Yoane 5 - Nouveau Testament en Ngombe 1961

Yesu Aheleja Moto Mondɔke

¹ Ngɔngɔ jimina, Yesu akɛ a Yelusalema, mojɔ bo ekina Kola eBaYuda edaka oho.

² Likina lilebo lidi a Yelusalema, libati na njea ebata. Lidi na biseba bitano, na kombe emina edi Beteseda a LiEbele.

³ Bato babego banɛnɛ mɛnɛ badaka basambi a biseba bimina, bagwa-miso, bamitɛngu, na bandɔke. (Bambaka bohua bomadiba

⁴ mojɔ bo obwɛnji oDiko atita oko a lilebo bikina bihole, na madiba matɔkɔ. Na moto yona otitea a madiba boso yana atɔkɔ madiba, ahela a yogo ende.)

⁵ Momi omɔci adaka ena yona oma sama na ekina yogo bianga domi-isato na bianga bomwambe.

⁶ Yesu amonɛ asambi, na ajeba bo ama yeyoa ekoka boa. Abala na nde bo, Opalaka ohele?

⁷ Moto yona odaka na yogo amosɔmbeja bo, Kumu, mbi napeliti moto a botiteja mbi ta madiba a ehole etɔkɔkɔ madiba. Yana atitaka mbi, okina otongo atitaka a boso bombi.

⁸ Yesu abala na nde bo, Angɔ! Tomba litɔkɔ liwɛ! Dala!

⁹ Moto omina ahela a yogo ende bokpa mɛnɛ, atomba litɔkɔ linde na adala. Busa bomina bodaka busa boSabata.

¹⁰ A mojɔ momina, BaYuda babala na moto yona ohela a yogo ende bo, Busa bu bodi Sabata; ebɔngiti bo otombe litɔkɔ liwɛ.

¹¹ Iyo ko abasɔmbeja bo, Moto yona ohelejaini abali na mbi bo, Tomba litɔkɔ liwɛ na dala.

¹² Bamohɔjɔ bo, Moto omina nda, yona otɔndɔi wɛ bo otombe litɔkɔ liwɛ bo odale?

¹³ Moto ko yona ohela a yogo aijeba moto omina, na Yesu yo mɛnɛ ama donga, mojɔ bo bato badaka banɛnɛ a esika emina.

¹⁴ Yesu amotana ngɔngɔ a tempelo, na abala na nde bo, Ika! wɛ oheli a yogo ewɛ. Yɛ bokɔ koko bobe, bo osaka nɛ mokina monɔngɔ mua monɔi na bobe.

¹⁵ Moto omina akɛ ajebejae BaYuda bo yona omoheleja adi oko Yesu.

¹⁶ A mojɔ momina, BaYuda babanga bonɔngeja Yesu, ema bo akɔkɔ ngando jimina a busa boSabata.

¹⁷ Yesu ko abasɔmbeja bo, Sangwa’mbi adi oko a elomu, na mbi koko nakɔkɔ elomu.

¹⁸ Oko boa, BaYuda bahɛjɛ bingi bo bamowoe, mojɔ bo aisopa mobeko moSabata pɛ; abea koko Njambe Sangwa’nde, na asabwaneja na nde amɛci.

Mojɔ Mobomɔ

¹⁹ Yesu abasɔmbeja bo, Mbi natɔndɔkɔ no na soti bo, Mwana t’ahɔnɔke bokɔ mokina mojɔ yo mɛnɛ; akɔkɔ oko mua monɛkɛ yo bo Sango akɔkɔ. Ngando jisusu jikɔkɔ Sango,—Mwana akɔkɔ boa pongono.

²⁰ Mojɔ bo Sango adi na Mwana ngɛnjɔ, na amonejaka ngando jisusu jikɔkɔ yo. Adi bomoneja koko ngando jitongo jia jinɔi jiji a bokamoja no.

²¹ Sango angɔjɔkɔ bagwake, na abapaka bomɔ. Oko boa koko, Mwana apaka bomɔ ai baya bapalaka yo.

²² Sango t’asambejake nongo moto. Akina elomu esusu ebosambeja a mɔmɔ maMwana,

²³ bo bato basusu badae na lisuma ai Mwana, o asumaka bo Sango. Yona odi pɛ bosuma Mwana, aditi na lisuma ai Sango yona omoloma.

²⁴ Mbi natɔndɔkɔ no na soti bo, Yona ohokeaka ebaeli embi, na ojimaka yona olomani, adi na bomɔ bua bodi na bosusu. Iyo atada nongo na esambi, mojɔ bo aheli a hogwa, na akwei a bomɔ.

²⁵ Mbi natɔndɔkɔ no na soti bo bagwake mɛnɛ badi boka kɔpi eMwana ’Njambe a ehole yena ekɛkɛ adoe. Ee, ehole emina emei edɛye, na baya bahokeaka bâhela.

²⁶ Sango adi na bomɔ a tei ende mɛnɛ. Oko boa Mwana asɔ epeeli ebomɔ ai yo bo adae na bomɔ a tei ende mɛnɛ pongono.

²⁷ Amopa koko kpaci a bosambeja, cina bo adi Mwana ’Moto.

²⁸ Yɛ bokamoani a mojɔ momina. Bokina busa, bato basusu baya badi a bisɛmɔ bakabi kɔpi ende na bamanabi.

²⁹ Baya bakɔ bopele bangɔbí a bomɔ; baya bakɔ ko bobe bangɔbí a mojɔ mobosamba.

³⁰ Mbi naditi na kpaci a bokɔ mokina mojɔ mbi mɛnɛ. Nasambejaka o akaka mbi. Esambi embi edi bojo, mojɔ bo mbi napalaka oko bolulea boSango yona olomani, te nongo bolulea bombi mɛnɛ.

³¹ Nakatata tati ai mbi mɛnɛ, tati embi embi etada tati esoti

³² Okina otongo ko atataka tati ai mbi, na mbi najebaka bo tati etataka yo ai mbi edi tati esoti.

³³ Ino olomani ai Yoane, na yo atata tati esoti.

³⁴ Tati ko esɔkɔ mbi, editi tati emoto. Mbi ko nabali ngando ji bo oheleni.

³⁵ Yoane adaka paka yena eyoaka, na epaka bohu; na odakani na posaa bosepa a mojɔ mobohu bonde ekina ehole.

³⁶ Na tati embi ko, na tati eYoane, tati embi enɔi. Mojɔ bo Sango apani bilomu bo nabisiejae. Bilomu bimina, oko bilomu bikɔkɔ mbi, binejaka bo Sango alomani.

³⁷ Sango yo mɛnɛ yona olomani, atata tati ai mbi. Ino ko oikani nongo kɔpi ende; omɛni nongo elimo ende.

³⁸ Ebaeli ende editi atei enu, mojɔ bo otajimakani yona oloma yo.

³⁹ Odukakani a Misɔnɔ mojɔ bo olɛkɛni bo obolojaeni bomɔ bua bodi na bosusu a tei eMisɔnɔ. Misɔnɔ ko mibalaka a mojɔ mombi a bohu.

⁴⁰ Ino ko otapalakani bodoa ai mbi bo osɛni bomɔ.

⁴¹ Mbi te nasɔke ekumu ai bato.

⁴² Najebaka bo ino opelitini ngɛnjɔ eNjambe a tei enu.

⁴³ Mbi nadoi a kombe eSangwa’mbi, na otasɔkɔni mbi. Okina otongo ko akadoa a kombe ende mɛnɛ, ômosɔni.

⁴⁴ Ino odini bojima na ye? mojɔ bo osɔkɔni oko ekumu enu ai bato batongo; otadukakani nongo ekumu yena ehulaka ai Njambe pɛ.

⁴⁵ T’olɛeni oko bo mbi nadi bodumba no a boso boSango. Okina otongo adi bodumba no, oko Mose; njingo enu ko edi oko ai yo.

⁴⁶ Akɔki no jima Mose, ka ojimini mbi pongono, cina bo yo asɔnɔ a mojɔ mombi.

⁴⁷ Isa otajimakani misɔnɔ minde, odini bojima bikenge bimbi na ye?