Yoane 4 - Nouveau Testament en Ngombe 1961

Mwali oSamalia

¹ Yesu ajeba bo BaPalusi baka bo etango ebato baya bahekoaka ai yo a bobatisama, enɔi yena ebacingami baYoane.

² (Yesu aibatisaka yo mɛnɛ, oko bacingami bande.)

³ A mojɔ momina yo adonga a Yuda bo asɔmbe a Galile.

⁴ Njea ende edaka a tei eSamalia.

⁵ Oko boa, yo amea a Sikala, ekina ngando eSamalia, hulelu na mokpɔtɔ mopa Yakobo ai mwana’nde Yosepa.

⁶ Moboka moYakobo modaka oko ena. Yesu ambɛ na mɔndɔ, na ada na mobondo a dɔngɔ dimoboka.

⁷ Edaka ehole emidi, na mwali omɔci oSamalia adoa a boloka madiba. Yesu abala na nde bo, Pani namwake.

⁸ Mojɔ bo bacingami bande bama kɛ a ngando a bosomba leka loboyaka.

⁹ Mwali oSamalia abala na nde bo, Boni! Wɛ MoYuda ongaka mbi madiba, mbi mwali oSamalia? (Gina bo BaYuda na BaSamalia te bangɛnɛke.)

¹⁰ Yesu amosɔmbeja bo, Akɔki wɛ jeba epeeli eNjambe na yona ongaka wɛ madiba, ka omongi yo, na yo api wɛ madiba mabomɔ.

¹¹ Mwali abala na nde bo, Kumu, opeliti eka eboloka na madiba, na moboka modi na ndinda. Oko boa, madiba mawɛ mabomɔ mâhula jɔ?

¹² Wɛ onɔi tata osu Yakobo, yona opa so moboka mu, na amwaka ya, yo mɛnɛ, na bana bande, na mela mande?

¹³ Yesu amosɔmbeja bo, Moto na moto yona omwakaka madiba mama âka koko ekangola.

¹⁴ Moto ko akamwaka madiba mamopaka mbi, ata’ka koko ekangola na ikina; cina bo madiba mâmopa mbi mada molo momadiba mabomɔ a tei ende, maya makɛlɛkɛ na bosusu.

¹⁵ Mwali abala na nde bo, Kumu, pani madiba mamina bo nita’ka koko ekangola, na nitadoa koko ya a boloka.

¹⁶ Yesu abala na nde bo, Kɛ abee muma’wɛ na hula na nde jɔno.

¹⁷ Mwali asɔmbeja bo, Mbi napeliti momi. Yesu abala na nde bo, Abali wɛ bo opeliti momi, olongi;

¹⁸ mojɔ bo odaka na bami batano, na yona odi na wɛ edɛye aditi nongo muma’wɛ. Mojɔ mobali wɛ modi soti.

¹⁹ Mwali abala na nde bo, Kumu, mbi nasipoaka edɛye bo wɛ odi motɔndɔi.

²⁰ Batata basu basakoa Njambe a mono mu; ino ko obalakani bo bato babwani bosakoa Njambe oko a esika yena edi a Yelusalema.

²¹ Yesu abala na nde bo, Mwali, hokea mhi. Ôsakoani Sango a masu mangɔngɔ, te nongo a mono mu, isa a Yelusalema.

²² Ino otajebakani yona osakoaka no. Iso ko bojebaka yona osakoaka so, mojɔ bo boheleja bocingi na BaYuda.

²³ Ehole ekɛkɛ adoe, ee emei edɛye, na basakoi basoti badi bosakoa Sango a mwembo na soti, mojɔ bo Sango apalaka bo basakoi bande bamosakoe boa.

²⁴ Njambe adi mwembo, na baya bamosakoaka babwani bomosakoa a mwembo na soti.

²⁵ Mwali abala na nde bo, Najebaka bo Masiya (yona odi na kombe Klisto) adi bodoa. Iyo akadoa, ajebeja so ngando jisusu.

²⁶ Yesu abala na nde bo, Mbi nadi oko yo, mbi yona obalaka na wɛ.

²⁷ Bacingami bande bahula a ehole emina. Ibo bakamoa mojɔ bo asolaka na mwali omina. Pɛpɛ nongo okina obu ko obala bo, Opalaka nde? isa, Osolaka na nde mojɔ moye?

²⁸ Oko boa mwali akina teni ende, asɔmbɔ a ngando, na abala na bato bangando bo,

²⁹ Doani onjeni moto yona otɔndɔini ngando jisusu jikɔ mbi. Isa yo adi Masiya?

³⁰ Ibo badonga a ngando a bodoa ai Yesu.

³¹ A ehole emina, bacingami bande bapala bo ayake. Babala na nde bo, Labi, yaka.

³² Iyo ko abala na bu bo, Mbi nadi na mia maboyaka madi no pɛ bojeba.

³³ A mojɔ momina, bacingami babalana bo, Isa moto amolwɛi eka a boyaka?

³⁴ Yesu abala na bu bo, Mambi mia madi oko bo nakɔe bolulea boyona olomani, na bo nasiejae elomu ende.

³⁵ Ino obalakani bo ndongo jidi bokpeta na songe banɛi. Mbi ko natɔndɔkɔ no bo, Angɔjɔni miso! Anjani gbie! Jikpeti, na jibwani na bojua.

³⁶ Moto yona ojuaka asɔkɔ ndese, na aboleaka jia jijuaka yo oko a bomɔ bua bodi na bosusu. Oko boa, yona onaka gbie, na yona ojuaka, badi bosepa pongono.

³⁷ Mondɛ modi na soti bo, Okina anaka gbie, na otongo ajuaka.

³⁸ Ino oiliani nongo a esika elomi mbi no a bojua. Batongo balia molio, ino ko osangoini bilomu bibu.

³⁹ BaSamalia banɛnɛ bamojimea a mojɔ mobikenge bitata mwali bo, Iyo atɔndɔini ngando jisusu jikɔ mbi.

⁴⁰ Oko boa, yana adoa BaSamalia ai Yesu, bamongɔɔnɔ bo ayeyoe na bu, na ayeyoa masu mabae a esika emina.

⁴¹ Bato batongo banɛnɛ bajima a mojɔ moebaeli eYesu yo mɛnɛ.

⁴² Ibo babala na mwali bo, Iso bojimaka edɛye, te a mojɔ moekenge ebali wɛ; bomoki so bɛnɛ, na bojebaka bo yo adi Moheleja ongondo na soti mɛnɛ.

Yesu a cialile

⁴³ Yana asia masu ma mabae, Yesu angɔ ena, na akɛ a Galile

⁴⁴ Iyo mɛnɛ abala bo motɔndɔi aditi na ekumu a likota linde mɛnɛ.

⁴⁵ Amea yo a Galile, bato baGalile bamosɔ bopele, mojɔ bo ibo bama kɛ a Kola pongono, na banɛ ngando jisusu jikɔ yo a Yelusalema a ehole eKola.

⁴⁶ Oko boa adoa koko a Kana, ngando eGalile, esika ema hekoja madiha vino. Okina kapitɛni okumu adaka a Kapalanauma; na mwana’nde momi adaka na yogo.

⁴⁷ Yana aka yo bo Yesu adonga oho Yuda, na bo amea a Galile, akɛ ai yo, na amongɔɔnɔ bo adoe a boheleja mwana ’nde yona odika ndoko pɛ bo agwɛ.

⁴⁸ Yesu abala na nde bo, Omiti nɛni mindumba na bimbete, otajimani nongo.

⁴⁹ Kapitɛni okumu amosɔmbeja bo, Kumu, doa edɛye bo mwana ’mbi asaka gwa.

⁵⁰ Yesu abala na nde bo, Yana; mwana ’wɛ aheli. Moto omina ajima ekenge ebala Yesu na nde, na ayana.

⁵¹ Adalaka yo a njea, bakɔmɛli bande basongana na nde, na bamotɔndɔ bo mwana’nde ahela.

⁵² Iyo abahɔjɔ ehole ebanga yo bosɔ bopele, na bamosɔmbeja bo, Yogo ende esiabi mɔkɔ a ebole une heure.

⁵³ Oko boa sange ’mwana ajeba bo ehole emina edaka ehole ema bala Yesu na nde bo, Mwana ’wɛ aheli. Na yo ajima, yo mɛnɛ na bato bande basusu.

⁵⁴ Iye edi embete ebibae ekɔ Yesu a Galile, yana adonga yo a Yuda.