Yoane 6 - Nouveau Testament en Ngombe 1961

Yesu Ayakeja Bato Koto Jitano

¹ Ngɔngɔ jimina, Yesu aleka a dɔngɔ ditongo dilibale liGalile (libale liTibelia).

² Bato bamosusa oho banɛnɛ mɛnɛ, mojɔ bo bama nɛ bimbete bikɔkɔ yo ai bato baya badaka na bego.

³ Yesu akɛ na bacingami bande a mokina mono monɛnɛnɛ bo adae ena.

⁴ Edika oko mweka pɛ a Kola-eBonɔ eBaYuda a ehole emina.

⁵ Yesu, yana anja yo, anɛ bato kanga banɛnɛ mɛnɛ bakɛkɛ adoe ai yo. Abala na Pilipo bo, Âsomba so milɛmbɛ jɔ bo bato bamina bayake?

⁶ Abala boa a bomeka Pilipo, mojɔ bo yo mɛnɛ ajeba mua mokanaka yo bokɔ.

⁷ Pilipo amosɔmbeja bo, Elanka koto emɔci jitabwana a bosomba milɛmbɛ a mojɔ mobu, bo moto na moto asɛ oko mweka pɛ.

⁸ Okina mocingami onde, oko Andalea, mwanange eSimona Pɛtɛlo, abala na nde bo,

⁹ Okina yɛngɛ adi ya yona odi na milɛmbɛ mitano na swi babae. Leka lomina ko lôbwana a mojɔ mobato ba banɛnɛ?

¹⁰ Yesu abala bo, Dejani bato nase. Njienjie jidaka jinɛnɛ a esika emina, na bami bada na mbondo. Badaka isa koto jitano na dea.

¹¹ Yesu atomba milɛmbɛ mimina, ajongoa, na amikaba na bato baya badaka na mbondo. Abapa swi koko boa, na abagoleja.

¹² Yana agola bo basusu, Yesu abala na bacingami bande bo, Andoani bikenge bia bidikai, bo pɛpɛ nongo ekenge ename.

¹³ Oko boa babindoa, na balumeja sanga domi-na-jibae, oko na biketa bimilɛmbɛ mitano bikina baya bayaka.

¹⁴ Yana anɛ bato mondumba mokɔ Yesu, babala bo, Iyo adi soti motɔndɔi yona odi na sako ebodoa a ngondo.

¹⁵ Yesu ajeba bo bakanaka bo bamopee na ngulu bo bamobakee kumu. Oko boa adonga, na akɛ a mono oko yo buki pɛ.

¹⁶ Yana adipa busa, bacingami bande bakɛ a mbongu.

¹⁷ Yesu aipaka mea, na batamba a bwato bo balekele a Kapalanauma na bulu.

¹⁸ Mula modaka a libale, mojɔ bo pwea edaka epipo.

¹⁹ Ama bo duka kai kilometa jitano, ba’mi nɛ oko Yesu akadale a diko dimadiba. Badaka na bɔ yana abatama yo na bwato.

²⁰ Iyo ko abala na bu bo, Yɛni bobanga! Mbi yoyo!

²¹ Oko boa bajima na! sepi bo bamosɛ a tei ebwato, na basɛmeja bwato bokpa a esika ekɛkɛ bo.

Molɛmbɛ Mobomɔ

²² Bato badika banɛnɛ a mbongu a dɔngɔ ditongo dilibale. Yana ahoa busa, bainɛ nongo bwato ena, mojɔ bo bacingami bama tamba a bwato bomɔci bua bodaka ena. Bajeba koko bo Yesu aitamba na bu, mojɔ bo bama kɛ oko ibo buki pɛ.

²³ Makina mato ko maya madonga a Tibelia masɛmɛ hulelu na esika eyaka bo milɛmbɛ, yana ajongoa Kumu.

²⁴ Oko boa, yana anɛ bato bamina bo Yesu yo mɛnɛ aditi ena, isa bacingami bande, batamba a mato mamina bo bamoduke a Kapalanauma.

²⁵ Bamoboloja a dɔngɔ ditongo dilibale, na babala na nde bo, Labi, odoi jɔno a ehole eni?

²⁶ Yesu ahasɔmbeja bo, Mbi natɔndɔkɔ no na soti bo odukakani mbi mojɔ bo oyakabmi na ogolabini na milɛmbɛ, te nongo a mojɔ mobimbete binɛkɛ no.

²⁷ T’okɔeni oko elomu a mojɔ modia dia dibehaka; kɔni ko a mojɔ modia dia diyeyoaka oko a bomɔ bua bodi na bosusu. Mwana ’Moto âpa no dia dimina, mojɔ bo Sango abakea embete ende ai yo.

²⁸ Ibo babala na nde bo, Êkɔ so nde bo bokɔe elomu eNjambe?

²⁹ Yesu abasɔmbeja bo, Elomu eNjambe edi oko yeye, bo ojimeni yona oloma yo.

³⁰ Oko boa babala na nde bo, Embete ekɔkɔ wɛ nda, bo so bonɛe na bojime? Ekɔkɔ wɛ nde?

³¹ Batata basu bayaka manna a lisobe, mojɔ bo mosɔnɔmɔ bo, Abapa molɛmbɛ moDiko bo bayake.

³² Yesu abala na bu bo, Mbi natɔndɔkɔ no na soti bo, Yona opa no molɛmbɛ mua moDiko, te Mose. Sangwa’mbi ko apaka no molɛmbɛ moDiko mosoti.

³³ Mojɔ bo, molɛmbɛ moNjambe modi Oko molɛmbɛ mua modongaka oho Diko, na mopaka bomɔ a ngondo.

³⁴ Ibo babala na nde bo, Kumu, bopa so molɛmbɛ momina bihole bisusu.

³⁵ Yesu abasɔmbeja bo, Mbi nadi molɛmbɛ mobomɔ. Moto akadoa ai mbi ata’ka koko nja. Yona ojimeaka mbi atada koko na ekangola.

³⁶ Ino ko onini mbi na otajimakani mbi, o abali mbi na nu.

³⁷ Ibaya basusu bapakani Sango bâdoa ai mbi, na mbi nitalona nongo moto yona odoaka ai mbi.

³⁸ Mojɔ bo, mbi nadonga oho Diko bo nakɔe bolulea bonde yona olomani, naidonga oho Diko bo nakɔe bolulea bombi mɛnɛ.

³⁹ Iyona olomani adi oko na bolulea bu, bo nangɔjɔe basusu bapaka yo mbi a busa bosuka, pɛ bobungeja nongo omɔci obu.

⁴⁰ Bolulea boSangwa’mbi bodi oko bo moto na moto yona onɛkɛ Mwana na omojimeaka, adae na bomɔ bua bodi na bosusu; na mbi namongɔjɔbí a busa bosuka.

⁴¹ BaYuda badaka na manungunungu a mojɔ moekenge ebala yo bo, Mbi nadi molɛmbɛ mua modonga oho Diko.

⁴² Babala bo, Iyo, te mwana oYosepa? Iso bojebaka sangwa’nde na ngwa’nde. Oko boa, yo abalaka bo, Mbi nadonga oho Diko, mojɔ moye?

⁴³ Yesu abasɔmbeja bo, Yɛni bohima a tei enu.

⁴⁴ Sango yona olomani amiti bilea moto, atadoa nongo ai mbi; na mbi namongɔjɔbí a busa bosuka.

⁴⁵ Mosɔnɔmɔ a mikanda mibatɔndɔi bo, Njambe âbakoja basusu. Oko boa, moto na moto yona ohokeaka na okoaka na Sango adoaka ai mbi.

⁴⁶ Pɛpɛ nongo moto onɛ Sango. Iyona onɛ Sango, oko yona odonga oho ai Njambe.

⁴⁷ Mbi natɔndɔkɔ no na soti bo yona ojimaka adi na bomɔ bua bodi na bosusu.

⁴⁸ Mbi nadi molɛmbɛ mobomɔ.

⁴⁹ Batata banu bayaka manna a lisobe na bagwa.

⁵⁰ Molɛmbɛ mu ko mohula oho Diko, na moto akayaka molɛmbɛ momina atagwa nongo.

⁵¹ Mbi nadi molɛmbɛ mobomɔ mua mohula oho Diko. Moto akayaka molɛmbɛ mu, âda na bomɔ oko na bosusu mɛnɛ. Na molɛmbɛ môpa mbi modi oko munu mombi; namopa a mojɔ mobomɔ bongondo.

⁵² BaYuda babomana kitɛ a mojɔ momina. Babala bo, Iyo moto adi bopa so munu monde a boyaka o bo?

⁵³ Yesu abasɔmbeja bo, Soti mɛnɛ, mbi nabalaka na nu bo, Omiti yakani munu moMwana ’Moto, na omiti mwakani makia mande, oditini na bomɔ a tei enu.

⁵⁴ Iyona oyakaka munu mombi na omwakaka makia mambi, adi na bomɔ bua botasia, na mbi nâmongɔjɔbí a busa bosuka.

⁵⁵ Mojɔ bo munu mombi modi mia masoti, na makia mambi madi emwakeli esoti.

⁵⁶ Iyona oyakaka munu mombi na omwakaka makia mambi ayeyoaka a tei embi, na mbi nayeyoaka a tei ende.

⁵⁷ Sango obomɔ aloma mbi, na bomɔ bombi bodi a tei ende. Oko boa yona oyakaka mbi âda na bomɔ oko a mojɔ mombi.

⁵⁸ Molɛmbɛ mua mohula oho Diko modi boa. Batata banu bayaka manna na bagwa. Moto ko akayaka molɛmbɛ mumu, âda na bomɔ oko na bosusu.

⁵⁹ Yesu abala mijɔ mimi, yana akojaka yo a smagoge eKapalanauma.

Bakina Bacingami Badonga. Mojimo moPɛtɛlo

⁶⁰ Yana aka bo mojɔ momina, bacingami bande banɛnɛ babala bo, Ekenge emina edi epipo; odi bojima ekenge emina nda?

⁶¹ Yesu ajeba bo bacingami bande bamohimaka a mojɔ momina; na ahala na bu bo, Ino odini bosaka libaku a mojɔ moekenge emina?

⁶² Môda bo, okanɛni Mwana ’Moto akawee a esika edaka yo boso?

⁶³ Mwembo pɛ mopaka bomɔ; munu modi eka engasa. Bikenge bibali mbi na nu bidi mwembo, na bidi bomɔ.

⁶⁴ Bakina banu ko batajimaka. Mojɔ bo Yesu ajeba a bobanga mɛnɛ, baya baidaka na ejimeli, na ajeba koko yona odi bomokaba.

⁶⁵ Abala koko na bu bo, Mojɔ mu mocingi na ekenge emi mbi bala na nu bo, Pɛpɛ nongo moto odi bodoa ai mbi, isa Sango atamopa njea.

⁶⁶ Bacingami bande banɛnɛ badonga a ehole ernina, na baidala koko na nde.

⁶⁷ A mojɔ momina, Yesu abala na bacingami domi-na-babae bo, Ino opalakani bodonga pongono?

⁶⁸ Simona Pɛtɛlo amosɔmbeja bo, Kumu, iso bodi bokɛ ai nda? Odi na bikenge bibomɔ oko wɛ.

⁶⁹ Iso bojimaka na bojebaka bo wɛ odi Yona Mosɛnɔke oNjambe.

⁷⁰ Yesu amosɔmbeja bo, Mbi naihɔ no domi-na-babae? Okina onu ko adi mwembo mobe.

⁷¹ Iyo abala boa a mojɔ moYuda, mwana ’Simona Iskalio, yona odaka omɔci obu domi-na-babae; yo adaka mokabi onde.