo ehole embi ebwanakini.

⁹ Ama yo bala boa, ami dika oko a Galile.

¹⁰ Bananango bakɛ a Kola, na yo akɛ oko ngɔngɔ. Iyo ko aikɛ a bohu; akɛ oko a libombi.

¹¹ BaYuda bamoduka a Kola. Babala bo, Adi yo jɔ?

¹² Bato babomana kitɛ bou mɛnɛ a mojɔ monde. Bakina babala bo, Adi moto mopele. Batongo babala bo, Pɛpɛ nongo mweka; alabojaka bato oko bolaboja.

¹³ Pɛpɛ nongo moto ko obala a mojɔ moYesu a boso bobato, cina bo babangaka BaYuda.

Yesu a Yelusalema

¹⁴ Yana asia makina masu maKola, Yesu akwea a tempelo na abanga bokoja.

¹⁵ BaYuda bakamoa bou mɛnɛ. Babala bo, Moto yo ajebaka Misɔnɔ na ye? Iyo aikoa nongo.

¹⁶ Yesu abasɔmbeja bo, Bokoja bombi boditi bombi mɛnɛ; bodi oko bokoja boyona olomani.

¹⁷ Isa moto apalaka bo akɔe bolulea boyona olomani, adi bocingea bokoja bombi, isa bohulaka ai Njambe, isa nakojaka na kpaci embi mɛnɛ.

¹⁸ Yona okojaka na kpaci ende mɛnɛ apalaka bo asakumejae. Yona ko opalaka bo akumejae yona omoloma, yo adi moto osoti, na bokosea boditi a tei ende.

¹⁹ Opa no Mibeko nda? te Mose? Pɛpɛ nongo okina onu ko osumaka Mibeko. Opalakani bowa mbi mojɔ moye?

²⁰ Bato bamosɔmbeja bo, Odi na mwembo mobe! Opalaka bowa wɛ nda?

²¹ Yesu abala na bu bo, Mbi nakɔi mojɔ momɔci, na okamoakani a mojɔ momina.

²² Ino bɛnɛ olenakani moto ganda a busa boSabata, mojɔ bo Mose apa no mobeko momina. (Ekɔmɛli emina ko eihula ai Mose, ehula oko ai batata.)

²³ Oko boa, isa otasopakani mobeko moMose yana alenaka no moto ganda a busa boSabata, okɛnjɔkɔni na mbi mojɔ bo nahelejai moto a yogo a busa boSabata cina eye?

²⁴ Sambejani na soti; t’osambejaeni oko esambasamba.

²⁵ Bakina bato baYelusalema babala bo, Iyoyo, te moto odukaka bato bo bamowoe?

²⁶ Anjani ko! Atɔndɔkɔ mwako a bohu, na batabalaka na nde nongo ekenge. Isa bakumu bajimi bo adi Masiya soti?

²⁷ Bojebaka esika ehuli moto yoyo; Masiya ko akadoa, pɛpɛ nongo moto odi bojeba esika ehulaka yo.

²⁸ Oko boa, yana akojaka Yesu a tempelo, abekoa bo, Ojebakani mbi, na ojebakani esika ehuli mbi. Mbi nadoiti na kpaci embi mɛnɛ. Iyona oSoti alomani; ino ko otamojebakani.

²⁹ Mbi namojebaka, mojɔ bo nadonga ai yo, na yo alomani.

³⁰ Badaka na posa bo bamopee a mojɔ momina. Pɛpɛ nongo moto ko obakea ebɔ ai yo, mojɔ bo ehole ende eipaka mea.

³¹ Bato bangando ko banɛnɛ bamojimea. Ibo babala bo, Masiya akadoa, bimbete binde bînɔ bimbete bikɔkɔ moto yo?

³² BaPalusi baka bikenge bibalaka bato a mojɔ moYesu; na nganga na BaPalusi baloma bapolisi bo bamopee.

³³ Yesu abala bo, Mbi nadi boyeyoa na nu mweka, na ngɔngɔ nadi boyana ai yona olomani.

³⁴ Ino ôdukani mbi, pɛ ko boboloja mbi, na otahɔnɔkɔni bomea a esika edi mbi.

³⁵ BaYuda babalana bo, Iyo akanaka bokɛ jɔ, bo so botamoboloja? Isa akanaka bokɛ ai BaYuda baya banangana a tei eBaEla, isa âkoja BaEla?

³⁶ Gina eekenge ebali yo edi bo?—Ino ôdukani mbi pɛ ko boboloja mbi; na, Otahɔnɔkɔni bomea a esika edi mbi.

Madiha Mabomɔ

³⁷ A busa bosuka, oko busa bonɛnɛ boKola, Yesu angɔ na abekoa bo, Isa moto adi na ekangola, yɛ adoe ai mbi bo amwake.

³⁸ Moto akajimea mbi, melo midua mimadiba mabomɔ mimana a molema monde, o abalaka Misɔnɔ.

³⁹ Iyo abala boa a mojɔ moMwembo, cina bo baya bamojimea babwana bomosɔ ngɔngɔ. Mojɔ bo, Mwembo moipaka doa a ehole emina, cina bo Yesu aipaka kumama.

⁴⁰ Yana aka bo bikenge bimina, bakina bato babala bo, Iyo adi Motɔndɔi yona, soti mɛnɛ.

⁴¹ Batongo babala bo, Iyo adi Masiya. Bakina ko babala bo, Masiya adi bomana a Galile?

⁴² Mokina mosɔnɔ motabalaka bo Masiya adi boda moto ombota eDawidi, moto oBɛtɛlɛmɛ, ngando edaka Dawidi?

⁴³ Oko boa baidaka na monɔkɔ momɔci a mojɔ monde.

⁴⁴ Bakina badaka na posa bo bamopee; endele ko, pɛpɛ nongo moto obakea ebɔ ai yo.

⁴⁵ Oko boa bapolisi basɔmbɔ ai nganga na ai BaPalusi. Ibo baba hɔjɔ bo, Ohulitini na nde mojɔ moye?

⁴⁶ Bapolisi babasɔmbeja bo, Moto aipaka bala o abalaka moto omina, pɛpɛ nongo omɔci.

⁴⁷ BaPalusi babasɔmbeja bo, Ino opengoini pongono?

⁴⁸ Bakina baku mu isa BaPalusi bamojimeaka?

⁴⁹ Bato bangando ko, bato bandakeja, batajebaka Mibeko.

⁵⁰ Nikodemo, (yona oma kɛ ai Yesu boso; yo adaka okina Obu;) abala na bu bo,

⁵¹ Mibeko misu midumbaka moto, pɛ bopeta ka monɔkɔ monde, na pɛ bokokeleja mojɔ monde?

⁵² Ibo bamosɔmbeja bo, Adi wɛ koko moto oGalile? Okaduka odi bonɛ bo motɔndɔi atamana nongo a Galile.

⁵³ Na banangana, moto na moto a ndako ende.